ކޮންމެ ދާއިރާއަކުން ޚިދުމަތްކުރިޔަސް ތެދުވެރިކަމާއި އަމާނާތްތެރިކަން އިސްކުރަންޖެހޭ - ނާއިބު ރައީސް
ކޮންމެ ދާއިރާއަކުން ޚިދުމަތްކުރި ނަމަވެސް ތެދުވެރިކަމާއި އަމާނާތްތެރިކަން އިސްކުރުމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ގޮވާލައްވައިފިއެވެ.
އެމަނިކުފާނު މިިކަމަށް ގޮވާލައްވާފައިވަނީ މޯލްޑިވްސް ކަސްޓަމްސް ސަރވިސްގެ 129 ވަނަ އަހަރީދުވަސް ފާހަގަކުރުމަށް ބޭއްވި ޙާއްސަ ޙަފްލާ ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވީ، ރާއްޖޭގެ އިމްޕޯޓް އެކްސްޕޯޓުގެ ކަންކަން ބެލެހެއްޓުމުގެ ޤާނޫނީ ޒިންމާ އަދާކުރާ މުޢައްސަސާގެ ހައިސިއްޔަތުން، ރާއްޖޭގެ ޤައުމީ ސަލާމަތާއި ރައްކާތެރިކަން ކަށަވަރުކޮށްދިނުމުގައިވެސް ކަސްޓަމްސްއަކީ މުހިއްމު ދައުރެއް އަދާކުރާ މުއައްސަސާއެއްކަމަށެވެ. އަދި ކަސްޓަމްސްގެ މުވައްޒަފުން ރެއާދުވާލު ކުރަމުންދާ ބުރަ މަސައްކަތް އެމަނިކުފާނު ވަނީ ފާހަގަކުރައްވާފައެވެ.
ނާއިބު ރައީސް ފައިޞަލް ވިދާޅުވީ، ކޮންމެ ދާއިރާއަކުން ޚިދުމަތްކުރިނަމަވެސް، ތެދުވެރިކަމާއި އަމާނާތްތެރިކަމުގެ ސިފަ ކުރިއަށްނެރެ، ޤައުމަށް އެންމެ ފައިދާހުރި ގޮތަކަށް ކަންކަން ބައްޓަންކުރުމަށް ވިސްނަންޖެހޭކަމަށެވެ. އަދި ކޮރަޕްޝަނާއި ފަސާދައަކީ މިއަދު ކޮންމެ ދާއިރާއަކަށްވެސް ކުރިމަތިވެފައިވާ އެންމެ ބޮޑު އެއް ގޮންޖެހުންކަން ފާހަގަކުރައްވާ، އިންސާނާގެ ނަފްސު އިސްލާޙުކޮށްގެން މެނުވީ އެފަދަ ކަންކަން ނައްތާނުލެވޭނެކަމަށާއި، މާދަމާ ޤައުމު ހިންގުމާއި ހަވާލުވާންތިބި ދަރީންނަށް ރަނގަޅު ނަމޫނާއެއް ދެއްކުމަށްވެސް ނާއިބު ރައީސްވަނީ އިލްތިމާސްކުރައްވާފައެވެ.
ނާއިބު ރައީސް ވަނީ ކަސްޓަމްސްގެ ޚިދުމަތަކީ ހުރިހާ ދިވެހިންނާވެސް ގުޅިލާމެހިފައިވާ ޚިދުމަތެއްކަމުން، މި ޙިދުމަތްފޯރުކޮށްދިނުމުގައި މި ސަރުކާރުގެ އެންމެ މުހިއްމު އެއް ސިޔާސަތުތަކަމަށްވާ އެއްވެސް ތަފާތުކުރުމެއްނެތި ހަމަހަމަކަމާއެކު ޚިދުމަތްދެވޭނެހެން ކަސްޓަމްސްގެ ކަންކަން ބައްޓަންކުރުމަށް ގޮވާލައްވާފައެވެ.
މޯލްޑިވްސް ކަސްޓަމްސް ސަރވިސްގެ 129 ވަނަ އަހަރީދުވަސް ފާހަގަކުރުމަށް ބޭއްވި ޙަފްލާގައިވަނީ ކަސްޓަމްސްގެ މުވައްޒަފުންގެ ތެރެއިން އެކިއެކި ދާއިރާތަކުން ފާހަގަކުރެވޭ މުވައްޒަފުންނަށް ހަނދާނީފިލާ ދިނުމުގެ އިތުރުން، ކުރިއަށްއޮތް 5 އަހަރަށް އެކުލަވާލާފައިވާ ކަސްޓަމްސްގެ ސްޓްރެޓެޖިކް ޕްލޭންވެސް ތަޢާރަފުކޮށްފައެވެ.