އެކައުންޓިންގ ދާއިރާގެ ވަޒީފާތަކާ ދިވެހިން ހަވާލުވާންވީ ވަގުތު އަތުވެއްޖެކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެ
މޯލްޑިވްސް އެކައުންޓަންޓްސް ފޯރަމްގައި ވާހަކަފުޅުދައްކަވަމުން އޮޑިޓަރ ޖެނެރަލް ހަސަން ޒިޔަތު ވިދާޅުވީ، އެކައުންޓަންޓުންނާއި އޮޑިޓިންގެ ދާއިރާއިން ވަރަށް ގިނަ ދިވެހި ކުދިން ތައުލީމް ހާޞިލްކުރަމުން އަންނަކަމަށާއި، އަދި މިދާއިރާގެ ވަރަށްގިނަ ދިވެހި ޕްރޮފެޝަނަލް ފަރާތްތައް ތިބިއިރު، މިދާއިރާ ބިދޭސީންގެ އަތްމައްޗަށް ދޫކޮށްލެވިފައިވާތަން ފެންނަމުންދާކަމަށެވެ. އެހެންކަމުން އެކައުންޓިންގ ދާއިރާއާއި ދިވެހިން ހަވާލުވާން ވީ ވަގުތު އައިސްފިކަމަށާއި، އޮޑިޓަރ ޖެނެރަލްގެ އޮފީހުން މިކަން ހާސިލްކުރުމަށް ގިނަ މަސައްކަތްތަކެއް ކުރަމުން އަންނަކަން ޒިޔަތު ފާހަގަކުރެއްވިއެވެ. އެގޮތުން ދިވެހިންނަށް އޮޑިޓް ލައިސަންސް ދޭން ފަށާފައިވާކަން ފާހަގަކުރެއްވިއެވެ. އަދި އެބޭފުޅުންގެ ފަންނީ ގާބިލްކަން އިތުރު ކުރުމަށް ތަމްރީނުތައް ފޯރުކޮށްދިނުމާއި، ވިޔަފާރިވެރިންނާއި ކަމާބެހޭ ފަރާތްތަކާއި ވާހަކަ ދައްކައިގެން ދިވެހިންނަށް ފުރުޞަތުތައް ފަހިކުރެވޭނެ ގޮތްތައް ހޯދަން މަސައްކަތް ކުރާކަން ޒިޔަތު ފާހަގަކުރެއްވިއެވެ.
މިދާއިރާ އިތުރަށް ހަރުދަނާ ކުރުމުގެ ގޮތުން މިހާރު އެންމެ ބޮޑަށް ކުރެވޭ އުންމީދަކީ، ދިވެހިރާއްޖޭގައި ޗާރޓަޑް އެކައުންޓިންގ އޯގަނައިޒޭޝަން އުފެއްދުމަށް ކުރަމުން އަންނަ މަސައްކަތުގައި ކުލަ ޖެހުންކަމަށާއި އެކަމަށް އެކުލަވާލާފައިވާ ބިލް، ލަހެއްނުވެ ގާނޫނަކަށް ބަދަލުކުރައްވަން ސަރުކާރުގެ އެއްބާރުލުން ލިބޭނެކަމަށް ޔަގީންކުރައްވާ ކަމަށްވެސް ޒިޔަތު ވިދާޅުވިއެވެ.
މޯލްޑިވްސް އެކައުންޓެންޓްސް ފޯރަމް އަކީ، ދިވެހިރާއްޖޭގައި އެކައުންޓެންސީ ޕްރޮފެޝަން ތަރައްގީކޮށް ކުރިއެރުވުމުގެ މަގުޞަދުގައި، އޮޑިޓަރ ޖެނެރަލްގެ އޮފީހުން އިސްނަގައިގެން 2017 ވަނަ އަހަރުން ފެށިގެން ބާއްވަމުން އަންނަ މަހާސިންތާއެކެވެ.
ތިން ދުވަހުގެ މުއްދަތަށް ކުރިއަށްދާ މި މަހާސިންތާގައި، ވިޔަފާރިވެރިންނާއި، ސަރުކާރުގެ އިދާރާތަކާއި، އެކައުންޓެންޓުންނާއި އޮޑިޓަރުންގެ އިތުރުން، ކީ ސްޓޭކްހޯލްޑަރުން ބައިވެރިވެރިވާނެއެވެ. އަދި ރާއްޖެއާއި ރާއްޖެއިން ބޭރުގެ މާހިރުންނާއި، ނަންމަޝްހޫރު ތަޖުރިބާކާރުންގެ ހުށަހެޅުންތަކާއި، ޕެނަލް ޑިސްކަޝަންތައް ހިމެނެއެވެ.