12 އަހަރަށްފަހު މަސްދަޅު ބަންދުކުރުމުގެ އައު ރެކޯޑެއް ފެލިވަރު މަސް ފެކްޓްރީން ޤާއިމްކޮށްފިއެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ މިފްކޯއިން ބުނީ މިދިޔަ ހޯމަދުވަހަކީ 12 އަހަރު ތެރޭގައި ފެލިވަރުގައި އެންމެ ގިނަ އަދަދަކަށް މަސް ބަންދުކުރި ދުވަސްކަމަށެވެ. މި ރެކޯޑް މިފްކޯއިން ޤާއިމްކޮށްފައިވަނީ 60 ޓަނުގެ މަސް ބަންދުކޮށްގެންނެވެ.
މިފްކޯއިން މީގެ ކުރިން އެންމެ ގިނަ އަދަދަކަށް މަސް ބަންދުކޮށްފައިވަނީ 2007 ވަނަ އަހަރުތެރޭގައެވެ. އެއީ 65 ޓަނުގެ މަހެވެ. މިއީ އޭގެފަހުން އެންމެ ގިނަ އަދަދަކަށް މަސް ޕްރޮސެސްކުރި ފުރަތަމަ ފަހަރުކަމަށް މިފްކޯއިން ބުނެއެވެ.
60 ޓަނުގެ މަސް މިފްކޯއިން ބަންދުކޮށްފައިވާއިރު މީގެތެރޭގައި ހިމެނެނީ 3،946 ކޭސް ޓޫނާ ޗަންކްސް އިން އޮއިލް ކުދި ދަޅާއި 1.8 ކިލޯގެ ބޮޑެތި ދަޅުގެ 46 ކޭހާއި، ޕެކެޓު މަހުގެ 196 ކޭހެވެ.
ފެލިވަރު އަދި ކޫއްޑޫގައި ޤާއިމްކޮށްފައިވާ މިފްކޯގެ މަސް ކާރުޙާނާތަކުގެ ފެންވަރު ރަގަޅުކޮށް ކެޕޭސިޓީ އިތުރުކުރުމަށް މަސައްކަތްތަކެއް ކުރެވެމުންދާކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު މީގެ ކުރިން ވަނީ ވިދާޅުވެފައެވެ.
މިނިސްޓަރ ޒަހާ ވިދާޅުވެފައިވަނީ ސަރުކާރުގެ އަމާޒަކީ ގަނޑުކުރި މަސް ރާއްޖެއިން ބޭރުކުރާ މިންވަރު މަދުކުރުން ކަމަށާއި ވެލިއު އެޑް ކުރެވިގެން މަހުގެ ބާވަތްތައް ރާއްޖެއިން ބޭރު ކުރެވޭނެ އިންތިޒާމްތަކެއް ހަމަޖައްސަމުންދާ ކަމަށެވެ.
ޅ. ފެލިވަރު މަސް ފެކްޓްރީ ރަސްމީކޮށް ހުޅުވައި، މަސް ބަންދު ކުރުމުގެ މަސައްކަތް ފަށާފައިވަނީ 3 ފެބްރުއަރީ 1978 ވަނަ އަހަރުއެވެ.