ޑްރަގް މައްސަލަތަކުގައި ހުކުމް ތަންފީޒް ކުރަމުންދާ ޤައިދީންނަށް އަމާޒުކޮށްގެން މޯލްޑިވްސް ކަރެކްޝަނަލް ސަރވިސުން މާފުށީ ޖަލުގައި އުއްމީދު ޕްރޮގްރާމްގެ ނަމުގައި ރިހެބިލިޓޭޝަން ޕްރޮގްރާމެއް ފަށައިފިއެވެ.
6 މަސް ދުވަހުގެ މުއްދަތައް ހިންގާ މި ޕްރޮގްރާމަކީ ޖަލުގައި ހުކުމް ތަންފީޒު ކުރަމުންދާ މީހުން އިސްލާހުކޮށް، މަސްތުވާތަކެތީގެ ވަބާއިން އެމީހުން ސަލާމަތްކޮށް، މުޖްތަމަޢުއަށް އަނބުރާ ގެނައުމަށް، ސަރުކާރުން ވެވަޑައިގެންފައިވާ ވަޢުދު ފުއްދުމަށް، މޯލްޑިވްސް ކަރެކްޝަނަލް ސަރވިސްގެ ފަރާތުން ކުރަމުންދާ މަސައްކަތްތަކުގެ ތެރެއިން ފެށި ޕްރޮގްރާމެކެވެ. 100 ޤައިދީންނާއެކު ފެށި ރިހެބިލިޓޭޝަން ޕްރޮގްރާމް އިފްތިތާހުކޮށްދެއްވީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރެވެ.
މި ރަސްމިއްޔާތުގައި ވާހަކަދައްކަވަމުން ޒާހިރު ވިދާޅުވީ މަސްތުވާތަކެތީގެ ވަބާގައި ޖެހިފައިވާ މީހަކު އެވަބާއިން ސަލާމަތްވުމަށް ބޭނުންވާނީ އެކަމަށް އަޒުމު ކަނޑައެޅުމަށް ކުޑަ ވަގުތުކޮޅެއްކަމަށާއި އަޒުމް ކަނޑައެޅުމަށްފަހު އެކަން ދަމަހައްޓައިފިނަމަ، އެ ވަބާއިން ސަލާމަތްވާނެކަމަށާއި އަޤީދާއާއި އަޒުމް ވަރުގަދަކުރުމަކީ އެންމެ މުހިއްމު ކަންތައްކަމަށެވެ. އަދި މިއީ ވަރަށް ގިނަ ބައެއްގެ އުއްމީދުތަކާ ގުޅިފައިވާ ޕްރޮގްރާމެއްކަމަށްވެސް އޭނާ ވިދާޅުވިއެވެ.
މި ރަސްމިއްޔާތުގައި ކޮމިޝަނަރ އޮފް ޕްރިޒަންސް އަބްދުﷲ މުނާޒު ވިދާޅުވީ ކަރެކްޝަނަލް ސަރވިސްގެ އަމާޒަކީ މި ޕްރޮގްރާމް ފުރިހަމަކުރާ ކޮންމެ މީހަކީވެސް އަޚްލާޤަށް ހެޔޮ ބަދަލުތަކެއް އައިސްފައިވާ، މުޖްތަމަޢު ބަލައިގަންނަ، އަބުރުވެރި، ތާހިރު ދިރިއުޅުމެއް އުޅެން ދަސްކޮށްދެވިފައިވާ މީހަކަށްވުންކަމަށެވެ. އަދި މިޕްރޮގްރާމްގެ ތެރެއިން ދިރިއުޅުމުގެ ހުނަރާއި ޢާންމު ސިއްޙީ ހޭލުންތެރިކަމާއި މަސްތުވާތަކެތިން ދުރުހެލިކުރުމަށް މަސައްކަތް ކުރުމަށް ދެވޭ ތަޢުލީމާއި އިސްލާމީ ތަޢުލީމާއި ހަށިގަނޑުގެ ތަރުބިއްޔަތާއި ގުޅޭ ތަފާތު މަޢުލޫމާތުތައް ޤައިދީންނަށް ދެވިގެންދާނެކަމަށްވެސް މުނާޒު ވިދާޅުވިއެވެ. މީގެ އިތުރުން، ޖަލުން މިނިވަންވުމާއެކު، އަބުރުވެރި ދިރިއުޅުމެއް ފެށުމަށް، ޢާމްދަނީ ހޯދުމަށް ކުރާނެ ޢަމަލީ މަސައްކަތްތައްވެސް މި ޕްރޮގްރާމްގައި ދަސްކޮށްދެވޭނެކަމަށް އޭނާ ވިދާޅުވިއެވެ.
ކޮމިޝަނަރ އޮފް ޕްރިޒަންސް ވިދާޅުވީ ހުކުމުގެ މުއްދަތު ހަމަވުމުގެ ކުރިން ޖަލުން މިނިވަންވުމަށް ޤާނޫނީ އިމުގެ ތެރެއިން ލިބެން ހުރި ހުރިހާ ފުރުޞަތެއް ހޯދާ ދިނުމަށް މި ޕްރޮގްރާމް ފުރިހަމަ ކުރާ ފަރާތްތަކަށް ކަރެކްޝަންސުން އެހީތެރިވެދޭނެކަމަށެވެ.