ޑރ. ނާއިލާ އިބްރާހީމް މުޙައްމަދު ދީދީގެ ކުރެހުންތަކާއި އަތްތެރިމަސައްކަތްތައް ދައްކުވައިދޭ "އަންޑަރ ވޯޓަރ ވޯލްޑް އޮފް މޯލްޑިވްސް" ފޮޓޯ މައުރަޒު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ދެކަނބަލުން ހުޅުއްވައިދެއްވައިފިއެވެ.
ނެޝެނަލް އާޓް ގެލެރީގައި ބޭއްވި ޙާއްސަ ރަސްމިއްޔާތެއްގައި މި ފޮޓޯ މައުރަޒު ހުޅުއްވައިދެއްވުމަށްފަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ވަނީ ފޮޓޯ މައުރަޒު ބައްލަވާލައްވާފައެވެ. ރައީސުލްޖުމްހޫރިއްޔާގެ ދެކަނބަލުންގެ އަރިހުގައި މިނިސްޓަރ އޮފް އާޓްސް ކަލްޗަަރ އެންޑް ހެރިޓޭޖް ޔުމްނާ މަޢުމޫންވެސް ބައިވެރިވެވަޑައިގެންނެވިއެވެ.
މި ރަސްމިއްޔާތުގައި މައުރަޒުގެ ޙާއްސަ ހަނދާނީ ހަދިޔާއެއްވެސް ރައީސުލްޖުމްހޫރިއްޔާގެ ދެކަނބަލުންނަށް އަރުވާފައިވެއެވެ.
މި ފޮޓޯ މައުރަޒުގައި ރާއްޖޭގެ ކަނޑުފަޅުގެ މުއްސަނދިކަމާއި، ކަނޑުގެ ތަފާތު ދިރުންތަކާއި، ގުދުރަތީ ރީތިކަން ދައްކުވައިދޭހެން ޑރ. ނާއިލާ އަމިއްލައަށް ކުރަހާފައިވާ ތަފާތު ކުރެހުންތަކާއި، އަތްތެރިކަމުގެ މަސައްކަތްތައް ވަނީ ދައްކުވައިދީފައެވެ.
ޑރ. ނާއިލާއަކީ ރާއްޖޭގެ ޞިއްޙީ ދާއިރާއަށް ގިނަ ދުވަސްތަކެއްވަންދެން ޚިދުމަތްކޮށްދެއްވާފައިވާ ބޭފުޅެކެވެ. އަދި އެކަމަނާއަކީ ރާއްޖޭގެ ފުރަތަމަ އަންހެނުންގެ ޙާއްސަ ޑޮކްޓަރުވެސްމެއެވެ. ސޮސައިޓީ ފޯރ ހެލްތް އެޑިއުކޭޝަން، ޝީ ވުޖޫދަށް ގެނެއުމުގައިވެސް އިސްދަޢުރެއް އަދާކުރައްވާފައިވާ ޑރ. ނާއިލާ ވަނީ އަންހެނުންގެ ތަފާތު ބަލިތަކާއި ގުޅޭގޮތުން އާއްމުން ހޭލުންތެރިކުރުވުމުގައިވެސް މުހިއްމު މަސައްކަތްޕުޅުތަކެއް ކުރައްވާފައެވެ.
މިއީ ޑރ. ނާއިލާގެ ކުރެހުންތައް އާއްމުކޮށް ދައްކާލުމަށް ބާއްވާ މިފަދަ 3 ވަނަ މައުޒަރުކަމަށް މިކަން އިންތިޒާމްކުރާ ކްރާފްޓްސް އެންޑް ކްރިއޭޝަނުން ބުނެއެވެ. މި މަޢުރަޒު މިއަދުން ފެށިގެން 3 ދުވަހަށް ކުރިއަށްދާނެއެވެ.