މިނިމަން ވޭޖް ކަނޑައެޅުމުގެ މަސައްކަތް ޑިސެމްބަރުގެ ނިޔަލަށް ނިންމުމަކީ އަމާޒެއް - އިކޮނޮމިކް މިނިސްޓްރީ
ދިވެހިރާއްޖޭގައި މަސައްކަތް ކުރާ ފަރާތްތަކަށް އެންމެ ކުޑަމިނުން ދެވޭނެ މުސާރަޔާ އުޖޫރަ ކަނޑައެޅުމުގެ މަސައްކަތް މިއަހަރުގެ ނިޔަލަށް މުޅިން ނިންމާލުމަކީ އަމާޒެއްކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ވިދާޅުވެއްޖެއެވެ.
އިކޮނޮމިކް މިނިސްޓްރީން ވިދާޅުވީ، ދިވެހިރާއްޖޭގެ ވަޒީފާއާބެހޭ ޤާނޫނުގެ ފަންސާސް ނުވަ ވަނަ މާއްދާގެ ދަށުން، މުސާރައާއި އުޖޫރައާ ގުޅޭގޮތުން ލަފާދޭ ބޯޑެއެއް އެކުލަވާލައި، އެންމެ ކުޑަމިނުން ދެވޭނެ މުސާރައާއި އުޖޫރައެއް ކަނޑައެޅުމަށްޓަކައި ބޭނުންވާނެ ފުރިހަމަ މަޢުލޫމާތުތައް އެއްކޮށް، ދިރާސާކުރުމުގެ މަސައްކަތް ކުރަމުންދާކަމަށެވެ.
"މުސާރައާއި އުޖޫރައާއި ގުޅޭގޮތުން ލަފާދޭ ބޯޑް" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެކުލަވާލައްވާފައިވަނީ 1 މެއި 2019 ގައެވެ. މިބޯޑަކީ ރާއްޖޭގައި ވިޔަފާރި ކުރާ ތަންތަނުގައާއި، އެނޫންވެސް މަސައްކަތް ކުރާ ތަންތަނުގައި މުސާރައާއި އުޖޫރައިގެ ގޮތުން އެންމެ ކުޑަމިނުން ދެވޭނެ ޢަދަދެއް ކަނޑައެޅުމަށް މިނިސްޓަރ އޮފް އިކޮނޮމިކް ޑިވެލޮޕްމަންޓަށް ލަފާއެރުވުމަށް އެކުލަވާލެވިފައިވާ ބޯޑެކެވެ.
މިކަމަކީ ރާއްޖޭގައި އަދި އަލަށް ތަޢާރަފް ކުރެވޭ ކަމަކަށްވުމާއިއެކު، އެންމެ ކުޑަމިނުން ދެވޭނެ މުސާރައާއި އުޖޫރައެއް ކަނޑަ އެޅުމަށްޓަކައި ބޭނުންވާ މަޢުލޫމާތުތައް އެއްކޮށް، ދިރާސާކޮށް މި މަސައްކަތް ކުރިއަށް ގެންދާނެގޮތުގެ ރޯޑް މެޕެއް އެކުލަވާލައި، އެއާ އެއްގޮތަށް ބޯޑުގެ މަސައްކަތްތައް ކުރަމުންދާކަމަށް އިކޮނޮމިކް މިނިސްޓްރީން ވިދާޅުވެއެވެ.
މި މަސައްކަތްތަކުގެ ދަށުން އިންޓަނޭޝަނަލް ލޭބަރ އޮގަނައިޒޭޝަން، އައި.އެލް.އޯގެ އެހީއާއި ލަފާ މި ބޯޑަށް ލިބެމުންދާކަމަށާއި، އެގޮތުން، ފާއިތުވި ޖުލައި މަހު 10-8 އަށް އައި.އެމް.އޯގެ ވަފުދެއް ދިވެހިރާއްޖެއަށް ޒިޔާރަތްކޮށް 3 ދުވަހުގެ މަސައްކަތު ބައްދަލުވުން ތަކެއް ބާއްވާފައިވާކަމަށް އެ މިނިސްޓްރީން ވިދާޅުވެއެވެ. އަދި މި މަސައްކަތު ބައްދަލުވުންތަކުގައި އެކިއެކި މުއައްސަސާތަކުގައި ލިބެންހުރި މައުލޫމާތުތައް ދެނެގަނެ، އިތުރަށް ބޭނުންވާނޭ މަޢުލޫމާތުތައް ކަނޑައެޅުނެވެ. އަދި ދުނިޔޭގެ އެހެނިހެން ޤައުމުތަކުގައި މިނިމަމް ވޭޖް ކަޑައަޅާފައިވާ ގޮތާއި ބެހޭގޮތުން ބައިވެރިންނަށް މަޢުލޫމާތުދެވި، ރާއްޖޭގައި މިނިމަމް ވޭޖެއް ކަނޑައަޅާއިރު ބަލަންޖެހޭ ކަންތައްތަކާ ބެހޭގޮތުންވެސް ބައިވެރިންނާއެކު މަޝްވަރާކުރެވިފައިވާކަމަށް އިކޮނޮމިކް މިނިސްޓްރީން ވިދާޅުވެއެވެ.
ރާއްޖޭގައި މިނިމަމް ވޭޖް ކަނޑައެޅުމުގެ މަސައްކަތުގައި، އައި.އެލް.އޯގެ އެހީތެރިކަން އިތުރަށް ހޯދުމުގެ ގޮތުން އެ ޖަމްއިއްޔާގެ ފަރާތުން ލީޑް ކޮންސަލްޓެންޓެއްގެ ލަފާ ލިބޭނެ ގޮތް ހަމަޖެހިފައިވާއިރު، ރާއްޖޭގެ ޙާލަތާއި ގުޅޭގޮތަށް ފަންނީ ލަފާދިނުމާއި، މިނިމަމް ވޭޖް ކަނޑައެޅުމުގެ ދިރާސާތަކުގައި އެހީތެރިވެ ދިނުމަށް އެކިއެކި ސިނާޔަތްތައް ތަމްސީލް ކުރާ ޓެކްނިކަލް ކޮމިޓީ އެއްވެސް މިހާރު އެކުލަވާލާފައިވާކަމަށް އިކޮނޮމިކް މިނިސްޓްރީން ވިދާޅުވެއެވެ.
އިކޮނޮމިކް މިނިސްޓްރީން ވިދާޅުވީ، މުސާރައާއި އުޖޫރައާއި ގުޅޭގޮތުން ލަފާދޭ ބޯޑުން މިހާރު ކުރިއަށް ގެންދާ މައިގަނޑު މަސައްކަތަކީ، ސަރުކާރުގެ އެކިއެކި މުއައްސަސާތަކުންނާއި އެހެނިހެން ފަރާތްތަކުން ލިބެންހުރި މަޢުލޫމާތުތައް އެއްކުރުންކަމަށާއި، މިގޮތުން، ބޯޑުގެ ފަރާތުން ސަރުކާރުގެ ވަރަށް ގިނަ ފަރާތްތަކާ ބައްދަލުކޮށް އަދި ތަފާތު ސިނާޔަތްތަކުގައި މަސައްކަތް ކުރާ މުވައްޒަފުންގެ ޖަމާޢަތްތަކުގެ މަންދޫބުންނާއި ވަޒީފާ ދޭ ފަރާތްތަކާ އެކުވެސް ވަކިވަކިން ބައްދަލުކުރަމުންދާކަން އެ މިނިސްޓްރީން ފާހަގަކުރެއެވެ.
އަދި މިހާރު ލިބިފައިހުރި މަޢުލޫމާތުގެ އިތުރުން، ބޭނުންވާ މަޢުލޫމާތުތައް ހޯދުމަށްޓަކައި "އެންޓަރޕްރައިޒް ސާރވޭ" އެއް ކުރުމުގެ މަސައްކަތްތައް ކުރަމުންދާކަމަށްވެސް އިކޮނޮމިކް މިނިސްޓްރީން ވިދާޅުވެއެވެ.