ރާއްޖޭގެ ސަރުކާރުން އިސް ނަގައިގެން ބާއްވާ ދެވަނަ އިންވެސްޓްމެންޓް ފޯރަމް ޗައިނާގެ ބެއިޖިންގައި ބޭއްވުމަށް ހަމަޖެހިފައިވާއިރު، މި ފޯރަމް އޮންނާނީ ސެޕްޓެމްބަރު މަހުގެ ތެރޭގައި ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.މި ފޯރަމްގެ ސަބަބުން އަނެއްކާވެސް ރާއްޖޭގައި ފޮރިން އިންވެސްޓަރުން އިންވެސްޓްކުރާ ނިސްބަތް އިތުރުވުމަކީ ފޯރަމްގެ އެއްމެ ބޮޑު އެއްބޭނުންކަމުގައި މިނިސްޓަރ ވިދާޅުވިއެވެ.ޗައިނާގެ ބެެއިޖިންގައި ބޭއްވުމަށް ތައްޔާރުވަމުންދާ އިންވެސްޓާސް ފޯރަމްގެ މައިގަނޑު މަގްސަދަކީ ބޭރުގެ އިންވެސްޓްމެންޓްތަކަށް ސަރުކާރުން މަރުހަބާ ކިޔާކަމާއި، އެފަރާތްތަކަށް ރާއްޖޭގައި ފުރިހަމަ ފުރުސަތު އޮތްކަން އިންވެސްޓަރުންނަށް އަންގައި ދިނުނަށް ބާއްވާ ފޯރަމްއެއްކަމަށް އިކޮނޮމިކް މިނިސްޓަރ ވިދާޅުވިއެވެ. އަދި ގާނޫނީ ގޮތުން އިންވެސްޓަރުންނަށް ހުޅުވިފައިވާ ފުރުސަތުތަށް އެފަރާތްތަކަށް އަންގައިދީ، ސަރުކާރުގެ ފަރާތުން އެފަރާތްތަކަށް ފުރިހަމަ ރައްކާތެރިކަން ލިބިދޭނެ ކަމަގެ ޔަގީންކަން އަރުވުންކަމަށްވެސް މިނިސްޓަރ ވިދާޅުވިއެވެ.މިނިސްޓަރ ވިދާޅުވީ މި ފޯރަމްގައި ބައިވެރިވުމަށް ބޭނުންވާ ފަރާތްތަކަށް ރަޖިސްޓްރީވުމުގެ ފުރުސަތު ވަރަށް އަވަހަށް ހުޅުވާލާނެކަމަށެވެ. އެގޮތުން ސެޕްޓެމްބަރު މަހު ބެއިޖިންގގައި އޮންނަ ފޯރަމްއަކީ ރާއްޖޭގެ އަމިއްލަ ވިޔަފާރިތަކާއި ސަރުކާރު ހިއްސާވާ ކުންފުނިތައް އިތުރަށް ފުޅާކުރުމަށްޓަކައި ލިނިގެންދާ ރަނުގެ ފުރުސަތެއްކަމުގައި މިނިސްޓަރ ވިދާޅުވިއެވެ.އިކޮނޮމިކް މިނިސްޓްރީގެ ތަފާސް ހިސާބްތަކަށް ބަލާއިރު މިދިޔަ އަހަރާއި މިއަހަރުގެ މިހާތަނަށް އެކެއް ޕޮއިންޓް އަށެއް ބިލިއަން ޑޮލަރުގެ ބޭރުގެ އިންވެސްޓްމެންޓްތަކަށް ހުއްދަދެވިފައިވެއެވެ. އަދި މިއަހަރުގެ މިހާތަނަށް ހަސަތޭކަ މިލިއަން ޑޮލަރާއި ގާތްކުރާ އަދަދަކަށް ފޮރިން އިންވެސްޓްމެންޓަށް ވަނީ ހުއްދަދެވިފައެވެ. މި އިންވެސްޓްމެންޓްތައް އައިސްފައިވަނީ މެދު އިރުމައްޗާ ދެކުނު އޭޝިޔާ އަދި ޗައިނާގެ ކުންފުނިތަކުންކަމަށް އިކޮނޮމިކް މިނިސްޓްރީން ވިދާޅުވެއެވެ.ޗައިނާގައި އިންވެސްޓްމަންޓް ފޯރަމެއް ބާއްވާއިރު، ޗައިނާގެ ހޮންގްކޮންގ ގައި އާއި ދުބާއީގައި އިންވެސްޓްމަންޓް ސިމްޕޯޒިއަމްތަކެއް ނުވަތަ ފޯރަމްތަކެއް ބާއްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވަނީ ވިދާޅުވެފައެވެ.މިދިޔައަހަރުގެ އޭޕްރީލް މަހު ސިންގަޕޫރުގައި ބޭއްވި އިންވެސްޓްމެންޓް ފޯރަމުގައި މުހިންމު 5 މަޝްރޫއެއް ލޯންޗްކޮށްފައިވެއެވެ. އަދި މި މަޝްރޫއުތަކަށް ގިނަ އަދަދެއްގެ އިންވެސްޓަރުން ޝައުގުވެރިކަން ފާޅުކޮށްފައިވެއެވެ.