އިންޑިއާގެ ކެރެލާއަށް ބޯކޮށް ވާރޭވެހެމުންދާތީ، ފެންބޮޑުވުންފަދަ ޙާދިސާތައް ހިނގާފާނެކަމުގެ ބިރު އޮތުމުން އެސަރަޙައްދުގައި ދިރިއުޅޭ ދިވެހިން ރައްކާތެރިކަމުގެ ފިޔަވަޅުތައް އެޅުމަށް ތިރުވަނަންތަޕޫރަމްގައި ހުންނަ ދިވެހިރާއްޖޭގެ ކޮންސިއުލޭޓުން އިލްތިމާސްކޮށްފިއެވެ.
އިންޑިއާގެ ބައެއް ސަރަހައްދުތަކަށް މޫސުން ގޯސްވެ، ބޯކޮށް ވާރޭވެހުމުގެ ސަބަބުން ކެރެލާއިން އެކަނިވެސް 9 ސަރަހައްދަކަށް، އެޤައުމުގެ ސަރުކާރުން ވަނީ ރެޑް އެލާޓްނެރެފައެވެ. އަދި މިމަހުގެ 11ވަނަ ދުވަހުގެ ނިޔަލަށް ކޮޗިން އެއަރޕޯޓުވެސް ބަންދުކުރުމަށް ނިންމާފައިވާއިރު، ސްކޫލްތަކުގެ ކިޔެވުންވެސްވަނީ ވަގުތީގޮތުން މެދުކަނޑާލާފައެވެ.
ކެރެލާއަށް ކުރަމުންދާ ވިއްސާރަގައި ފެންބޮޑުވުމާއި ކޯރުތައް ބަންޑުންވުމާއި ބިންގަނޑު ކަނޑައިގެންދިއުން ފަދަ ޙާދިސާތަކުގައި މިހާތަނަށް 20 މީހަކު މަރުވެފައިވާކަމަށް އިންޑިއާގެ ބައެއް މީޑިއާތަކުން ވަނީ ރިޕޯޓުކޮށްފައެވެ.
މިކަމާގުޅިގެން ރައްކާތެރިކަމުގެ ފިޔަވަޅު އެޅުމަށް އެސަރަޙައްދުގައި ދިރިއުޅޭ ދިވެހިންނަށް ދިވެހިރާއްޖޭގެ ކޮންސިއުލޭޓުން އިލްތިމާސްކޮށްފައިވާއިރު، ދިވެހިންގެ ޙާލަތު ވަރަށްގާތުން ބަލަމުންދާކަމަށް ދިވެހި ކޮންސިއުލޭޓުން ވިދާޅުވެއެވެ. އަދި އެއްވެސް އެހީތެރިކަމެއް ބޭނުންވާނަމަ ލަސްނުކޮށް، ކޮންސިއުލޭޓްގެ ހޮޓްލައިން ނަންބަރަށް ގުޅުވުމަށްވެސް ދިވެހިންގެ ފަރާތުން އިލްތިމާސްކޮށްފައިވެއެވެ.