ސުޝްމާ ސުވަރާޖަކީ ރާއްޖެއާއި އިންޑިއާގެ ގުޅުން އައު ހަރުފަތަކަށް ގެނެސްދެއްވި މޭސްތިރި - ޝާހިދު
އިންޑިއާގެ ކުރީގެ އެކްސްޓަރނަލް އެފެއާޒް މިނިސްޓަރ ސުޝްމާ ސުވަރާޖަކީ ރާއްޖެއާއި އިންޑިއާގެ ގުޅުން އައު ހަރުފަތަކަށް ގެނެސްދެއްވި އެންމެ މުހިއްމު މޭސްތިރިކަމަށް ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
އިންޑިޔާގެ ކުރީގެ އެކްސްޓަރނަލް އެފެއާޒް މިނިސްޓަރ ސުޝްމާ ސްވަރާޖް އަވަހާރަވުމާގުޅިގެން ފޮރިން މިނިސްޓަރ ޢަބްދުﷲ ޝާހިދު ވަނީ އެކަމަނާއަކީ ޑިޕްލޮމެސީގެ ފުރިހަމަ ނަމޫނާއެއްކަމަށް ސިފަކުރައްވައި ހިތާމަ ފާޅުކުރައްވާފައެވެ. އަދި އެކަމަނާ ހަވާހަރަވި ޚަބަރު އެއްސެވީ ފުން ހިތާމައާއެކުކަމަށް ވިދާޅުވެފައިވެއެވެ. އަދި މިހިތާމަވެރި ދަނޑިވަޅުގައި އެކަމަނާގެ އާއިލާއަށާއި، އިންޑިއާއަށް، ދިވެހި ސަރުކާރުގެ ފަރާތުން ތައުޒިޔާ ވިދާޅުވެފައިވެއެވެ.
އުމުރުފުޅުން 67 އަހަރުގެ ސުޝްމާ އަވަހާރަވީ އާލާސްކަންފުޅަކަށް ފަރުވާ ހޯއްދަވަމުން ދަނިކޮށް ހާޓްއެޓޭކެއް ޖެހިވަޑައިގެނެވެ. އެކަމަނާގެ އެކްސްޓަރނަލް އެފެއަރޒް މިނިސްޓަރުގެ މަޤާމުގައި ރާއްޖެއާއި އިންޑިއާގެ ގުޅުން އިތުރަށް ބަދަހިކުރައްވުމަށް ގިނަގުނަ މަސައްކަތްޕުޅުތަކެއް ކުރައްވާފައިވާއިރު، އެކަމަނާ ދެ ފަހަރެއްގެ މަތިން ރާއްޖެއަށް ޒިޔާރަތްކުރައްވާފައިވެއެވެ.