މާލޭ ސަރަޙައްދުގައި ޓެކްސީ ޚިދުމަތް ދިނުމަށް ސަރުކާރުން ކަނޑައެޅި އަގުތަކާމެދު އެއްވެސް މައްސަލައެއްނެތްކަމަށާ، ނަމަވެސް މިހާތަނަށްވެސް ޓެކްސީ މީޓަރު ތަޢާރަފުނުކުރެވުން އެއީ ކަންބޮޑުވާކަމެއްކަމަށް ދިވެހި ޑްރައިވަރުންގެ އެސޯސިއޭޝަންގެ ރައީސް ޢަބްދުﷲ އިބްރާހީމް ވިދާޅުވެއްޖެއެވެ.
ދިވެހި ޑްރައިވަރުންގެ އެސޯސިއޭޝަންގެ ފަރާތުން ނޫސްވެރިންނާއި ބައްދަލުކުރައްވާ ވާހަކަދައްކަވަމުން ދިވެހި ޑްރައިވަރުންގެ އެސޯސިއޭޝަންގެ ރައީސް ޢަބްދުﷲ އިބްރާހީމް ވިދާޅުވީ، މާލޭ ސަރަހައްދުގައި ޓެކްސީ ފެއަރގެ ގޮތުގައި ޓްރާންސްޕޯޓް މިނިސްޓްރީން ކަނޑައެޅުއްވި އަގުތަކަށް އެ އެސޯސިއޭޝަނުން ފުރިހަމައަށް މަރުޙަބާ ކިޔާކަމަށެވެ. އަދި އެ އަގުތަކުގައި ޚިދުމަތް ދިނުމާމެދު އެއްވެސް ކަންބޮޑުވުމެއް ނެތްކަމަށާއި، ޓެކްސީ ޑްރައިވަރުންނާއި ސެންޓަރުތަކުގެ މައިގަނޑު ކަންބޮޑުވުމަކީ ޓެކްސީ މީޓަރުތައް މިއަދާ ހަމައަށްވެސް ތަޢާރަފުނުކުރެވުން ކަމަށެވެ.
ޢަބްދުﷲ އިބްރާހީމް ވިދާޅުވީ، ޓެކްސީ މީޓަރ ތަޢާރަފުކޮށް، އެހަރުކުރުމަށް ޓްރާންސްޕޯޓް މިނިސްޓްރީން ވަކި މުއްދަތެއް ދެއްވައިފިނަމަ ސެންޓަރުތަކުން ތިބީ އަމިއްލަ ޚަރަދުގައިވެސް މީޓަރުތައް ހަރުކުރުމަށް ތައްޔާރަށް ކަމަށެވެ. ނަމަވެސް މީޓަރު ސިސްޓަމް ތަޢާރަފުނުކޮށް ޓެކްސީ ޑްރައިވަރުންނާއި ސެންޓަރުތަކުގެ މާބޮޑު މަޝްވަރާއަކާ ނުލާ ވަކި އަގުތަކެއް ކަނޑައެޅުން އެއީ ކަންބޮޑުވާކަމެއްކަމަށް އޭނާ ވިދާޅުވިއެވެ.
ނޫސްވެރިންނާ ވާހަކަދެއްކި ބައެއް ޓެކްސީ ސެންޓަރުތަކުން ވަނީ، ޓްރާންސްޕޯޓް މިނިސްޓްރީން ކަނޑައަޅުއްވާފައިވާ އަގުތަކުގެ ބަދަލުގައި، އަމިއްލަ އަގުތަކެއްގައި ޚިދުމަތްދޭނެކަމަށްބުނެ ސޯޝަލް މީޑިއާގައި ދައުރުވަމުންދަނީ ހަޤީޤަތާ ޚިލާފު ލިޔުންތަކެއްކަމަށާ، މިނިސްޓްރީން ކަނޑައަޅާފައިވާ އަގުތަކުގައި މާދަމާއިން ފެށިގެންވެސް ޚިދުމަތް ދިނުމަށް ތައްޔާރަށް ތިބިކަމަށެވެ. އަދި އެޕްލިކޭޝަން ތަޢާރަފުކުރުމާމެދުވެސް އެފަރާތްތަކުގެ އެއްވެސް ކަންބޮޑުވުމެއް ނެތްކަމަށް ނޫސްވެރިންނާއި ވާހަކަދެއްކި ބައެއް ސެންޓަރުތަކުގެ ވެރިން ފާހަގަކޮށްފައިވެއެވެ. ހަމައެހެންމެ ޓެކްސީ ދަތުރުތައް ހުއްޓާލައި ހަޅުތާލުކުރަން އުޅޭކަމަށްބުނެ ދެކެވޭ ވާހަކަތައްވެސް އެފަރާތްތަކުން ވަނީ ދޮގުކޮށްފައެވެ.
ޓެކްސީ ޚިދުމަތްދެވޭނެ އަގުތައް ކަނޑައެޅުމުގައި ޓެކްސީ ޑްރައިވަރުންނާއި، ސެންޓަރުތަކުގެ ބަސް ހޯދާފައިނުވާތީ، ދިވެހި ޑްރައިވަރުންގެ އެސޯސިއޭޝަންގެ ފަރާތުން ސިވިލް ކޯޓަށް ވަނީ މައްސަލައެއްވެސް ހުށަހަޅާފައެވެ. ޓެކްސީ ޑްރައިވަރުންގެ ވާހަކަތައް މިގޮތަށް ހުރިއިރު، ޓްރާންސްޕޯޓް މިނިސްޓްރީން ވިދާޅުވެފައިވަނީ އަގުތައް ކަނޑައަޅާފައިވަނީ ވަރަށް ގިނަ ދިރާސާތަކަކާއި މަޝްވަރާތަކެއް ކުރުމަށްފަހުކަމަށެވެ. އަދި އަލަށް ކަނޑައަޅާފައިވާ އަގުތަކުގައި ޚިދުމަތްދީގެން، ޓެކްސީ ޑްރައިވަރުންނަށް އެއްވެސް ގެއްލުމެއްވެދާނެކަމަށް ނުބެލެވޭކަމަށްވެސް އެ މިނިސްޓްރީން ވިދާޅުވެއެވެ. މާލޭ ސަރަޙައްދުތަކުގައި ޓެކްސީ ޚިދުމަތް ދިނުމަށް ޓްރާންސްޕޯޓް މިނިސްޓްރީން ކަނޑައަޅާފައިވާ އަގުތަކަށް މާދަމާއިން ފެށިގެން ޢަމަލުކުރާނެއެވެ.