"އަންވީލިންގ ވިޜަންސް 2019"ގެ ނަމުގައި ކޮންޓެމްޕޮރަރީ އާޓް އެގްޒިބިޝަން ހުޅުވައިފިއެވެ.
މި އާޓް އެގްޒިބިޝަން ރަސްމީކޮށް ހުޅުއްވައިދެއްވީ މިނިސްޓަރ އޮފް އެޑިއުކޭޝަން ޑރ.ޢާއިޝަތު ޢަލީއެވެ. މިއެގްޒިބިޝަން ހުޅުއްވައިދެއްވުމަށްފަހު އެޑިއުކޭޝަން މިނިސްޓަރވަނީ މިއެގްޒިބިޝަންގައި ބައިވެރިވެފައިވާ 30 އާޓިސްޓެއްގެ މަސައްކަތް ދައްކުވައިދޭ ޚާއްސަ ކެޓެލޮގެއްވެސް ނެރެދެއްވާފައެވެ.
އެގްޒިބިޝަން ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޗް ޔުމްނާ މައުމޫން ވަނީ އާޓްގެ ދާއިރާއަކީ މީގެކުރިން ވަރަށް ބޮޑަށް އަޅާނުލައި ދޫކޮށްލެވިފައިވާ ދާއިރާއެއްކަން ފާހަގަކުރައްވައި މިސަރުކާރުން އެކަން ބަދަލުކުރައްވާނެކަމަށް ވިދާޅުވެފައެވެ. އަދި ތަޢުލީމީ ދާއިރާގެ ތެރެއިންވެސް އާޓިސްޓުންގެ ހުނަރުތައް މިހާރަށްވުރެ ފުޅާކުރަންޖެހޭކަމަށް މިނިސްޓަރ ޔުމްނާ ވިދާޅުވިއެވެ.
މިނިސްޓަރ ޔުމްނާ ވިދާޅުވީ، ރަނގަޅު ފެންވަރެއްގެ އާޓް ގެލެރީއެއް އޮތުމަކީ މުހިއްމުކަމެއްކަމަށް ޤަބޫލުފުޅުކުރައްވާކަމަށާ، އާޓްގެލެރީ މިހާރަށްވުރެ ހަރުދަނާކުރުމަށް މަސައްކަތް ކުރައްވައި ފަންނުވެރިކަމުގެ ދާއިރާ ކުރިއެރުވުމަށް ގިނަ މަސައްކަތްތަކެއް ކުރައްވާނެކަމަށެވެ.
މި ރަސްމިއްޔާތުގައި ކުރެހުމުގެ ދާއިރާގައި ފާހަގަކޮށްލެވޭ ޒުވާނުންގެ އަގުވަޒަންކުރުމުގެ ގޮތުންދޭ "މޯސްޓް ވައިބްރަންޓް އާޓިސްޓް އެވޯޑް" 3 ފަރާތަކަށް ވަނީ ދީފައެވެ.
ނެޝެނަލް އާޓް ގެލެރީގައި ކުރިއަށްދާ "އަންވީލިންގ ވިޜަންސް 20191" އަކީ ނެޝެނަލް ސެންޓަރ ފޯ ދަ އާޓްސް، އެން.ސީ.އޭއާއި މޯލްޑިވިއަން އާޓިސްޓް ކޮމިއުނިޓީ (މެކް)ގެ ނަމުގައި ޙަރަކާތްތެރިވާ އަމިއްލަ ޖަމްޢިއްޔާއަކާއި ގުޅިގެން ކުރިއަށްގެންދާ އެގްޒިބިޝަނެކެވެ. މިއެގްޒިބިޝަންގައި އާޓްގެ ދާއިރާގައި ރާއްޖޭގައި ޙަރަކާތްތެރިވާ 55 ޒުވާނެއްގެ ތަފާތު މަސައްކަތްތައް ވަނީ ދައްކުވާދީފައެވެ. މިއެގްޒިބިޝަން ކުރިއަށްދާނީ މިމަހުގެ 3 އިން ފެށިގެން 7 ގެ ނިޔަލަށެވެ.
"މެކް" އަކީ އާޓްގެ ދާއިރާއިން ކުރިއަށްދާން ބޭނުންވާ ވަކިވަކި ފަރުދުންނަށް އެމީހުންގެ މަސައްކަތްތައް އާއްމުންނަށް ދައްކައިދޭނެ ޕްލެޓްފޯމެއް ޤާއިމުކޮށްދީ، މިދާއިރާއިން ކުރިއަށްދާން ބޭނުންވާ ފަރާތްތަކަށް ހިތްވަރު ދިނުމުގެ ގޮތުން 2016 ވަނަ އަހަރުން ފެށިގެން ހަރަކާތްތެރިވަމުންދާ ޖަމްޢިއްޔާއެކެވެ.