ދިރާގުން ރާއްޖެއަށް 5ޖީ ތައާރަފްކޮށްފިއެވެ. މި ޙިދުމަތް ފަށްޓަވައިދެއްވީ ދިރާގު ހެޑް އޮފީހުގައި ބޭއްވި ރަސްމިއްޔާތެއްގައި އެކުންފުނީގެ ޗެއާޕާސަން އިސްމާޢީލް ވަހީދާއި ސީއީއޯ އަދި އެމްޑީ އިސްމާއިލް ރަޝީދެވެ.
ދިރާގު 5ޖީ ޚިދުމަތް އަދި ލިބޭނީ ރާއްޖޭގެ އާބަދީ އެންމެ ބޮޑު 3 ސަރަޙައްދަށްކަމަށް ދިރާގުން ވިދާޅުވެއެވެ. އޭގެތެރޭގައި މާލެ، ވިލިމާލެ، ހުޅުމާލެ އަދި އެއަރޕޯޓްގެ ބައެއް ސަރަހައްދުތަކާއި، އައްޑޫ، ހިތަދޫގެ ބައެއް ސަރަހައްދުތަކުގެ އިތުރުން ހދ.ކުޅުދުއްފުށީގެ ބައެއް ސަރަހައްދުތައް ހިމެނެއެވެ.
މި ސަރަޙައްދުތަކުގައި 5ޖީ ސަޕޯޓްކުރާ ޑިވައިސް ގެންގުޅުއްވާ ކަސްޓަމަރުންނަށް އެއްވެސް އިތުރު ޑޭޓާ ޗާރޖަކާނުލައި މިހާރު ގެންގުޅުއްވާ ސިމް މެދުވެރިކޮށް މި ޚިދުމަތް ބޭނުންކުރެވޭނެކަމަށް އެ ކުންފުނިން ވިދާޅުވެއެވެ.
5ޖީ ޚިދުމަތަކީ 4ޖީ ޚިދުމަތުގެ ސްޕީޑަށްވުރެ ދިހަ ގުނަ އަވަސް ޚިދުމަތެކެވެ. މީގެ ސަބަބުން ކަސްޓަމަރުންގެ މޮބައިލް ކަނެކްޓިވިޓީގެ ތަޖުރިބާ މިހާރަށް ވުރެ ފުރިހަމަވެ، ކަސްޓަމަރުންގެ ދިރިއުޅުމަށް އިތުރު ލުއިފަސޭހަތަކެއް ލިބިގެންދާނެއެވެ.
ދިރާގުން ރާއްޖޭގައި 5ޖީ ތަޢާރަފުކުރުމާއެކު ދިވެހި ރާއްޖެ ވެގެން ދިޔައީ ސައުތް އޭޝިއާ ބައްރުގައި މި ޚިދުމަތް ލިބެންފެށި ފުރަތަމަ ޤައުމަށްކަމަށް ދިރާގުން ވިދާޅުވެއެވެ.