ޙިދުމަތްތައް ބޭނުންކުރުމުގައި ދަތިތަކެއް އުޅެނީ ބިޒްނަސް ސަޕޯޓް ސިސްޓަމް އަޕްގްރޭޑް ކުރާތީ - ދިރާގު
ދިރާގުގެ ބައެއް ޙިދުމަތްތައް ބޭނުންކުރުމުގައި ދަތިތަކެއް ދިމާވަމުންދަނީ ބިޒްނަސް ސަޕޯޓް ސިސްޓަމް އަޕްގްރޭޑް ކުރުމުގެ މަސައްކަތް ކުރިއަށްދާތީކަމަށް އެ ކުންފުނިން ބުނެފިއެވެ.
ދިރާގުން ފޯރުކޮށްދޭ ބައެއް ޙިދުމަތްތައް މެދުކެނޑި ލަސްތަކެއް ދިމާވަމުން އަންނާތީ ކަސްޓަމަރުން އަންނަނީ އެކަމުގެ ޝަކުވާ ކުރަމުންނެވެ. މިކަމާއި ގުޅިގެން ދިރާގުން ނެރުނު ނޫސްބަޔާނެއްގައި ބުނެފައިވަނީ، ދިރާގުން ފޯރުކޮށްދެމުން އަންނަ ޚިދުމަތްތަކުގެ ފެންވަރު ރަނގަޅުކޮށް އިތުރަށް ފުރިހަމަ ކުރުމުގެ ގޮތުން ދިރާގުގެ ބިޒްނަސް ސަޕޯޓް ސިސްޓަމް އަޕްގްރޭޑްގެ ދެވަނަ މަރުހަލާގެ މުހިންމު މަސައްކަތްތަކެއް ކުރިއަށްދާކަމަށެވެ.
މި އަޕްގްރޭޑް މަސައްކަތަކީ ވަރަށް ގިނަ ޓެކްނިކަލް ކަންތައްތަކެއް އެކުލެވިގެންވާ އަދި ގިނަ މަރުހަލާތަކަކަށް ބެހިގެންދާނެ މަސައްކަތްތަކެއްކަމަށެވެ. އެހެންކަމުން މި ދުވަސްކޮޅު ކަސްޓަމަރުންނަށް ބައެއް ޚިދުމަތްތައް ބޭނުންކުރުމުގައި ދިމާވަމުންދާ ދަތިތަކަކީ މި އަޕްގްރޭޑް މަސައްކަތާ ގުޅިގެން ދިވާމަމުންދާ ދަތިތަކެއްކަމަށް އެ ކުންފުނިން ބުނެއެވެ.
ދަތިތައް ކުރިމަތިވެދާނެ ޙިދުމަތްތަކުގެ ތެރޭގައި ރީލޯޑް އަދި ރީޗަރޖް އާއި ގުޅޭ ޚިދުމަތްތަކާއި، މޮބައިލް އެޑް އޮންސް އަދި މޮބައިލް ޕެކޭޖް ބަދަލުކުރުމާއި، ދިރާގު ވެބްސައިޓްގައިވާ "މައި އެކައުންޓް" އަދި ދިރާގު މޮބައިލް އެޕް ބޭނުންކުރުމުގައި ދަތިތަކެއް ދިމާވެދާނެކަމަށް އެ ކުންފުނިން ބުނެއެވެ. އަދި މަމެން މޯބައިލް އެޕާއި، ދިރާގު ކަސްޓަމަރ ސާރވިސް ސެންޓަރ ތައް އަދި ދިރާގު ޕާރޓްނާޝޮޕް ތަކުން އައު މޮބައިލް ޚިދުމަތް ހޯދުމާއި މޮބައިލް ބިލަށް ފައިސާ ދެއްކުމުގެ އިތުރުން މޮބައިލް ނަންބަރ ޕޯރޓަބިލިޓީގެ ޙިދުމަތް ހޯދުމުގައި ދަތިތަކެއް ދިމާވެދާނެކަމަށް ދިރާގުން ބުނެއެވެ.
ނަމަވެސް ކަސްޓަމަރުންނަށް ޑޭޓާ، އެސްއެމްއެސް އަދި ވޮއިސް ކޯލްގެ ޚިދުމަތައް ބޭނުން ކުރެވެނެކަމަށް ދިރާގުން ބުނެއެވެ. ކުރިއަށް އޮތް ދުވަސްތަކުގައި ވެސް މި މަސައްކަތް ކުރިއަށް ގެންދާ ވަގުތުތަކުގައި ކަސްޓަމަރުންނަށް ބައެއް ޚިދުމަތްތަށް ބޭނުން ކުރުމުގައި ތަދިތަކަކާއި ކުރިމަތިލާން ޖެހުމަކީ އެކަށީގެންވާ ކަމެއްކަމަށް ދިރާގުން ބުނެއެވެ.