ހިއުމަން ރިސޯސްގެ ދާއިރާއިން އަގު ވަޒަންކުރުމަށްދޭ "މޯލްޑިވްސް އެޗްއާރު އެވޯޑްސް" އަށް ނަން ހުށަހެޅުމުގެ ފުރުސަތު ހުޅުވާލައިފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން މި އިވެންޓް އިންތިޒާމްކުރާ އެޗްއާރު މޯލްޑިވްސްއިން ބުނީ އެޗްއާރު އެވޯޑަށް ނަން ހުށަހެޅުމުގެ ފުރުސަތު މިހާރު ހުޅުވާލާފައިވާކަމަށެވެ. އެވޯޑަށް ނަން ހުށައެޅުމުގެ ފުރުސަތު ހުޅުވާލާފައިވަނީ މިމަހުގެ 10 ވަނަ ދުވަހުއެވެ. އަދި ނަންހުށައެޅުމުގެ ފުރުސަތު ބަންދުވާނީ އަންނަ މަހުގެ 10 ވަނަ ދުވަހުއެވެ.
އެޗްއާރު ދާއިރާއިންދޭ މި އެވޯޑް ކުންފުނިތަކަށާއި ވަކި ފަރުދުންނަށްވެސް ދިނުމަށް ވަނީ ހަމަޖެހިފައެވެ. އެގޮތުން ކުންފުނިތަކުގެ ބައިން ޖުމްލަ 9 އެވޯޑެއް ދިނުމަށް ވަނީ ހަމަޖެހިފައެވެ. އަދި ވަކި ފަރުދުންގެ ބައިން 6 އެވޯޑެއް ދިނުމަށް ވަނީ ހަމަޖެހިފައެވެ.
އެޗްއާރު އެވޯޑް ދެނީ ޖަޖުންގެ މާރކްސްއިން އެންމެ މަތީ މާކްސް ލިބޭ ފަރާތްތަކަށެވެ. މިއަހަރުގެ ޖަޖިންގ ޕެނަލްގައި ހިމެނެނީ 4 ފަރާތެކެވެ. އޭގެތެރޭގައި މޯލްޑިވްސް ނެޝަނަލް ޔުނިވަރސިޓީގެ ވައިސް ޗާންސެލަރ އައިޝަތު ޝާހީންއާއި، ޕޯކަސް އެޑިޔުކޭޝަން ސެންޓަރުގެ ޗީޕް އޮޕަރޭޓިންގ އޮފިސަރ ޕަލަންލިޔައްޕަ މުތުރަމަންއާއި، ދިރާގުގެ ޑިރެކްޓަރ ކޯޕަރޭޓް ސާރވިސް އާތިފާ އަލީގެ އިތުރުން އެވިޑް ކޮލެޖްގެ ވައިސް ރެކްޓަރ ޑރ. އިބްރާހިމް ލަތީފެވެ.
މިއީ "އެޗްއާރު އެވޯޑްސް" ބާއްވާ 2 ވަނަ ފަހަރެވެ.
އެޗް.އާރު މޯލްޑިވްސްއިން ވަނީ މީގެ ކުރިން "ފިފްޓީ މޯސްޓް ޓެލެންޓެޑް ލީޑާސް އެވްޑްސް" ގެ ނަމުގައިވެސް އެވޯޑެއް ދީފައެވެ.