ދިރާގުން ކެއަރ ސޮސައިޓީގެ ވޮކޭޝަނަލް ޓްރެއިނިންގ ޕްރޮގްރާމް މިއަހަރު ކުރިއަށް ގެންދިޔުމަށްޓަކައި އެހީތެރިކަން ފޯރުކޮށްދީފިއެވެ.
ކެއަރ ސޮސައިޓީން ކުރިއަށް ގެންދާ ވޮކޭޝަނަލް ޓްރެއިނިންގ ޕްރޮގްރާމަކީ ނުކުޅެދުންތެރިކަން ހުންނަ ކުދިންނަށް ތަފާތު މަސައްކަތްތައް ދަސްކޮށްދިނުމުގެ ގޮތުން އުފެއްދި ޕްރޮގްރާމެކެވެ. މި ޕްރޮގްރާމްގެ އެންމެ ބޮޑު ބޭނުމަކީ އެކުދިން ބޮޑުވެގެން އަންނައިރު އަމިއްލައަށް ކޮންމެވެސް ކަހަލަ އާމްދަނީއެއް ހޯދާނެ ގޮތްތަކެއް ހޯދައިދިނުމުގެ މަގު ފަހިކޮށްދިނުންކަމަށް ދިރާގުން ބުނެއެވެ. މި ސެންޓަރު މެދުވެރިކޮށް، ކޮމްޕިއުޓަރ ބޭނުންކުރުމުގެ ހުނަރާއި، ފެހުމުގެ އިތުރުން ޑިޒައިންގ ފަދަ ތަފާތު ހުނަރުތައް ދަސްކޮށްދެއެވެ.
ކެއަރ ސޮސައިޓީގެ އެގްޒެކްޓިވް ޑިރެކްޓަރ ނައުޝަން މުހައިމިން ވިދާޅުވީ މިބާވަތުގެ ޕްރޮގްރާމުތައް ކުރިއަށްގެންދިއުމަށްޓަކައި ދިރާގު ފަދަ ކުންފުނި ތަކުގެ އެހީ ވަރަށް މުހިންމު ކަމަށެވެ. މި ގޮތަށް އެންޖީއޯ ތަކަށް އެހީތެރިކަން ލިބޭ ކަމުގައި ވާނަމަ، ދެމެހެއްޓެނެވި ގޮތަކަށް މި ފަދަ ޕްރޮގުރާމްތައް ކުރިއަށް ގެންދިޔުމުގެ މަގުފަހި ވެގެންދާނެކަމަށް އޭނާ ވިދާޅުވިއެވެ. ކެއަރ ސޮސައިޓީގެ ވޮކޭޝަނަލް ޓްރެއިނިންގ ކްލާސްތައް ދެމެހެއްޓެނިވި ގޮތެއްގައި ފާއިތުވެދިޔަ 3 އަހަރު ކުރިއަށް ގެންދެވިފައިވާ އެއް ސަބަބަކީ ދިރާގުން ވެދިން އެހީތެރިކަންކަމަށް ނައުޝަން ވިދާޅުވިއެވެ.
މީގެ ކުރިންވެސް ކެއަރ ސޮސައިޓީގައި އާލީ އިންޓަވެންޝަން ކްލާހެއް ފެއްޓުމަށް ދިރާގުން އެހީތެރިކަން ފޯރުކޮށްދީފައިވެއެވެ. އަދި މޯލްޑިވްސް އޯޓިޒަމް އެސޯސިއޭޝަން، މޯލްޑިވްސް އެސޯސިއޭޝަން ފޮ ޕަރސަންސް ވިތް ޑިސްއެބިލިޓީސް، އަދި ބިއުޓިފުލް އައިޒް ޑައުން ސިންޑްރޯމް އެސޯސިއޭޝަން ފަދަ އެންޖީއޯތަކުގެ ތަފާތު ޕްރޮގްރާމްތަކަށް ދިރާގުން އެއްބާރުލުންދީފައިވެއެވެ.