މޯލްޑިވްސް ބްރޯޑްކާސްޓިންގ ކޮމިޝަން، އެމްބީސީގެ މެންބަރުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ވަކިވަކިން ޙާޒިރުކޮށް އެ ކޮމިޝަނާ ގުޅުންހުރި މައްސަލަތަކެއް ބަލަން ފަށައިފިއެވެ. މިނިވަން މުއައްސަސާތަކުގެ ކޮމިޓީގެ އިއްޔެގެ ބައްދަލުވުމުގައިވަނީ ބްރޯޑްކޮމްގެ މެންބަރުން ކޮމިޓީއަށް މިއަދު ޙާޒިރުކޮށް ވަކިވަކިން މެންބަރުންނާއި ސުވާލުކުރަން ނިންމާފައެވެ. އަދި އެކަމަށްޓަކައި ވަނީ ކުޑަ ކޮމިޓީއެއްވެސް ވަނީ އެކުލަވާލާފައެވެ.
މިއަދު ވަނީ ބްރޯޑްކޮމްގެ މެންބަރުން މިނިވަން މުއައްސަސާތަކުގެ ކުޑަ ކޮމިޓީއަށް ޙާޒިރުކޮށްފައެވެ. ނަމަވެސް މެންބަރުންނާއި ގުޅުން ހުރި ވަރަށް ޙައްސާސް މައްސަލަތަކެއް ބައްލަވާތީކަމަށް ބުނެ ކޮމިޓީގެ ބައްދަލުވުން ވަނީ މީޑިއާއަށް ސިއްރުކޮށްފައެވެ. ކޮމިޓީއަށް އެންމެ ފުރަތަމަ ޙާޒިރުކޮށްފައިވަނީ ބްރޯޑްކާސްޓިންގ ކޮމިޝަންގެ ރައީސް މުޙައްމަދު ޝަހީބުއެވެ.
މިނިވަން މުއައްސަސާތަކަށް ބްރޯޑްކާސްޓިންގ ކޮމިޝަންގެ މެންބަރުން ޙާޒިރުކޮށް މިދިޔަ މަހުގެ 19 ވަނަ ދުވަހު ބޭއްވި ބައްދަލުވުމުގައިވަނީ އެކޮމިޝަންގެ ކުރީގެ ނާއިބު ރައީސް އިސްމާޢީލް ސޮފްވާނާއި މިހާރުގެ ނާއިބު ރައީސް ފާޠިމަތު ޒައިނާ އެކޮމިޝަންގެ މެންބަރުކަމުން ވަކިކުރުމަށް ފާސްކޮށް މަޖިލީހުގެ ތަޅުމަށް ހުށައަޅަން ނިންމާފައެވެ. ނަމަވެސް ކޮމިޓީން މަޖިލީހުގެ ތަޅުމަށް އެ މައްސަލަ ހުށައެޅުމުގެ ކުރިން ސޮފްވާން ވަނީ ކޮމިޝަންގެ މެންބަރުކަމުން އިސްތިއުފާދެއްވާފައެވެ. އަދި އޭގެ ފަހުން އެކޮމިޝަންގެ މެންބަރު ޙަސަން ނަބާހުވެސް ވަނީ ކޮމިޝަންގެ މެންބަރުކަމުން އިސްތިއުފާދެއްވާފައެވެ.
އެ ބައްދަލުވުމުގައި އެކޮމިޝަންގެ ރައީސް މުޙައްމަދު ޝާހީބު ދެއްކެވި ވާހަކަފުޅުތަކާއި ގުޅިގެން އެކޮމިޝަނަށް އަމާޒުވެފައިވާ ފާޑުކިއުންތައް ވަނީ އިތުރުވެފައެވެ.. ޝަހީބް ވަނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ވަކި ޓީވީ ޗެނަލެއް ބަންދުކުރުމަށާއި، ވަކި ޗެނަލްތަކަކަށް އަމާޒުކޮށް ޖޫރިމަނާކުރުކަމަށް ނިންމިކަމަށް އިޢުތިރާފްވެވަޑައިގެންފައެވެ. އަދި އެ ކޮމިޝަނުން ނިންމާފައިވާ ނިންމުންތަކަކީ އެންމެ އިންސާފުވެރި ނިންމުންތަކެއް ނޫންކަމަށްވެސް ޝަހީބު ވިދާޅުވެފައިވެއެވެ. ނިމިދޔަ މަޖިލީހުގެ ޕީޕީއެމް މެންބަރުން ފޯނުން ގުޅުއްވާ ވަކިގޮތަކަށް ޢަމަލުކުރުމަށް އެންގިކަމަށްވެސް ބްރޯޑްކާސްޓިންގ އެކޮމިޝަންގެ މެންބަރުން އެއްބަސްވެވަޑައިގެންފައިވެއެވެ. ނަމަވެސް ޝަހީބް ވަނީ އެ ކޮމިޝަނަށް އަމާޒުވާ ފާޑުކިއުންތަކުން ދިފާޢުވެވަޑައިގަތުމުގެ ގޮތުން ކޮމިޝަނުން ނިންމި ނިންމުންތައް ނިންމީ އެނާގެ ބައިވެރިވުމެއް ނެތި މެމްބަރުންކަމަށް ވިދާޅުވެފައެވެ. މެމްބަރުން ވަނީ ޝަހީބުގެ ވާހަަކަތައް ދޮގުކޮށް އެކަމުގެ ޒިންމާ ޝަހީބުނަންގަަވަންޖެހޭނެކަމަށެވެ.
ނިމިދިޔަ ސަރުކާރުގައި ބްރޯޑްކޮމުން ވަނީ އޭރުގެ ސަރުކާރާއި ދެކޮޅު ޚަބަރުތައް ގެނެސްދިން ޓީވީތައް ބޮޑެތި އަދަދުތަކުން ޖޫރިމަނާކޮށްފައެވެ. އެހެންނަނަމަވެސް ސަރުކާރަށް ތާއީދުކޮށް ހަބަރުތައް ގެނެސްދިން ޗެނަލްތަކުން އިދިކޮޅު ފަރާތްތަކުގެ އަބުރާއި ބެހި އެތައް ހަބަރުތަކެއް ގެނެސްދިންނަމަވެސް އެ ޗެނަލަތަކަށް އެއްވެސް ފިޔަވަޅެއް އެ ކޮމިޝަނުން އަޅާފައެެއްނުވެއެވެ.