މަހާއި މަހުގެ ބާއްވަތްތަކުން ތަފާތު ވެލިއު އެޑެޑް ބާވަތްތައް އުފައްދާ މާކެޓްހޯދާ ވިއްކުމަށް ނައިފަރު ކޯޕަރޭޓިވް ސޮސައިޓީ އާއި ފިޝަރީޒް މިނިސްޓްރީއާއި ދެމެދު ސޮއިކޮށްފިއެވެ.ފިޝަރީޒް މިނިސްޓްރީ ގައި މިއަދު އޮތް ރަސްމިއްޔާތެއްގައި މި އެއްބަސްވުމުގައި ސޮއިކުރުމަށްފަހު ފިޝަރީޒް މިނިސްޓަރ ޑޮކްޓަރ މުހައްމަދު ޝައިނީ ވިދާޅުވީ މިހާރު އުފެދިފައިވާ ކޯޕަރޭޓިވް ސޮސައިޓީ ތަކުގެ މަސައްކަތް ރަނގަޅު ކަމަށާއި މިކަމަށް ރަށްރަށުން ލިބޭ ތަރުހީބު ވެސް ބޮޑުކަމަށެވެ. އެގޮތުން މިއަދު ސޮއިކުރެވިގެން ދިޔަ ނައިފަރު ކޯޕަރޭޓިވް ސޮސައިޓީން ވެސް ގިނަ އުފެއްދުންތަކެއް ބާޒާރަށް ނެރެވި، އުފައްދާ ތަކެއްޗަކީ ފެންވަރު ރަނގަޅު ކޮލިޓީ ހިފެހެއްޓިގެންދާ ތަކެއްޗަށް ވާނެކަމަށް ވިދާޅުވިއެވެ.ނައިފަރު ކޯޕަރޭޓިވް ސޮސައިޓީން މަޢުލޫމާތު ދިން ގޮތުގައި އެ ރަށުގެ ރައްޔިތުންގެ ތެރެއިން ވަރަށް ގިނަ އަންހެނުންނަކީ މިހާރުވެސް ގޭގައި ތިބެގެން މަހުގެ އުފެއްދުންތަކުން ވަރަށް ގިނަ ތަކެތި އުފައްދާ އާމްދަނީ ހޯދާބައެއް ކަމަށެވެ. އެހެން ކަމުން ކުރިއަށް އޮތް ތަނުގައި އެކަމުގެ ނަފާ ރަށުގެ ހުރިހާ ރައްޔތުންނަށް ލިބި ރަށުގެ އިޖުތިމާޢީ އަދި އުމުރާނީ އުފެއްދުންތެރިކަން އިތުރުވެގެން ދާނެކަމަށެވެ.މި ރަސްމިއްޔާތުގައި ބައިވެރިވި ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވީ މިއީ ވަރަށް ކުޑަ ދުވަސްތަކެއްގެ ތެރޭގައި އުފެދި ރަށުގެ ވަރަށް ގިނަ އަންހެން ވެރިންގެ ހިއްސާ އެކުލެވޭ ސޮސައިޓީއެއް ކަމަށެވެ. އެހެން ކަމުން މިއީ އިޤްތިޞާދީގޮތުން އަންހެނުން ބާރުވެރިކުރުވުމަށް ސަރުކާރުން ކުރަމުންދާ މަސައްކަތުގެ ނަމޫނާއެއްކަމަށް ޝިޔާމް ވިދާޅުވިއެވެ.މި އަހަރުގެ ފެބްރުއަރީ މަހު އުފެއްދި ނައިފަރު ކޯޕަރޭޓިވް ސޮސަިޓީގައި ދުއިސައްތަ ނަވާރަ މެމްބަރުން ތިބި އިރު އޭގެ ތެރޭގައި ސަތޭކަ ސާޅީސް ހަ އަންހެނުން ހިމެނެއެވެ.ކުދި ފަންތިއާ މެދުފަންތީގެ ވިޔަފާރިވެރިންނާ މަހުގެ އުފެއްދުންތަކުން އާމްދަނީހޯދާ ހަތް ކޯޕަރޭޓިވްއެއް ރާއްޖޭގައި މިހާރު ޙަރަކާތްތެރިވަމުންދާ ކަމަށް ފިޝަރީޒް މިނިސްޓްރީން މަޢްލޫމާތުދެއެވެ.