ދިވެހިރާއްޖެއަށް އަންނަ އަދި ރާއްޖެއިން ފުރާ ފަސިންޖަރުންގެ މައުލޫމާތު ދުރާލާ ފޯރުކޮށްދޭނެ ނިޒާމެއް ޤާއިމްކުރުމުގެ މަސައްކަތް މޯލްޑިވްސް ކަސްޓަމްސް ސަރވިސްއިން ފަށައިފިއެވެ. ކަސްޓަމްސް އިން މި މަސައްކަތް ފަށާފައިވަނީ ދުނިޔޭގެ ކަސްޓަމްސް ޖަމްއިއްޔާގެ "ގްލޯބަލް ޓްރެވަލްސް އެސެސްމަންޓް ސިސްޓަމް" ޖީޓާސް، ޕްރޮގްރާމްގެ ދަށުން، އެމެރިކާގެ ކަސްޓަމްސް އެންޑް ބޯޑަރ ޕްރޮޓެކްޝަން، ސީ.ބީ.ޕީގެ އެހީއާއެކުއެވެ.
އެގޮތުން މި ނިޒާމް ރާއްޖޭގައި ޤާއިމްކުރުމުގެ މަސައްކަތަށް ދުނިޔޭގެ ކަސްޓަމްސް ޖަމްއިއްޔާގެ ކަމާބެހޭ ތަޖުރިބާކާރުންގެ ޓީމެއް ވަނީ ޖޫންމަހުގެ 17 އިން 25 އަށް ރާއްޖެއަށް ޒިޔާރަތްކޮށްފައެވެ. އަދި މި ދަތުރުގެ ތެރެއިން "ޖީޓާސް" ނިޒާމް ގާއިމްކޮށް މި ނިޒާމް ބޭނުންކުރާނެގޮތުގެ ތަމްރީން ޕްރޮގްރާމެއް ކަމާގުޅޭ މުވައްސަސާތަކަށް ވަނީ ހިންގާފައެވެ. މި ތަމްރީން ޕްރޮގްރާމްގައި ކަސްޓަމްސްގެ އިތުރުން މޯލްޑިވްސް ޕޮލިސް ސަރވިސްއާއި، މޯލްޑިވްސް އިމިގްރޭޝަންއާ، މޯލްޑިވްސް ނެޝަނަލް ޑިފެންސް ފޯސްގެ އޮފިސަރުން ބައިވެރިވެފައިވެއެވެ.
ކަސްޓަމްސް އިން ބުނީ މި ނިޒާމް ގާއިމްކުރުމުގެ ފުރަތަމަ މަރުހަލާ މިހާރު ނިމިފައިވާއިރު، ބައެއް އެއަރލައިންތަކުން ފަސިންޖަރުންގެ މަޢުލޫމާތު ދުރާލާ ހިއްސާކުރަމުންދާ ކަމަށެވެ. އަދި މި މަސައްކަތް 2020 ވަނަ އަހަރު މުޅިން ނިމޭއިރު، ރާއްޖެ އަންނަ އަދި ފުރާ ހުރިހާ ފަސިންޖަރުންގެ މަޢުލޫމާތު ދުރާލާ ދައުލަތުގެ ކަމާބެހޭ މުއައްސަސާތަކަށް ލިބިގެންދާނެކަމަށް ކަސްޓަމްސް އިން ބުނެއެވެ.
މި ނިޒާމުގެ ސަބަބުން ޤައުމުގެ ސަލާމަތާއި ރައްކާތެރިކަމަށް ކުރެވޭ މަސައްކަތުގެ ތެރެއިން ކަސްޓަމްސްއިން ކުރާ މަސައްކަތުގައި ފަސިންޖަރުންގެ ފޮށިތަންމަތި ބަލާފާސްކުރުމުގެ ނިޒާމް ހަރުދަނާވެ، ހައި ރިސްކް ފަސިންޖަރުން ދުރާލާ ދެނެގަނެ، އެފަރާތްތަކަށް ޚާއްޞަ ސަމާލުކަމެއް ދީގެން ބަލާފާސްކުރުމުގެ ކަންތައްތައް ކުރިއަށްގެންދެވޭނެ ކަމަށްވެސް ކަސްޓަމްސް އިން ބުނެފައިވެއެވެ. އަދި މި ނިޒާމް ޤާއިމް ކުރުމުގެ މަސައްކަތް ފުރިހަމަ ވެގެން ދާއިރު ކަސްޓަމްސްގެ މަސައްކަތް ވަރަށް ބޮޑު ތަނުން ހަލުވިވެ، ރާއްޖޭގެ އިޤްތިޞާދީ ބޯޑަރ ބެލެހެއްޓުން އިތުރަށް ހަރުދަނާވެގެންކަމަށް ކަސްޓަމްސް ބުނެފައިވެއެވެ.