މިދިޔަ ބުރާސްފަތި ދުވަހު މާފުށީ ޖަލުގަައި ހިނގި ހަމަނުޖެހުންތަކާއި ގުޅިގެން ހޯމް މިނިސްޓްރީ އާއި ކަރެކްޝަން ސާރވިސްގެ އިސްވެރިންނާއި ހިއުމަން ރައިޓްސް ކޮމިޝަން މަޖިލީހުގެ ކޮމެޓިއަށް ޙާޒިރުކުރަން ނިންމައިފިއެވެ.
މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީއަށް އެބޭފުޅުން ޙާޒިރުކުރަން ނިންމީ މިއަދު ބޭއްވި އެ ކޮމެޓީގެ ބައްދަލުވުމުގައި ބައިވެރިވެވަޑައިގެންނެވި 6 މެމްބަރުންގެ އިއްތިފާޤުންނެވެ.
މިއަދު ބޭއްވި ކޮމިޓީގެ ބައްދަލުވުމުގައި ކޮމިޓީގައި ހިމެނިވަޑައިގަންނަވާ މެންބަރުން ވަނީ މާފުށީ ޖަލުގައި ހިނގާދިޔަ ހަމަނުޖެހުންތަކާއި، އެ ހަމަނުޖެހުންތައް ކޮންޓްރޯލް ކުރުމަށް އެކަށީގެންނުވާ ބާރުގެ ބޭނުންކުރިކަމުގެ މަޢޫލޫމާތު ލިބިފައިވާކަން ފާހަގަކުރައްވައި ކަންބޮޑުވުން ފާޅުކުރައްވާފައެވެ.
ކޮމިޓީގައި ވާހަކަފުޅު ދައްކަވަމުން މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވީ، ދައުލަތުގެ ބެލުމުގެ ދަށުގައި ތިބި ބަޔަކަށް އެއްވެސްޒާތެއްގެ އަނިޔާލިބުމަކީ ބަލައިގަނެވޭނެކަމެއް ނޫންކަމަށެވެެ.ޖަލުތަކާއި ބެހޭ ޤާނޫނޫގައިވެސް އެއީ ޓޯޗާއެއްކަމަށް ބުނެ، ނުކުރެވޭނެކަންކަން ބަޔާންކޮށްފައިވާކަމަށް އިމްތިޔާޒް ވިދާޅުވިއެވެ. އިމްތިޔާޒް ވަނީ ޖަލުގެ ހަމަނުޖެހުމާއި ގުޅިގެން ކަމާ ގުޅުންހުރި އިދާރާތަކުގެ ވެރިން ކޮމިޓީއަށް ޙާޒިރުކުރުމަށް ހުށައަޅާފައެވެ.
"އަޅުގަނޑުގެ ހުށައެޅުމަކީ މިހާތަނަށް މާފުށީ ޖަލަށް ޒިޔާރަތްކުރުމަށްފަހު އެއްވެސް ރިޕޯޓެއް ތައްޔާރުކޮށްފައިވާނަމަ އެ ރިޕޯޓެއް މި ކޮމިޓީއާއި ޙިއްސާކުރުން. ހޯމް މިނިސްޓްރީ އާއި ކަރެކްޝަނަލް ސާރވިސްގެ ރިޕޯޓް އަދި މި މައްސަލައާއި ގުޅިގެން އެޅި ފިޔަވަޅާއި، ހިއުމަންރައިޓްސް ކޮމިޝަނުން އެކުލާލި ރިޕޯޓެއް ވާނަމަ ހިއްސާކުރުން. އަދި ކޮމިޝަނަރ އޮފް ޕްރިޒަންސް އަދި ހޯމް މިނިސްޓްރީގެ އިސްބޭފުޅުންނާ ކަރެކްޝަން ސާރވިސް އިސްވެރިންނާ އެޗްއާރުސީއެމް އިސްވެރިން ކޮމިޓީއަށް ޙާޒިރުވުމަށް ދަންނަވާ ވީހާވެސް އަވަހަށް މަޢުލޫމާތު ހޯދުން." އިމްތިޔާޒް ފަހުމީ ވިދާޅުވިއެވެ.
މި ހުށައެޅުއްވުމަށް ތާޢީދުކުރައްވާފައިވަނީ ނިލަންދޫ ދާއިރާގެ މެންބަރު ޢަބްދުލް މުޙުސިން ހަމީދެވެ. އޭނާ ވިދާޅުވީ، ޖަލުތަކާ ގުޅޭގޮތުން ނެރެފައިވާ އޮޑިޓް ރިޕޯޓް ކޮމިޓީން ދިރާސާކުރަމުން އަންނައިރު، އަނެއްކާވެސް ޖަލުގައި ހަމަނުޖެހުންތަކެއް ހިނގުމަކީ ކަންބޮޑުވާންޖެހޭކަމެއްކަމަށެވެ.
"އެ ހުރިހާ އިދާރާއަކުން ތައްޔާރުކުރާ ރިޕޯޓްތައް މިތަނަށް ގެނެސް ހުރިހާ ތަޙްޤީޤޤެއްކޮށް ރައްޔިތުންނަށް ވިހާވެސް ސާފުކޮށް މަޢުލޫމާތު ހިއްސާކުރުމަކީ މުހިންމުކަމެއް." ޢަބްދުލްމުޙުސިން ޙަމީދު ވިދާޅުވިއެވެ.
މީގެ އިތުރުންވެސް ކޮމިޓީގައި ހިމެނިވަޑައިގަންނަވާ މެންބަރުންވަނީ، ޖަލުތަކުގެ ޙާލަތު އަދިވެސް ބަދަލުނުވާކަމަށާއި، މީގެ ކުރިންވެސް ޖަލުތަކުގައި ހިނގާފަދަ ޢަމަލުތައް އަދިވެސް ޖަލުތަކުގައި ހިނގާކަން ފާހަގަކުރައްވާފައެވެ. އަދި މެންބަރުންވަނީ ޖަލުތައް އޮޑިޓް ކުރުމަށްފަހު މަޖިލީހަށް ފޮނުވާފައިވާ ރިޕޯޓްގައި ފާހަގަކޮށްފައިވާ ކަންކަމާއި، މިހާރުވެސް ޖަލުގައި ހިނގަމުންދާ ކަންކަން ބަލައި އަވަސްފިޔަވަޅުތަކެއް އެޅުމުގެ މުހިންމުކަން ފާހަގަކުރައްވާފައެވެ.
އަދި ޖަލުތަކުގެ އޮޑިޓް ރިޕޯޓާމެދު މަޖިލީހުގެ ތަޅުމުން އަވަހަށް ގޮތްތަކެއް ނިންމަން ޖެހޭކަމަށްވެސް ބައެއް މެންބަރުން ވިދާޅުވިއެވެ. މެންބަރުން ވިދާޅުވީ ޖަލުގައި ހާލަތާ ނުބައްދަލު ބާރުގެ ބޭނުންކުރިކަމަށް ހޯމް މިނިސްޓްރީން ހާމަކުރުމަކީ ޖަލުތަކުގެ ކަންކަން ސިއްރުނުކޮށް މިސަރުކާރުން ހާމަކުރަމުންދާކަން އަންގައިދޭކަމެއްކަމަށްވެސް ވިދާޅުވެފައެވެ.
މިދިޔަ ބުރާސްފަތިދުވަހު މާފުށީ ޖަލުގައި ހިނގައިދިޔަ ހަމަނުޖެހުންތަކާގުޅިގެން ޖަލުގައި ތިބި ޤައިދީންނަށާއި ޖަލު ބަލަހައްޓާ އޮފިޝަލުންތަކަށްވެސް ހާނީއްކަ ވެފައިވާކަމަށް ހޯމް މިނިސްޓްރީން ވަނީ ވިދާޅުވެފައެވެ. އަދި އެމިނިސްޓްރީން އަޅަންޖެހޭ ފިޔަވަޅުތައް އަޅަމުން އަންނަކަމަށްވެސް ވަނީ ވިދާޅުވެފައެވެ.