މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީގެ ފެރީ ފްލީޓު ބޮޑުކޮށް، އަތޮޅުތެރޭގެ ފެރީ ނިޒާމު ހަރުދަނާކުރުމުގެ މަސައްކަތް ކުރަމުންދާކަމަށް އެކުންފުނިން ބުނެފިއެވެ.
ރާއްޖޭގެ ފެރީގެ ޚިދުމަތް އެންމެ ފުޅާދާއިރާއެއްގައި ފޯރުކޮށްދޭ އެއް ކުންފުންޏަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީއެވެ. އެކުންފުނިން ގްރޭޓަރ މާލޭ ރީޖަން ހިމެނޭހެން 15 އަތޮޅަކަށް އަންނަނީ ފެރީގެ ޚިދުމަތް ދެމުންނެވެ. މި ޚިދުމަތަށް އާންމުންގެ ބޮޑު ޑިމާންޑެއް އޮންނައިރު، ފެރީގެ ޚިދުމަތް ޒަމާނީކޮށް، އަވަސް ޚިދުމަތެއް ފޯރުކޮށްދިނުމަށްޓަކާ އެމް.ޓީ.ސީ.ސީން އަންނަނީ ގިނަ މަސައްކަތްތަކެއް ކުރަމުންނެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އެމް.ޓީ.ސީ.ސީގެ ޓްރާންސްޕޯޓް ސަރވިސް ޑިޕާޓްމަންޓްގެ ސީނިއަރ މެނޭޖަރ އިބްރާހީމް ސިރާޖު ވިދާޅުވީ، އަތޮޅުތެރޭގެ ފެރީގެ ނިޒާމު ހަރުދަނާކުރުމަށްޓަކާ، ފެރީތައް މަރާމާތުކުރުމުގެ މަސައްކަތް މިހާރު ކުރަމުންދާކަމަށެވެ. ސިރާޖު ވިދާޅުވީ، އަތޮޅުތެރޭގައި ފެރީގެ ޚިދުމަތް ދިނުމަށް އާއްމުކޮށް ބޭނުންކުރަނީ 210 އަކާއި 255 އަކާއި ދެމެދު ހޯސްޕަވަރުގެ އިންޖީނުލީ ފެރީތަަކެއްކަމަށާއި، ނަމަވެސް އެއީ ދުރު ރަށްރަށަށް ދަތުރުކުރުމަށް އެންމެ އެކަށީގެންވާ ފެރީތަކެއް ނޫންކަމުން، އެ ފެރީތައް ބަދަލުކުރުމުގެ މަސައްކަތް ކުރަމުންދާކަމަށެވެ. އެގޮތުން 11 އަތޮޅަކަށް ފެރީ ޚިދުމަތް ދިނުމަށް 14 ފެރީއެއް ކުއްޔަށް ހޯދުމަށް މިހާރުވެސް އިޢުލާންކޮށްފައިވާކަމަށް އޭނާ ވިދާޅުވިއެވެ.
އިބްރާހީމް ސިރާޖު ވިދާޅުވީ، އެމްޓީސީސީއިން ފެރީގެ ޚިދުމަތްދެމުންދާ 15 އަތޮޅުގެ އިތުރުން މިވަގުތު ފެރީގެ ޚިދުމަތް ހުއްޓިފައިވާ 3 އަތޮޅުކަމަށްވާ މ، ފ، އަދި ދ އަތޮޅަށް އެމްޓީސީސީން ފެރީގެ ޚިދުމަތްދޭން ފެށުމާގުޅޭގޮތުން ކަމާގުޅުން ހުރި ފަރާތްތަކާއެކު މަޝްވަރާކުރަމުންދާކަމަށެވެ.
ރާއްޖޭގެ 15 އަތޮޅަކަށް ފެރީގެ ޚިދުމަތް ފޯރުކޮށްދިނުމަށްޓަކާ 22 ފެރީއެއް އެމް.ޓީ.ސީ.ސީއިން އަންނަނީ ބޭނުންކުރަމުންނެވެ. އަދި ބެކްއަޕް ފެރީތަކާއެކު ޖުމްލަ 35 ފެރީއެއް އެކުންފުނީގެ ފްލީޓުގައި ހިމެނެއެވެ.