ޕެންޝަން ލިބޭ ފަރާތްތަކަށް އަމާޒުކޮށްގެން ޚާއްސަ ސަރވޭއެއް ކުރިއަށްގެންދިއުމަށް ޕެންޝަން އޮފީހުން ނިންމައިފިއެވެ.
ޕެންޝަން އޮފީހުން ބުނީ، މި ސަރވޭ ކުރިއަށްގެންދިއުމަށް ހަމަޖެހިފައިވަނީ މިމަހުގެ 23 އިން ފެށިގެން އެއް މަސްދުވަހުގެ މުއްދަތަކަށް ކަމަށެވެ. އަދި މިފަދަ ސަރވޭއެއް ކުރުމުގެ ބޭނުމަކީ ޕެންޝަން ފޯރުކޮށްދޭ ފަރާތްތަކަށް، ޕެންޝަން އޮފީހުން ދެމުންގެންދާ ޚިދުމަތްތަކާމެދު އެ ފަރާތްތަކުން ދެކޭގޮތް ބަލާ، އިތުރަށް ރަނގަޅުކުރަންޖެހޭ ދާއިރާތައް ދެނެގަނެ، ޚިދުމަތްތައް އިތުރަށް ފުރިހަމަ ކުރުންކަމަށް އެ އޮފީހުން ބުނެއެވެ.
މިސާރވޭގައި މަޢުލޫމާތު އެއްކުރުމަށް ހަމަޖެހިފައިވަނީ ފޯނުން ގުޅައިގެންނާއި، ޕެންޝަން ލިބެމުންދާ ފަރާތްތަކަށް ޒިޔާރަތްކޮށްގެންނެވެ. އަދި ސާރވޭކުރިއަށްދާ މުއްދަތުގައި ޕެންޝަން އޮފީހުގެ ފޯނު ނަންބަރު 1441 އިން ގުޅަމުންދާނެކަމަށް ޕެންޝަން އޮފީހުން ބުނެއެވެ.
ޕެންޝަން އޮފީހަކީ ޕެންޝަނާބެހޭ ޤާނޫނުގެ ދަށުން އުފެދިފައިވާ ގާނޫނީ ޝަޙްސެކެވެ. ޕެންޝަން އޮފީހުގެ މައިގަނޑު މަސައްކަތްތަކަކީ ޕެންޝަން ސްކީމްތައް ބެލެހެއްޓުމާއި، ޕެންޝަން ޤާނޫނުގެ ދަށުން ޤާއިމުކުރާ ސްކީމްތައް ހިންގުމާބެހޭ ގަވާއިދުތައް ހެދުމާއި، އެކަމާބެހޭ މިންގަނޑުތަކާއި ގައިޑްލައިންތައް ހެދުމާއި، އުމުރުން ދުވަސްވީ މީހުންގެ އަސާސީ ޕެންޝަންގެ ފައިސާ ދޫކުރުމުގެ އިތުރުން ޕެންޝަން ސްކީމްތަކާބެހޭ ގޮތުން ހޭލުންތެރިކަން އިތުރުކުރުމަށް ޕްރޮގްރާމްތައް ހިންގުމެވެ.
ޕެންޝަން އޮފީހުން އަންނަނީ އާއްމުންނަށް ޙާއްސަކޮށްގެން 2 ސްކީމެއްގެ ޚިދުމަތް ފޯރުކޮށްދެމުންނެވެ. އެއީ އަސާސީ ޕެންޝަން ސްކީމާއި، މޯލްޑިވްސް ރިޓަޔަރމަންޓް ޕެންޝަން ސްކީމެވެ. އަސާސީ ޕެންޝަނަކީ ޢުމުރުން 65 އަހަރު ފުރިފައިވާ ދިވެހި ރައްޔިތުންނަށް ދިވެހިރާއްޖޭގެ ޕެންޝަނާބެހޭ ޤާނޫނުގެ ދަށުން ފޯރުކޮށްދެވޭ ޕެންޝަނެކެވެ. އަދި މޯލްޑިވްސް ރިޓަޔަރމަންޓް ޕެންޝަން ސްކީމަކީ ދިވެހިރާއްޖޭގެ ޕެންޝަނާ ބެހޭ ޤާނޫނުގެ ދަށުން ތަޢާރަފު ކުރެވިފައިވާ ޑިފައިންޑް ކޮންޓްރިބިއުޝަން ޕެންޝަން ސްކީމެކެވެ. މިއީ ވަޒީފާދޭ ފަރާތާއި ވަޒީފާ އަދާކުރާ ފަރާތުން ކަނޑައެޅިފައިވާ ވަކި ޢަދަދެއްގެ ޗަންދާއެއް ނަގައިގެން، އެ ފައިސާ އިންވެސްޓް ކޮށްގެން ރިޓަޔަރމަންޓަށް ފައިސާ ރައްކާކުރެވޭ ޕެންޝަން ނިޒާމެކެވެ.