މާލޭގެ ބާޒާރުމަތީ ސަރަޙައްދުގައި ސަލާން ޖަހަމުންދިޔަ ބައެއް މީހުންނަށް ވަޒީފާ ހަމަޖައްސައިދީ ބައެއް މީހުންގެ ޢާއިލާތަކާ އެމީހުންނާ ގުޅުވައިދީފިއެވެ. މިނިސްޓަރ ޝިދާތާވަނީ ބާޒާރުމަތީގައި ސަލާންޖަންއުޅޭ މީހުންނާއި ބައްދަލުކުރައްވައި، އެމީހުންގެ ދަތިތަކާއި، ބޭނުންތައް އޮޅުންފިލުންވަވާފައެވެ.
ޖެންޑަރ މިނިސްޓްރީން ނެރުއްވި ނޫސްބަޔާނެއްގައި ވިދާޅުވެފައިވަނީ ޒަރޫރީ ބޭނުންތައް ފުއްދުމަށްކަމަށް ބުނެ ބާޒާރުމަތީ ސަލާން ޖަހަމުން ދިޔަ މީހުންނާ، ޖެންޑަރ މިނިސްޓަރ ޝިދާތާ ޝަރީފް ބައްދަލުކުރެއްވުމުން އެމީހުންގެ ކަންބޮޑުވުންތައް ޙިއްޞާކޮށްފައިވާކަމަށެވެ. މިގޮތުން ވަޒީފާއެއް ނެތުން ނުވަތަ ނުލިބުމާއި ނުކުޅެދުންތެރިކަމެއް ހުރުން ނުވަތަ ބޭސްފަރުވާ ކުރުމަށް މާލީގޮތުން ނުކުޅެދިފައިވުމާއި ބޯހިޔާވަހިކަން ހޯދުމުގައި ދަތިތަކެއް ހުރުމުގެ މައްސަލަތައް އެމީހުން ފާހަގަކޮށްފައިވާކަމަށް އެމިނިސްޓްރީން ވިދާޅުވެފައިވެއެވެ.
މިނިސްޓަރުގެ ޒިޔާރަތަށްފަހު ސަލާންޖަހަމުން ދިޔަ ފަރާތްތަކުން ފާހަގަކުރި މައްސަލަތައް ޙައްލުކޮށް އެމީހުންގެ ޙާލަތުދެނެގަތުމަށް "އިންޓަރވެންޝަން"ގެ ނަމުގައި 4 މެންބަރުންގެ ކޮމިޓީއެއް އެކުލަވާލާފައި ވާކަމަށް ޖެންޑަރ މިނިސްޓްރީގެ ބަޔާނުގައި ވިދާޅުވެފައިވެއެވެ. އަދި މި ކޮމިޓީގެ މަސައްކަތްތަކުގެ ތެރޭގައި ދައުލަތުގެ ޙިމާޔަތާއި ރައްކައުތެރިކަން ބޭނުންވާ ފަރާތްތަކަކީ ކޮބައިކަން ދެނެގަނެ، އެ ފަރާތްތަކުގެ ޙާލަތު ބަލައި، އެ ފަރާތްތަކަށް ވެވިދާނެ އެހީތެރިކަމަކީ ކޮބައިކަން އޮޅުންފިލުއްވައި، އެ އެހީތެރިކަމެއް ލިބޭނެ ނުވަތަ ފޯރުކޮށްދެވޭނެ ވުޒާރާ ނުވަތަ މުއައްސަސާ ނުވަތަ މަރުކަޒަކާ އެފަރާތެއް ގުޅުވައިދިނުން ހިމެނެކަމަށްވެސް ޖެންޑަރ މިނިސްޓްރީން ވިދާޅުވެއެވެ.
މި ކޮމެޓީގެ މަސައްކަތުން މިހާތަނަށް 20 ފަރާތެއްގެ ޙާލަތު ދެނެގަނެ އޭގެތެރެއިން ބައެއް މީހުންގެ ޝަކުވާތަކަށް ހައްލެއް ހޯދައިދީފައިވާކަމަށްވެސް ޖެންޑަރ މިނިސްޓްރީގެ ބަޔާނުގައި ވިދާޅުވެފައިވެއެވެ.
މި ގޮތުން ސޯޝަލް ޕްރޮޓެކްޝަން ސިސްޓަމްގެ ތެރެއިން ތަފާތު އެކި އެލަވަންސްތައް ލިބުމަށް ޝަރުޠު ހަމަވާ، އެހެންނަމަވެސް މިހާތަނަށް އެފަދަ އެލަވަންސެއް ލިބެމުން ނުދާ ފަރާތްތަކަށް އެލަވަންސްތަކާ ގުޅޭ މަޢުލޫމާތު ފޯރުކޮށްދީ، އެލަވަންސް ލިބޭނެ މަގުފަހިކޮށްދީފައިވާކަމަށްވެސް ޖެންޑަރ މިނިސްޓްރީން ވިދާޅުވެއެވެ. އަދި ދިވެހި ރައްޔިތެއްކަން އަންގައިދޭ ކާޑު ފަދަ މުހިންމު ލިޔެކިޔުންތައް ނެތް ފަރާތްތަކަށް އެތަކެތި ހޯދައިދިނުމުގައި އެހީތެރިކަން ފޯރުކޮށްދީފައިވާކަމަށްވެސް ޖެންޑަރ މިނިސްޓްރީން ވިދާޅުވެއެވެ.
މީގެއިތުރުން ބޭސްފަރުވާ ކުރުމަށް މާލީގޮތުން ނުކުޅެދިފައިވާ ފަރާތްތައް ޑޮކްޓަރަށް ދެއްކުމަށް އެހީތެރިވެދީ، ބޭސްފަރުވާއާއި ޞިއްޙީ އެހީތެރިކަން ފޯރުކޮށްދޭ ދައުލަތުގެ މުއައްސަސާތަކާއި މަރުކަޒުތަކާ އެފަރާތްތައް ގުޅުވައިދީފައި ވާކަމަށްވެސް ޖެންޑަރ މިނިސްޓްރީގެ ބަޔާނުގައިވެއެވެ.
އަދި ވަޒީފާއެއް ހޯދައިދިނުމަށް އެދިފައިވާ ފަރާތްތަކުގެ ތެރެއިން 3 ފަރާތެއް ވަޒީފާ ދޭ ފަރާތްތަކާ ގުޅުވައިދީ އެކަކަށް ވަޒީފާ ހަމަޖައްސައިދީ އިތުރު ފަރާތްތަކަށް ވަޒީފާގެ ފުރުޞަތު ހޯދައިދިނުމުގެ ގޮތުން ސަރުކާރު ޙިއްޞާވާ ކުންފުނިތަކާއި އަމިއްލަ ފަރާތްތަކާއެކު މިހާރުވެސް މަޝްވަރާކުރަމުންދާކަންވެސް ޖެންޑަރގެ ބަޔާނުގައި ފާހަގަކުރައްވާފައިވެއެވެ.
ޢާއިލީ އެކި މައްސަލަތަކުގެ ސަބަބުން މަގުމަތިވެފައިވާ ފަރާތްތަކުގެ ޢާއިލާތަކާ ވާހަކަދައްކައިގެން، އެ ފަދަ މައްސަލަތައް ޙައްލުކޮށް، އެ ފަރާތްތަކަށް އިތުރު ގޮތްތަކެއް ހޯދައިދިނުމަށް މަސައްކަތްކޮށްފައިވާކަމަށްވެސް ޖެންޑަރ މިނިސްޓަރީން ވިދާޅުވެއެވެ. އަދި މީގެ ތެރެއިން 2 ފަރާތެއްގެ މައްސަލައަކީ ކަންބޮޑުވާން ޖެހޭ އަދި އިތުރަށް ބަލަން ޖެހޭ ފަދަ 2 މައްސަލަ ކަމުގައި ފާހަގަކުރެވިފައިވާތީ، ކަމާ ގުޅުން ހުރި މުއައްސަސާތަކާއެކު އެ 2 މައްސަލަ ބަލަމުންދާކަމަށާ ޢާއިލާއާ ޙަވާލުވުމަށް އަނބުރާ ރަށަށް ދިޔުމުގައި ދަތިތައް ހުރި ފަރާތްތަކަށް މިނިސްޓްރީން އެހީތެރިކަން ފޯރުކޮށްދީފައިވާކަންވެސް ޖެންޑަރ މިނިސްޓްރީގެ ބަޔާނުގައި ފާހަގަކުރައްވާފައިވެއެވެ.