ރީބްރޯޑްކާސްޓަރުންގެ މައްޗަށް ކޮށްފައިވާ ޖޫރިމަނާ މަޢާފުކުރުމަށް ބަންޑާރަ ނައިބުގެ ލަފަޔަކަށް އެދިއްޖެ

ބައެއް ރީބްރޯޑްކާސްޓަރުންގެ މައްޗަށް ކޮށްފައިވާ ޖޫރިމަނާ މަޢާފުކުރުމާ ގުޅޭގޮތުން މޯލްޑިވްސް ބްރޮޑްކާސްޓިންގް ކޮމިޝަނުން ބަންޑާރަ ނައިބުގެ ލަފަޔަކަށް އެދިއްޖެއެވެ.

ޤަވައިދާ ހިލާފަށް ރީބްރޯޑްކާސްޓުކޮށްގެން 15 ފަރާތެއް 2.5 މިލިއަން ރުފިޔާދައްކަން ޖެހިފައިވާކަމަށް އެ ކޮމިޝަނުން މަޢުލޫމާތުދެއްވައެވެ.

ބްރޮޑްކާސްޓިންގް ކޮމިޝަންގެ މަސައްކަތްތަކުގެ މަޢުލޫމާތު ޕީއެސްއެމް ނިއުސްއާއި ހިއްސާކުރައްވަމުން އެ ކޮމިޝަންގެ ރައީސް މުޙައްމަދު ޝަހީބް ވިދާޅުވީ، ރީބްރޯޑްކާސްޓްކުރުމުގެ ޤަވާއިދުގައި ބަޔާންކުރާ ޖޫރިމަނާ، ވޭތުވެދިޔަ 2 އަހަރެއްހާ ދުވަހުގެ ތެރޭގައި ޖުމްލަ 29 ފަރާތެއްގެ މައްޗަށް ކޮށްފައިވާކަމަށެވެ.

މީގެ ތެރެއިން ބައެއް ފަރާތްތަކުން ޖޫރިމަނާ ދައްކާފައިވާއިރު، 15 ފަރާތަކުން ޖޫރިމަނާ ނުދައްކާކަން ފާހަގަކުރައްވާ ޝަހީބް ވިދާޅުވީ، މި ފަރާތްތަކުން ޖޫރިމަނާގެގޮތުގައި 2.5 މިލިއަން ރުފިޔާ ދައްކަން ޖެހޭކަމަށެވެ. މި މައްސަލަތަކުގެ ޖޫރިމަނާ ފައިސާހޯދުމަށް ކޯޓު މަރުހަލާގައި ގިނަ މައްސަލަތަކެއް ހުރިކަން ފާހަގަކުރައްވާ ޝަހީބް ވިދާޅުވީ، ޖޫރިމަނާ ނުދައްކާ ހުރި ބައެއް ފަރާތްތަކުން އެ ޖޫރިމަނާ މަޢާފުކޮށްދިނުމަށް އެދި މި ކޮމިޝަނަށް ހުށަހަޅާފައިވާކަމަށެވެ.

އެގޮތުން ރީބްރޯޑްކާސްޓަރުންގެ މައްޗަށް ކޮށްފައިވާ ޖޫރިމަނާ މަޢާފުކޮށްދެވޭނޭ ޤާނޫނީ ހަމައެއް އޮތްތޯ ބައްލަވައި ދެއްވައި މިކަމުގެ ލަފަޔަކަށް ބަންޑާރަ ނައިބުގެ އަރިހުން އެދިފައިވާކަމަށް ޝަހީބް ވިދާޅުވިއެވެ. މިފަދައިން އަމަލުކުރެއްވީ މިފަދަ ކުންފުނިތަކަށް ދިމާވެފައިވާ ދަތި ހާލަތަށް ބަލައި މި ކުންފުނިތަކަށް މި ދަތިކަމުން އަރައިގަތުމަށާއި ޤާނޫނާއި ޤަވާއިދުގެ ތެރެއިން ޙަރަކާތްތެރިވުމަށް ހިތްވަރު ދިނުމަށްޓަކައި އިތުރު ފުރުޞަތެއް ހޯދައިދިނުމަކީ މުހިއްމު ކަމެއްކަމަށް މި ކޮމިޝަނަށް ފެންނާތީކަމަށް ބްރޮޑްކާސްޓިންގް ކޮމިޝަންގެ ރައީސް ވިދާޅުވިއެވެ.

"ޖޫރިމަނާ މަޢާފުކޮށްދިނުމަށް އެދި ކޮމިޝަނަށް ހުށަހަޅާފައިވާ ފަރާތްތަކުން، އެ ފަރާތްތަކަކީ ރަށްރަށުގައި ކުދި ވިޔަފާރި ކުރާފަރާތްތަކެއްކަމާއި އެ ކުންފުނިތަކުގެ މާލީ ޙާލަތު ހުރި ގޮތުން ޖޫރިމަނާ ދެއްކުމަށް ނުކުޅެދިފައިވާކަމާއި އިތުރު ފުރުޞަތެއް ދިނުމަށް އެދޭ ވާހަކަ ބަޔާންކޮށް ހުށަހަޅާފައިވޭ..... ވީމާ، މި ފަދަ ކުންފުނިތަކަށް ދިމާވެފައިވާ ދަތި ހާލަތަށް ބަލައި މި ކުންފުނިތަކަށް މި ދަތިކަމުން އަރައިގަތުމަށާއި ޤާނޫނާއި ޤަވާއިދުގެ ތެރެއިން ޙަރަކާތްތެރިވުމަށް ހިތްވަރު ދިނުމަށްޓަކައި އިތުރު ފުރުޞަތެއް ހޯދައިދިނުމަކީ މުހިއްމު ކަމެއްކަމަށް މި ކޮމިޝަނަށް ފެނޭ." މުޙައްމަދު ޝަހީބް ވިދާޅުވިއެވެ.

މި ފަދަ މައްސަލަތަށް ހައްލުކުރުމުގައި ދިމާވެފައިވާ އެންމެ ބޮޑު މައްސަލައަކީ ރަށްރަށުގެ ކައުންސިލްތަކުން އެކަށޭނަ އެއްބާރުލުމެއް ނުލިބުންކަން ފާހަގަކުރައްވާ ޝަހީބު ވިދާޅުވީ، މި މައްސަލަ ހައްލުކުރުމަށް ކައުންސިލްތަކާއި ވާހަކަދައްކަމުންދާކަމަށެވެ. މީގެ އިތުރުން މޯލްޑިވްސް ޕޮލިސް ސަރވިސްއާއި ލޯކަލް ގަވަމެންޓް އޮތޯރިޓީއާއިއެކުވެސް ވާހަކަދައްކަމުން ދާކަން ޝަހީބް ފާހަގަކުރެއްވިއެވެ. އަދި ހަމަމިއާއިއެކު ކޮމިޝަނަށް ދިމާވެފައިވާ ބަޖެޓްގެ މައްސަލަ ހައްލުކުރުމަށް ފިނޭންސް މިނިސްޓްރީއާއިއެކުވެސް މަޝްވަރާކުރަމުންދާކަމަށް ޝަހީބް ވިދާޅުވިއެވެ.

"މި ފަދަ މައްސަލަތަށް ހައްލުކުރުމުގައި ދިމާވެފައިވާ އެންމެ ބޮޑު މައްސަލައަކީ ރަށްރަށުގެ ކައުންސިލްތަކުން އެކަށޭނަ އެއްބާރުލުމެއް ނުލިބޭ. މިކަން ހައްލުކުރުމަށް ގިނަ މަސައްކަތްތަކެއް ކުރެވޭ، ހަމަމިއާއިއެކު ކޮމިޝަނަށް ދިމާވެފައިވާ ބަޖެޓްގެ މައްސަލަ ހައްލުކުރުމަށް ފިނޭންސް މިނިސްޓްރީއާއިއެކުވެސް މަޝްވަރާކުރަމުން އެބަދަން." މުހައްމަދު ޝަހީބް ވިދާޅުވިއެވެ.

ބައެއް ރީބްރޯޑްކާސްޓަރުންގެ މައްޗަށް ކޮށްފައިވާ ޖޫރިމަނާ މަޢާފުކުރުމާ ގުޅޭގޮތުން މޯލްޑިވްސް ބްރޮޑްކާސްޓިންގް ކޮމިޝަނުން ބަންޑާރަ ނައިބުގެ ލަފަޔަކަށް އެދިފައިވާއިރު، ރާއްޖޭގައި ބްރޮޑްކާސްޓްކުރާ ކޮންޓެންޓަކީ ޤާނުނާއި ގަވައިދުގެ ދަށުން ބްރޮޑްކާސްޓްކުރާ ކޮންޓެންޓްކަން ޔަޤީންކުރުމަށް ގިނަ މަސައްކަތްތަކެއް ކުރަމުންދާކަމަށް ބްރޮޑްކާސްޓިންގް ކޮމިޝަނުން ވިދާޅުވެއެވެ.