ހުސްވެފައިވާ ރައްޔިތުން މަޖްލީހުގެ
ދިއްގަރު ދާއިރާއަށް ޕީޕީއެމް ޓިކެޓް ދޭނެ ފަރާތެއް ކަނޑައެޅުމަށް ބާއްވާ
ޕްރައިމެރީގައި ވާދަކުރައްވާ ހަތަރު ބޭފުޅުންގެ ތެރެއިން ދެ ބޭފުޅަކު ނަން އަނބުރާ
ގެންދަވައިފިއެވެ.
ޕާޓީގެ ޕްރައިމަރީއަށް ވާދަކުރައްވަން
ނިންމެވި ހަތަރު ބޭފުޅުންގެ ތެރެއިން ނަން އަނބުރާ ގެންދިޔައީ އެ ދާއިރާއަށް
ކުރިމަތިލީ އެންމަވަޔަރަމެންޓް މިނިސްޓަރގެ ނައިބް މުހައްމަދު ހާނިމްއާއި ދިއްގަރު
އެވަރލާސްޓް އިމްރާން ޒާހިރުއެވެ.
މި ދެ ބޭފުޅުން ނަން އަނބުރާ ނެގުމުން
މާދަމާ އޮންނަ ޕީޕީއެމްގެ ޕްރައިމެރީގައި ވާދަކުރައްވާނީ އެޕާޓީގެ ރައީސް އަދި
ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން އަހްމަދު ފާރިޝް
މައުމޫނާއި މ އަތޮޅު ކައުންސިލްގެ ރައީސް މޫސާ ނަސީރުއެވެ.
ޕީޕީއެމްގެ ދިއްގަރު ދާއިރާގެ
ޕްރައިމެރީ އޮންނާނީ މާދަމާ މެންދުރު ދޭކުން ހަވީރު ފަހަކަށެވެ. ޕީޕީއެމްއިން ބުނީ
ރަތްމަންދޫ ފިޔަވާ ހުރިހާ ރަށެއްގައިވެސް ވޯޓް ފޮށި ބެހެއްޓޭނެކަމަށެވެ.
ރަތްމަންދޫ މީހުން ވޯޓްލުން ހަމަޖެހިފައިވަނީ ވޭވަށުގައިކަމަށް ޕީޕީއެމްއިން
ބުނެއެވެ.
ދިއްގަރު ދާއިރާގައި ހިމެނެނީ މ.
ދިއްގަރާއި، މަޑުއްވަރީއާއި، ވޭވަށާއި މުލީގެ އިތުރުން ރަތްމަންދުއެވެ.
ރައްޔިތުން މަޖްލީހުގެ ދިއްގަރު ދާއިރާގެ ގޮނޑި ހުސްވެ ބައި
އިލެކްޝަނަކަށް އިލެކްޝަންސް ކޮމިޝަނުން ގޮވާލާފައިމިވަނީ އެ ދާއިރާގެ ގޮނޑި
ތަމްސީލުކުރައްވަމުން ގެންދެވި ޕީޕީއެމްގެ މެމްބަރު އަހްމަދު ނާޒިމްގެ މައްޗަށް
ހިޔާނާތުގެ ކުށްސާބިތުވެ 25 އަހަރަށް ޖަލަށްލުމަށް ސުޕްރީމްކޯޓުން ހުކުމްކުރުމާއި
ގުޅިގެންނެވެ.