އިންޓަނޭޝަނަލް އެއިޑް ކެމްޕޭން، އައިއޭސީއިން އެއްވެސް ފަރާތަކަށް ވަކިވަކިން މެސެޖްކޮށް ނުވަތަ ބައްދަލުކޮށްގެން އެހީ ހޯދުމަށް ޙަރަކާތްތެރި ނުވާނެކަމަށާ، އެ ޖަމްޢިއްޔާއަށް ނިސްބަތްވާ އެއްވެސް މީހަކުވެސް އެގޮތަށް ޢަމަލުނުކުރާނެކަމަށް އައިއޭސީއިން ހާމަކޮށްފިއެވެ.
އައިއޭސީއިން މިކަން ހާމަކޮށްފައި މިވަނީ، ވަކިވަކިން މެސެޖްތަށްކޮށްގެންނާއި ބައްދަލުކޮށްގެން އެ ޖަމްޢިއްޔާގެ ނަމުގައި ފައިސާ ހޯދަން ބަޔަކު އުޅޭ ކަމުގެ ޚަބަރުތަށް ފެތުރިފައިވާ ދަނޑިވަޅެއްގައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން، އިންޓަނޭޝަނަލް އެއިޑް ކެމްޕޭންގެ ވައިސް ޗެއަރަމަން އާދަމް ނާއިފް ވިދާޅުވީ، އައިއޭސީއަކީ ތެދުވެރިކަމާއި އަމާނާތްތެރިކަމާއެކު ދުނިޔޭގެ އެކި ކަންކޮޅުތަކުގައި ހާލުގައި ޖެހޭ ފަރާތްތަކަށް ދިވެހިރައްޔިތުން ފޯރުކޮށްދޭ ފައިސާއާއި އެހީ އެފަރާތްތަކާ ހަމައަށް ފޯރުކޮށްދޭ މެދުވެރިއެއްކަމަށެވެ.
އަދި އެ ހަރަކާތުން، މިހާތަނަށް އައިއިރު އެއްކޮށްފައިވާ ފައިސާ ޚަރަދުކޮށް އެހީ ފޯރުކޮށްދޭގޮތުގެ ތަފްޞީލު ފޮޓޯތަކާއި ވީޑިއޯތަކުން އާންމުކުރަމުންދާކަން ނާއިފް ފާހަގަކުރެއްވިއެވެ. ނާއިފް ވިދާޅުވީ، އައިއޭސީއިން އަބަދުވެސް ފައިސާ ބަލައިގަންނަނީ އެ ހަރަކާތުން ހަދާފައިވާ ބީއެމްއެލްގެ އެކައުންޓްތަކަށް ޓްރާންސްފަރ ކޮށްގެންކަމަށެވެ. އަދި އެހަރަކާތުން އެއްވެސް އިރެއްގައި ވަކިވަކިން މެސެޖްކޮށް ނުވަތަ ބައްދަލުކޮށްގެން އެހީ ހޯދުމަށް މަސައްކަތްކޮށްފައިނުވާނެކަމަށްވެސް ނާއިފް ވިދާޅުވިއެވެ. އެހެންކަމުން އޮޅުވާލައިގެން ފައިސާ ހޯދުމަށް މަސައްކަތްކުރާ ފަރާތްތަކާމެދު ސަމާލުޔވުމަށް ނާއިފް އިލްތިމާސްކުރެއްވިއެވެ.
އިންޓަރނޭޝަނަލް އެއިޑް ކެމްޕެއިނަކީ ރާއްޖޭގައި އިންސާނިއްޔަތަށްޓަކައި މަސައްކަތްކުރާ ގިނަ ޖަމްޢިއްޔާތަކެއް އެކުވެގެން ދުނިޔޭގެ އެކި ހިސާބުތަކުގައި ޙާލުގައި ޖެހިފައިތިބި މުސްލިމުންނަށް އެހީތެރިކަން ފޯރުކޮށްދިނުމަށް 2016ވަނަ އަހަރު ފެށި ހަރަކާތެކެވެ. މި ކެމްޕޭނުންވަނީ ސޫރިޔާގެ އެކި ސަރަހައްދުތަކާއި ރޮހިންޔާ މުސްލިމުންނަށް އެހީ ފޯރުކޮށްދިނުމަށް ކެމްޕެއިންތައް ކުރިއަށް ގެންގޮސްފައެވެ.