އައްޑޫ ސިޓީ ނަރުދަމާގެ ޑިޒައިނިންގ ގެ މަސައްކަތް އަންނަ ހަފްތާ ތެރޭގައި ބަޔަކާ ހަވާލު ކުރާނެ ކަމަށް އެންވަޔަރަމެންޓް މިނިސްޓްރީން ބުނެފިއެވެ.އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރ އަބްދުލް މަތީން މުހައްމަދު ވިދާޅުވީ، އައްޑޫ ސިޓީގެ ހިތަދޫ ފިޔަވައި އެހެން ހުރިހާ ރަށެއްގެ ނަރުދަމާގެ ޑިޒައިނިންގގެ މަސައްކަތް ހަވާލް ކުރެވޭނެ ކަމަށެވެ.މަތީން ވިދާޅުވީ، ނަރުދަމާ އެޅުމަށް ބޭނުންވާ ލޯން މިހާރު އޯފިޑުން ހަމަޖެހިފައިވާ ކަމަށެވެ. އެހެން ނަމަވެސް ޑިޒައިންގެ މަސައްކަތައް ޚަރަދުކުރާނީ ސަރުކާރުގެ ބަޖެޓުން ކަމަށާއި، ޑިޒައިނިން އަށް ޚަރަދުވާނީ ކިހާވަރެއްތޯބަލައި ޑޮކިއުމެންޓްތައް ނިންމަމުންދާ ކަމަށް މަތީން ވިދާޅުވިއެވެ.އައްޑޫ ސިޓީގެ ނަރުނަމާއަށް 17 މިލިއަން ޑޮލަރު ޚަރަދުވާނެ ކަމަށް ރައީސް ޔާމިންވަނީ ވިދާޅުވެފައެވެ.ހިތަދޫ ނަރުދަމާއަކީ ވަކި ޕްރޮޖެކްޓެއްކަން ފާހަގަ ކުރައްވަމުން ސްޓޭޓް މިނިސްޓަރ މަތީން ވިދާޅުވީ، ހިތަދޫ ނަރުދަމާ އެޅުމަށް ކުރިން ހަވާލް ކޮށްފައިވާ ކުންފުނި، ބައި ވޯޓަރ އިން އެ މަސައްކަތް ހުއްޓާލުމުން، މިހާރު ސަރުކާރުން އެ ޕްރޮޖެކްޓް ކުރިއަށް ގެންދިޔުމަށް ނިންމާފައިވާ ކަމަށެވެ. އެގޮތުން ކުރިން އެ މަސައްކަތް ހަވާލް ކޮށްފައިވާ ކުންފުނިން ނަރުދަމާ އަޅާފައިވަނީ، ހިދަތޫ މެދުތެރޭގައި ކަމަށާއި، ސަރުކާރުން ހިތަދޫގެ އުތުރު ފަރާތާއި ދެކުނު ފަރާތުގެ ނަރުދަމާގެ މަސައްކަތްކުރުމަށް ވަރަށް އަވަހަށް ބަޔަކާ ހަވާލް ކުރާނެ ކަމަށް މަތީން ވިދާޅުވިއެވެ.އައްޑޫ ސިޓީ ފެނުގެ ޚިދުމަށް ފޯރުކޯށްދިނުމަށްވެސް ކުރިން ހަވާލްކޮށްފައިވަނީ އިނގިރޭސިވިލާތުގެ ބައި ވޯޓަރ ކުންފުންޏާއެވެ. އެ ކުންފުނިން އެ މަސައްކަތް ހުއްޓާލުމުން މިހާރު ސަރުކާރުންވަނީ އެ މަސައްކަތް ފެނަކައާ ހަވާލުކޮށްފައެވެ.އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރ އަބްދުލް މަތީން ވިދާޅުވީ، ފެނުގެ ހިދުމަތް ފޯރުކޮށްދިނުމުގެ މަސައްކަތް ފެށުމަށް ބޭނުންވާ މެޓީރިއަލްތައް މިހާރު ގެނެސްފައިވާ ކަމަށާއި، އަމަލީ މަސައްކަތް ވަރަށް އަވަހަށް ފަށާނެ ކަމަށެވެ. އައްޑޫ ސިޓީގެ ފެނާއި ނަރުދަމާގެ މަސައްކަތް ދެ އަހަރުގެ ތެރޭގައި އެއްކޮށް ނިންމާލެވޭނެ ކަމަށް އެންވަޔަރަމެންޓް މިނިސްޓްރީން ބުނެއެވެ.