ދިފާއު ކުރަން އެންމެ އުނދަގޫ ލީގަކީ އިނގިރޭސި ޕްރެމިއާ ލީގު ކަމަށް އެންމެ ޗެމްޕިއަން މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.
ބާސެލޯނާގައި ޖެހިޖެހިގެން ސްޕެނިޝް ލީގު ތިން ފަހަރު އަދި ބަޔާން މިއުނިކްގައި ޖެހިޖެހިގެން ތިން ފަހަރު ޖަރުމަނު ލީގު ހޯދި ކޯޗު މިހެން ބުނީ ޕްރެމިއާ ލީގުގައި ކުރީގެ ޗެމްޕިއަން ލެސްޓާ ސިޓިއާ ދެކޮޅަށް ނުކުންނަ މެޗުގެ ކުރިންނެވެ. މި މެޗަކީ ތަށީ ދިފާއު ކުރުމަށް ސިޓީ މޮޅުވާން މަޖުބޫރު މެޗެކެވެ. ނޫނީ އެއްވަނަ މަގާމު ލިވަޕޫލަށް ލިބޭނެއެވެ.
މިވަގުތު ލިވަޕޫލް އޮތީ ދެ ޕޮއިންޓްގެ ތަފާތުން ކުރީގަ އެވެ. ނަމަވެސް މެޗު ކާމިޔާބުކޮށްގެން ސިޓީ އެއް ޕޮއިންޓްގެ ތަފާތުން އެއްވަނަ އަށް އަރާނެއެވެ. ޕްރެމިއާ ލީގުގައި މި މެޗަށް ފަހު ކޮންމެ ޓީމަކަށް ވެސް އޮންނާނީ ބާކީ އެންމެ މެޗެކެވެ.
ގާޑިއޯލާ ބުނީ އޭނާގެ ހަޔާތުގައި ތައްޓެއް ދިފާއު ކުރަން އެންމެ އުނދަގޫ ލީގަކީ މިއީކަމަށާއި، ވާދަވެރި ޓީމުތަކުގެ ކޮލިޓީ އަށް ބަލާއިރު އިނގިރޭސި ލީގުގެ ވަރުގަދަ ކަމާމެދު ޝައްކެއްނެތްކަމަށެވެ. އަދި މި ލީގު ދިފާއު ކުރުމަކީ ވަރަށް އުނދަގޫ ކަމެއްކަމަށާއި، އެއް ފެންވަރެއްގެ ޓީމުތައް ގިނަކަމަށެވެ.
އޭނާ ބުނީ ސިޓީ އާއި ލިވަޕޫލް ލީގަށް ވާދަކުރާއިރު ލިވަޕޫލަކީ އޭނާގެ ހަޔާތުގައި ފެނިގެންދިޔަ އެންމެ ވަރުގަދަ އެޓޭކިން ފޯސް އޮތް ޓީމު ކަމަށެވެ. އޭނާ ބުނީ މިދިޔަ ސީޒަނުގައި 100 ޕޮއިންޓް ހޯދައިގެން ސިޓީ ލީގު ނެގި ނަމަވެސް މި ސީޒަނުގައި އެންމެ ގިނަވެގެން ވެސް ހޯދޭނީ 96 ޕޮއިންޓް ކަމަށާއި އެއީ ވެސް ވަރަށް އުނދަގޫ ކަމެއް ކަމަށެވެ.