ފުލުހުން ތަމްސީލް ކޮށްދެނީ ރާއްޖޭގެ ޤާނޫނުތަކާއި ޤާނޫނު އަސާސީ ކަމަށާއި ޤާނޫނު ތަމްސީލު ކުރާ ފުރަތަމަ ފަރާތަކީ، ފުލުހުން ކަމަށް ރައީސުލްޖުމްހޫރިއްޔާގެ ނައިބު ޑރ. މުޙައްމަދު ޖަމީލު އަޙުމަދު ވިދާޅުވެއްޖެއެވެ.ފުލުހުންގެ 82 ވަނަ އަހަރީދުވަސް ފާހަގަކުރުމަށް ހދ. ކުޅުދުއްފުށީގައި ރޭ ބޭއްވި ޖަލްސާ ޝަރަފްވެރި ކޮއްދެއްވާ ވާހަކަފުޅު ދައްކަވަމުން ނައިބު ރައީސް ވިދާޅުވީ، އާންމު ރައްޔިތުން ފުލުހުން ގެ ޚިދްމަތަށް އެދި އެދި ތިބެނީ ފުލުހުންނަކީ ޤާނޫނު ތަމްސީލު ކުރާ ފުރަތަމަ ފަރާތް ކަމުގައި ވުމުން ކަމަށެވެ. އަދި ފުލުހަކު ޔުނީފޯމްގައި ހުންނަ ވަގުތުގައި ވެސް އަދި އެނޫން ވަގުތެއްގައި ވެސް އާންމު ރައްޔިތު މީހާ، އެ ފުލުހެއްގެ ފަރާތުން އުންމީދު ކުރާނީ ޤާނޫނު ނަގަހައްޓައި ދެމެހެއްޓުން ކަމަށްވެސް ނައިބްރައީސް ޑރ، ޖަމީލް ވިދާޅުވިއެވެ. އަދި އެހެންކަމުން އެ ސަބަބަށްޓަކައި އަތޮޅު ތެރޭގެ ކުދި ރަށްތަކުންވެސް ފުލުހުންގެ ޚިދްމަތަށް އެދިއެދި ތިބިކަމަށްވެސް ނައިބްރައީސް ވިދާޅުވިއެވެ.ރޭގެ ޖަލްސާގައި ވާހަކަފުޅު ދައްކަވަމުން ޕޮލިސް ކޮމިޝަނަރ ހުސެން ވަހީދު ވިދާޅުވީ ޤާނޫނުތައް ހެދުމަށް ރައްޔިތުން އައްޔަންކުރާ މަންދޫބުން، ޤާނޫނުތައް ހެދުމަށްފަހު ޖެހިގެންއަންނަ ދުވަހު މަގުތައްމަތީ އެ ޤާނޫނު ތަކާއި އިދިކޮޅަށް މަސައްކަތްކޮށް، ޤާނޫނުގެ ބާރު ކަނޑުވާލަން ރައްޔިތުންނަށް ހިތްވަރުދީ ހެދުމަކީ ފުލުހުންނަށް ކުރިމަތިވާ ބޮޑު ގޮންޖެހުމެއް ކަމަށެވެ. އަދި ގާނޫނުތަކުން ލިބިދީފައިވާ ރައްކާތެރިކަމާއި މިނިވަންކަމާއި ހައްގުގެ ބޭނުން ނަހަމަ ގޮތުގައި ހިފައި، ގާނޫނުގެ ރޫހާ ހިލާފަށް މަސައްކަތްކޮށް، އަނިޔާވެރި އަމަލުތަކަށް ހިތްވަރު ލިބޭ ފަދަ ގޮތް ގޮތަށް އެކި މީހުންގެ އަމަލުތައް ތަކުރާރުވަމުންދާ ކަމަށް ކޮމިޝަނަރ ވިދާޅުވިއެވެ.ފުލުހުންގެ އަހަރީދުވަހުގެ ޖަލްސާ އަތޮޅުތެރޭގެ އެކި ކަންކޮޅުތަކުގައި ބޭއްވުމަށް ކުރަމުންދާ މަސައްކަތުގެ ތެރެއިން ފުލުހުންގެ 83 ވަނަ އަހަރީދުވަހުގެ ޖަލްސާ ލ. އަތޮޅުގައި ބާއްވަވާނެކަން ކޮމިޝަނަރ ރޭ ވަނީ ޢިއުލާނު ކުރައްވާފައެވެ.ފުލުހުންގެ އަހަރީދުވަސް ފާހަގަ ކުރުމަށް ކުޅުދުއްފުށީގައި ރޭ ބޭއްވި ޖަލްސާގައި ފުލުހުންނަށް އެކި ރޮނގުރޮނގުން ހިދުމަތް ކޮށްދޭ ފަރާތްތަކަށް އެކަމުގެ ހަނދާނީލިޔުމާއި، އުތުރުގެ ސަރަހައްދުގައި މަސައްކަތްކުރާ ފުލުހުންގެ ތެރެއިން ކުލަޔާއި މެޑެލް ލިބުނު ފަރާތްތަކައް ކުލަޔާއި މެޑެލް ވަނީ ހަވާލު ކޮށްފައެވެ.