މަސްތުވާތަކެތި
ކޮންޓްރޯލްކުރުމަށް ފާރަ ބޭނުންކޮށްގެން ހިންގާ ޚާއްސަ އޮޕަރޭޝަންތަކުގައި
ފުލުހުންނަށް އެއްބާރުލުން ދިނުމުގެ އެއްބަސްވުމެއްގައި ހަތަރު މުއައްސަސާއަކާއެކު
މޯލްޑިވްސް ޕޮލިސް ސާރވިސްއިން މިއަދު ސޮއިކޮށްފިއެވެ.
އިސްކަންދަރު
ކޮށީގައި ބޭއްވި ރަސްމިއްޔާތުގައި ފާރަ ބޭނުންކޮށްގެން ހިންގާ އޮޕަރޭޝަންތަކުގައި
އެއްބާރުލުން ދިނުމުގެގޮތުން ފުލުހުންނާއި ދެމެދު އެއްބަސްވުމުގައި ސޮއިކުރި
ހަތަރު މުއައްސަސާއަކީ، މޯލްޑިވްސް ޕޯރޓްސް ލިމިޓެޑާއި، މޯލްޑިވްސް
ކަސްޓަމްސް ސާރވިސަސްއާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑާއި ޑިޕާޓްމަންޓް
އޮފް އިމިގްރޭޝަން އެންޑް އެމިގްރޭޝަންއެވެ.
މި ހަތަރު
މުއައްސަސާއާއެކު ސޮއިކުރެއްވުމަށްފަހު ނޫސްވެރިންނަށް މައުލޫމާތު ދެއްވަމުން
ކޮމިޝަނަރ އޮފް ޕޮލިސް ހުސެއިން ވަޙީދު ވިދާޅުވީ، މިވެވުނު އެއްބަސްވުމުގެ ދަށުން،
ފާރަ ބޭނުންކޮށްގެން ފުލުހުން ހިންގާ ޚާއްސަ އޮޕަރޭޝަންތަކުގައި ރާއްޖޭގެ
ޕޯޓުތަކާއި، އެއާރޕޯޓްތައް ޗެކްކޮށް، އެތަންތަނުގައި ހިންގަންޖެހޭ ޚާއްސަ
އޮޕަރޭޝަންތައް ހިންގުމުގައި މުއައްސަސާތަކުގެ މެދުގައި ބަދަލުކުރަންޖެހޭ
ލިޔެކިއުންތައް ބަދަލުކޮށް ނަގަންޖެހޭ ހުއްދަނެގުމުގައި ހޭދަވާ މުއްދަތު އަވަސްވެގެންދާނެކަމަށެވެ.
އަދި މަސްތުވާތަކެތި އަތުލައިގަނެ، އެތަކެތި ރާއްޖެ އެތެރެވާ ދޮރުތައް
ބަންދުކުރުމަށް ފުލުހުން ކުރަމުންދާ މަސައްކަތުގައި، މި ހަތަރު މުއައްސަސާގެ
ފަރާތުން އެހީތެރިކަން ލިބިގެންދާނެކަމަށް ކޮމިޝަނަރ ވިދާޅުވިއެވެ.
ފުލުހުން
މިހާރުވެސް ދަނީ މަސްތުވާތަކެތި ހޯދުމަށް ހިންގާ ޚާއްސަ އޮޕަރޭޝަންތަކުގައި މާލޭ
ސަރަޙައްދުގެ ތަންތަން ބަލާ ފާސްކުރުމުގައި ފާރަ ބޭނުންކުރަމުންނެވެ. އެގޮތުން ހަ
ލައްކަ ރުފިޔާގެ މަސްތުވާތަކެތި ފާރަ ބޭނުންކޮށްގެން މިހާތަނަށް ހޯދާފައިވޭ.
ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވީ، ފާރަ ބޭނުންކޮށްގެން ހިންގާ
އޮޕަރޭޝަންތައް މިވަގުތު މާލޭ ސަރަޙައްދުގައި ހިންގަމުންދިޔަ ނަމަވެސް، ފާރަ ތަމްރީންކުރުމުގެ
ތެރޭގައި އަތޮޅުތަކުގައިވެސް ފާރަ ބޭނުންކޮށްގެން އޮޕަރޭޝަންތައް
ކުރިއަށްގެންދާނެކަމަށެވެ.
ރާއްޖެ
އެތެރެކުރާ މަސްތުވާތަކެތި ހޯދުމުގެ އިތުރުން ގޮވާތަކެއްޗާއި، ވަގު ފައިސާ
ހޯދުމުގެ ޤާބިލުކަން ފާރަ ގެމައިގަ ހިމެނޭ ކުއްތާތަކަށް ލިބިގެންވާކަމަށް ފުލުހުން
މަޢްލޫމާތުދެއެވެ.