އައްޑޫ ސިޓީގައި ބާރު ސްޕީޑްގައި ދުއްވާ ފަރާތްތަކާއިމެދު ގަވާއިދުގެ ދަށުން އެޅެންއޮތް އެންމެ ހަރުކަށި ފިޔަވަޅު އެޅުމަށް އައްޑޫ ސިޓީ ޓްރެފިކް ޕޮލިސްއަށް އަންގާފައިވާކަމަށް ޓްރާންސްޕޯޓް އޮތޯރިޓީން ބުނެފިއެވެ.އެފްރީލް މަހުގެ އެކަކުން ފެށިގެން މިއަދާ ހަމައަށް ބަލާލާއިރު، އައްޑޫ ސިޓީގައި ވަނީ ނުރައްކާތެރި ތިން އެކްސިޑެންޓެއް ހިނގާފައިވެއެވެ. އަދި މި ހާދިސާތަކުގައި ދެ މީހެއްގެ ފުރާނަވަނީ ގެއްލިފައެވެ.ފުލުހުން ބުނީ އައްޑޫގައި އެކްސިޑެންޓްތައް އިތުރުވެފައިވަނީ ޤަވާއިދާ ޚިލާފަށް ދުއްވުމުގެ ސަބަބުން ކަމަށާއި، މި މަހުގެ ތެރޭގައި ހިނގި ނުރައްކާތެރި ހުރިހާ އެކްސިޑެންޓެއްވެސް ހިނގާފައިވަނީ ބާރު ސްޕީޑްގައި ދުއްވުމުގެ ސަބަބުން ކަމަށެވެ.ރާއްޖޭގައި ހިނގާފައިވާ އެންމެ ނުރައްކާތެރި މަގުމަތީގެ އެކްސިޑެންޓްތައް ހިނގާފައިވަނީ އައްޑޫގައި ކަމަށާއި، އެކަން އެގޮތަށް ހިނގުމުގައި އެތައް ސަބަބުތަކެއް އެބަހުރި ކަމަށް ފުލުހުން ބުނެއެވެ. ޚާއްސަކޮށް ބާރު ސްޕީޑްގައި ދުއްވުމުގެ މައްސަލަ ފުލުހުން ފާހަގަކުރެއެވެ.އައްޑޫ ސިޓީ އުފެދިފައިވާ ގޮތުން ހިތަދޫއިން ފެށިގެން ގަމާއި ހަމައަށް ރަށްތައް ގުޅާލުމަށްޓަކައި ވަނީ ލިންކް ރޯޑެއް ހަދާފަ. ތާރު އަޅައިގެން ޒަމާނީ ފެންވަރަކަށް ހަދާފައިވާ މި ލިންކް ރޯޑަކީ އައްޑޫގެ އެހެން ސަރަހައްދުތަކަސްވުރެ، ބާރު ސްޕީޑްގައި ދުއްވުމުގެ ހުއްދަވެސް ދެވިފައިވާ މަގެކެވެ. އެގޮތުން ރަށުތެރެއަށްވާ ހިސާބުތަކުގައި އާންމު ގަވާއިދުގެ ދަށުން ފަންސަވީސް ކިލޯ މިީޓަރަށް ދުއްވޭއިރު، މީހުން ނޫޅޭ ސަރަހައްދުތަކުގައި ގަޑިއަކު ފަސްދޮޅަސް ކިލޯ މީޓަރަށް ދުއްވުމުގެ ހުއްދަ ލިބިފައިވެއެވެ.ނަމަވެސް ރަށުތެރޭގައިވެސް ފަސްދޮޅަހަށް ދުއްވާކަން ފާހަގަކުރެވޭ ކަމަށާއި، އެެހެން ސަރަހައްދުތަކުގައި އަށްޑިހައަށް ވުރެ މަތީގައި ދުއްވާކަން ފާހަގަކުރެވިފައިވާ ކަމަށް ފުލުހުން ބުނެއެވެ. އަދި އާންމުކޮށް ބާރަށް ދުއްވާކަން ފާހަގަކުރެވިފައިވަނީ ފަންސަވީސް އަހަރުން ދަށުގެ ޒުވާނުން ކަމަށާއި، މީގެ ތެރޭގައި އުމުރުން އަށާރަ އަހަރު ނުވާ ލައިންސަންސް ނެތް ކުޑަކުދިން ހިމެނޭ ކަމަށްވެސް ފުލުހުން މައުލޫމާތުދެއެވެ.ޓްރެފިކް ފުލުހުން މިހާތަނަށް ހިންގި އޮޕަރޭޝަންތަކުގެ ތެރޭގައި މިފަދަ ކަންކަން ފާހަގަކޮށް ބައެއް ފަރާތްތަކާއި މެދު ގާނޫނުގައި ބުނެފައިވާ ފަދައިން ފިޔަވަޅު އަޅާފައިވާ ކަމަށް ފުލުހުން ބުނެއެވެ. އަދި އެތައް ބަޔަކަށް ނަސޭހަތްދީ ދޫކޮށްލާފައިވާ ކަަމަށްވެސް ފުލުހުން ބުނޭ. ޓްރާންސްޕޯޓް އޮތޯރިޓީގެ ޗެއަަރމަން އަބްދުއްރަސީދު ނާފިޒު ވިދާޅުވީ އައްޑޫގައި އެކްސިޑެންޓްތައް މަދުކުރުމަށްޓަކައި، ހެލްމެޓް އެޅުމަށް މަޖުބޫރުކުރުމަށް ނިންމުމަށް އައްޑޫ ސިޓީ ކައުންސިލަށް އަންގާފައިވާ ކަމަށާއި، އަދި ބާރު ސްޕީޑްގައި ދުއްވާ ފަރާތްތަކާއިމެދު ގަވާއިދުގެ ދަށުން އެޅެންއޮތް އެންމެ ހަރުކަށި ފިޔަވަޅު އެޅުމަށް އައްޑޫ ސިޓީ ޓްރެފިކް ޕޮލިސްއަށް އަންގާފައިވާކަމަށެވެ.މި މަހުގެ މިހާތަނަށް ބަލާލާއިރު ނުރައްކާތެރި ހަަތަރު އެކްސިޑެންޓްގައި ތިން މީހަކުވަނީ މަރުވެފަ. މިދިޔަ މަހުގެ އެއްތިރީސް ވަނަ ދުވަހުގެ ހަވީރު ދެ ސައިކަލެއް ޖެހި ލިންކް ރޯޑްގެ ހިތަދޫފަޅީގައި ހިނގި އެކްސިޑެންޓްގައި ޒަހަމްވި ތިން މީހުންގެ ތެރެއިން އަށާރަ އަހަރު ނުވަ ކުޑަ ކުއްޖާވަނީ މާލެ ގެނެސް ފަރުވާ ދެމުންދަނިކޮށް މި މަހުގެ އެއްވަނަ ދުވަހު މަރުވެފައެވެ. އޭގެ ނުވަ ދުވަސް ފަހުން އެޕްރީލް ދިހަ ވަނަ ދުވަހުގެ ރޭ ހިންގި އެކްސިޑެންޓެއްގައި ވަނީ ބާވީސް އަހަރުގެ ޒުވާނަކު މަރުވެފައެވެ. އަދި ރޭވެސް ވަނީ ނުރައްކާތެރި އެކްސިޑެންޓެއް ހިނގާފައެވެ.މި އެކްސިޑެންޓްތަކުގައި ފަސް މީހުންނަށް ބޮޑެތި ޒަހަމްތަކެއްވެސް ލިބިފައިވާއިރު، އޭގެ ތެރެއިން ތިން މީހަކަށް އަދިވެސް ހޮސްޕިޓަލްތަކުގައި ދަނީ ފަރުވާދެމުންނެވެ.