ލ.ފޮނަދުއަށް އެދި ނަގޫރޯޅީގެ ސަބަބުން ގެއްލުންވި ގެތައް މަރާމާތުކޮށް، އާއިލާތައް އެ ގެތަކަށް ބަދަލުކޮށްފި

ލ.ފޮނަދުއަށް ނަގޫރޯޅިއެއް އެރުމުގެ ސަބަބުން ގެއްލުންވި ގެތައް މަރާމާތުކޮށް، ހުރިހާ އާއިލާތަކެއް މިހާރު އެމީހުންގެ ގެތަކަށް ބަދަލުކޮށްފައިވާކަމަށް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

ލ.ފޮނަދުއަށް އިއްޔެ ނަގޫރޯޅިއެއް އެރުމުގެ ސަބަބުން 12 ގެއަކަށް އެކިވަރުގެ ގެއްލުންވެ، 6 އައިލާއެއް އެހެން ތަންތަނަށް ބަދަލުކޮށްފައިވެއެވެ. ނަމަވެސް އެ ގެތަކުގެ ފުރާޅު މަރާމާތުކޮށް މިހާރު އެ އާއިލާތައްް އެ ގެތަށް ބަދަލުކޮށްފައިވާކަމަށް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއެވެ.

މިކަމާ ގުޅޭގޮތުން މަޢޫލުމާތު ދެއްވަމުން ޑިޒާސްޓަރ މެނޭޖްމަންޓްގެ އޮތޯރިޓީގެ ޑެޕިއުޓީ ޗީފް އެގްޒެކެޓިވް ޢުމަރު ފިކުރީ ވިދާޅުވީ، މި ހާދިސާގައި ގެތަކަށް ލިބުނު ގެއްލުން ދެނެގަތުމަށް އެސެސްމެންޓް ހަދަމުންދާކަމަށެވެ. އަދި އެސެސްމެންޓް ނިމުމުން، އިތުރު އެހީ ދޭންޖެހޭ ގެއެއް ހުރިނަމަ އެ ގެއަކަށްވެސް އެހީތެރިކަން ފޯރުކޮށްދޭނެ ކަމަށެވެ. އެންޑީއެމްސީން މިހާރުވަނީ ގެއްލުން ލިބުނު 12 ގެއެއްގެ އެސެސްމަންޓް ހަދާފައެވެ.

"އަޅުގަނޑުމެންގެ އެހީގައި ގެތަކުގެ ފުރާޅު އަޅައި، މިހާރުވާނީ އާއިލާތައް ގެތަކަށް ބަދަލުކޮށްފައި. ފުނަދޫގެ ޙާލަތު މިހާރު ސްޓޭބަލް." އުމަރު ވިދާޅުވިއެވެ.

އުމަރު ވިދާޅުވީ ވިއްސާރައިގައި އއ.އުކުޅަހުގައިވެސް ފެންބޮޑުވުމުގެ ޙާދިސާއެއް ހިންގައި 10 ގެއަކަށް ފެން ވަދެފައިވާކަމުގެ މަޢުލޫމާތު ލިބުނުކަމަށެވެ. ނަމަވެސް އެރަށުގެ އެއްވެސް ގެއަކަށް ގެއްލުންވިކަމުގެ މަޢުލޫމާތު ލިބިފައިނުވާކަމަށް އޭނާ ވިދާޅުވިއެވެ.

މީގެ އިތުރުން މޫސުން ގޯސްވުމުގެ ސަބަބުން ވޭތުވެދިޔަ 2 ދުވަހު ރާއްޖޭގެ ބައެއް ރަށްރަށަށް އުދަވެސް އަރާފައިވެއެވެ. އެގޮތުން ގއ.ވިލިނގިއްޔަށް އުދަ އެރުމުގެ ސަބަބުން އެރަށުގެ ބަނދަރުން ބައެއް ހަލާކުވެފައިވާކަމަށްވެސް އެންޑީއެމްއޭއިން ބުނެއެވެ. މީގެއިތުރުން ގއ.ދާންދޫއަށާއި އައްޑޫ ސިޓީއަށްވެސް ވަނީ އުދައަރާފައެވެ. ނަމަވެސް މިއިން އެއްވެސް ޙާދިސާއެއްގައި މީހަކަށްވެސް އަދި މުދަލަކަށްވެސް ގެއްލުންވެފައިނުވާކަމަށް އެންޑީއެމްއޭއިން މަޢުލޫމާތުދެއްވައެވެ.

ރާއްޖެއަށް އިއްޔެ ކުރި ވިއްސާރައިގައި މާލޭގެ ބައެއް ސަރަހައްދުތަކުގައިވެސް ފެންބޮޑުވެފައިވެއެވެ. ނަމަވެސް މާލެ ސިޓީ ކައުންސިލާއި، އެމްއެންޑީއެފާއި ކަމާއި ގުޅުން ހުރި އިދާރާތަކުން ނުކުމެވަނީ ފެންގަނޑު ހިންދާލާފައެވެ.

ޑިޒާސްޓަރ މެނޭޖްމަންޓް އޮތޯރިޓީން ބޭއްވި ޕްރެސް ކޮންފަރެންސްގައި ބައިވެރިވެ ވަޑައިގެން ވާހަކަދައްކަވަމުން މާލެ ސިޓީގެ މޭޔަރ ސިފާ މުޙައްމަދު ވިދާޅުވީ މާލޭގެ މަގުތަކުގައި ފެންބޮޑުވާން ދިމާވާ އެންމެ ބޮޑު ސަބަބަކީ ކުރިން ތަރައްޤީގެ މަޝްރޫޢުތައް ހިންގިއިރު، މާލޭގެ ބައެއް ސަރަޙައްދުތަކަށް ފެން ޖަމާވާ ގޮތަށް، އަޑިގުޑަންތައް ހެދިފައި ހުރުންކަމަށެވެ. އެހެންނަމަވެސް ފަހުން އެކުލަވާލެވުނު މާލޭގެ އެމަރޖެންސީ ރެސްޕޮންސް ޕްލޭންގެ ދަށުން، ވާރޭ ވެހެން ފެށިތާ 10 ވަރަކަށް މިނެޓުގެތެރޭގައި ހުރިހާ މުއައްސަސާތައް ގުޅިގެން ފެން ހިންދުމުގެ މަސައްކަތް ފެށިކަން ސިފާ ފާހަގަކުރެއްވިއެވެ.

"ގެތަކުން ވާރޭފެން ހިންދަން ހޮޅި ޖަންގްޝަންތަކަށް ގުޅާފައި ހުންނާތި ޖަންގްޝަންތައްތައް ފުރިގެންވެސް އެތަށް އުނދަގުލެއް ކުރިމަތިވޭ. މި ނަރުދަމާއަކީ މިހާރު މި އޮތް އެއްލައްކަ އެއަތައް ހާސް މިހުންނަށް އެކަށީގެންވާ ނަރުދަމާއެއް ނޫން. މިއީ 80،000އެއްހާ މީހުންނަށް ހަދާފައި އޮތް ނަރުދަމާއެއް."ސިފާ ވިދާޅުވިއެވެ.

އެންޑީއެމްއޭއިން ބުނެފައިވަނީ ކުރިއަށް އޮތް ދުވަސް ތަކުގައި ވިއްސާރަކުރި ނަމަވެސް، މޫސުން ގޯވެސް ގެއްލުންތަކެއް ވެދާނެކަމަށް ލަފާ ނުކުރެވޭކަމަށެވެ. ނަމަވެސް ދިއަވަރުބޮޑުވާ ގަޑިތަކުގައި އުދަ އެރުން އެކަށީގެންވާތީ އެކަމަށް ސަމާލުވުމަށް އެ އޮތޯރިޓީން ވަނީ އިލްތިމާސް ކުރައްވާފައެވެ.