މަޖީދިއްޔާ ސްކޫލުގެ ޓައިމް ކެޕްސޫލް ފެންނާނެކަމުގެ އެއްވެސް އުންމީދެއް ނެތްކަމަށް، އެ ކެޕްސޫލް ހޯދުމަށް މަސައްކަތްކުރާ އެ ސްކޫލްގެ އިސް ދަރިވަރުން ބުނެފިއެވެ. ޓައިމް ކެޕްސޫލަކީ މަޖީދިއްޔާ ސްކޫލަށް 100 އަހަރު ފުރޭ މުނާސަބަތުގައި ނެގުމަށް، 1992ވަނަ އަހަރު ވަޅުލި ކެޕްސޫލްއެކެވެ.
މީގެ 27 އަހަރު ކުރިން މަޖީދިއްޔާ ސްކޫލުގެ ގިނަ ހަނދާންތަކަކާއެކު ވަޅުވި ޓައިމް ކެޕްސޫލަށް ވީނުވީއެއް ނޭނގޭކަމަށް ބުނެ، ވާހަކަތައް ފެތުރުމާގުޅިގެން މަޖީދިއްޔާގެ އިސް ދަރިވަރުންތަކެއްވަނީ ކެޕްސޫލް ހޯދުމުގެ މަސައްކަތް ފަށާފައެވެ.
މަޖީދިއްޔާ ސްކޫލުގެ އިސް ދަރިވަރުން މި މަސައްކަތް ފަށާފައިވާއިރު އެ ދަރިވަރުން މިކަން އެހާ ސީރިއަސްކަމެއްގެ ގޮތުގައި ނަގައިގެން ކުރަނީ ކީއްވެތޯ ސުވާލު އުފެދިދާނެއެވެ. މިއީ އިޔާދަ ނުކުރެވޭވަރުގެ ގެއްލުމެއްކަމަށް އިސް ދަރިވަރުން ދެކެނީ ކީއްވެތޯވެސް ސުވާލު އުފެދިދާނެއެވެ.
މި ހުރިހާ ސުވާލެއްގެ ޖަވާބަކީވެސް ތާރީޚެވެ. އެ ޓައިމް ކެޕްސޫލްގައި ރައްކާކުރެވިފައިވަނީ މަޖީދިއްޔާ ސްކޫލުގެ މުހިންމު ތާރީޚި ލިޔުންތަކާއި ތަކެއްޗެވެ. މި ކެޕްސޫލްގައި އޭރު އެ ސްކޫލުން ކިޔެވި ދަރިވަރުން ހޯދި ކާމީޔާބީއާއިގުޅޭ ސެޓްފިކެޓާއި، މެޑެއްޔާއި، ޓްރޮފީއާއި، ލިޔުންކޮޅުތައް ލިޔެފައިހުރި ޔުނީފޯމާއި، އޭރުގެ މަޖީދިއްޔާ ސްކޫލްގެ މާޙައުލާއި، ދިރިއުޅުން ސިފަކޮށްދޭ ލިޔުންތައްފަދަ މުހިންމު ތަކެތި ހިމެނެއެވެ. އަދި އެ ސުކޫލުން ތަޢުލީމު ހާސިލުކުރާނެ ކުރިއަށްއޮތް ޖީލަށް ފޯރުކޯށްދޭން ބޭނުންވާ މެސެޖުތައްވެސް އެ ކެޕްސޫލަށް ލާފައިވެއެވެ. އެ ސްކޫލުގެ އިސް ދަރިވަރުންނަށް މިކަން އެހާ މުހިންމުވާނީ މިހެންވެގެންނެވެ.
މަޖީދިއްޔާ ޓައިމް ކެޕްސޫލް ވަޅުލިތަނަކީ މިހާރުގެ ދަރުމަވަންތަ ސްކޫލް ހުރި ބިމެވެ. ކެޕްސޫލްއަށް ވީގޮތް ބެލުމަށް ސްކޫލުގެ އިސް ދަރިވަރުންތަކެއްވަނީ ދަރުމަވަންތަ ސްކޫލް އަޅަމުންދާ ކޮންސްޓްރަންޝަން ސައިޓުގައި، ކެޕްސޫލް ވަޅުލިތަންވެސް ކޮނެގެން ބަލާފައެވެ. އަދި އެ ސަރަޙައްދުގެ ބިމު އަޑިންވަނީ ކެޕްސޫލްގައި ހުރި ބައެއް ތަކެތިވެސް ފެނިފައެވެ. އެގޮތުން ފެނުނު ބައެއް ތަކެތީގެ ތެރޭގައި، ސިޓީއާއި، ޔުނީފޯމާއި، ޓްރޮފީއާއި، ސެޓްފިކެޓްފަދަ ތަކެތި ހިމެނެއެވެ.
1992ވަނަ އަހަރު ފާހަގަކުރި އެ ސްކޫލްގެ 65 ވަނަ އަހަރީ ދުވަހު، ކެޕްސޫލް ވަޅުލިއިރު އޭގެ ތެރެއަށް ލާފައިވާ ތަކެތި ލާފައިވަނީ ހަލާކުނުވެ ގިނަ ދުވަހު ހުންނާނެހެން ހަދާފައެވެ. ނަމަވެސް ކެޕްސޫލް ވަޅުލިތަން ކޮނުމުން ފެނުނު ތަކެއްޗަށް ވަނީ ވެއްޔާ އެކުވުމުގެ ސަބަބުން ގެއްލުންވެފައެވެ.
ކެޕްސޫލް ވަޅުލުމުގައި ބައިވެރިވި ސްކޫލްގެ އިސް ދަރިވަރުންތަކެއްވަނީ، ލިބުނު މަޢުލޫމާތަކަށް ބަލައި، ކެޕްސޫލް ހޯދުމަށް ތިލަފުޓަށް ގޮސް، ތިލަފުށީގެ ކުނި އަޅާ ސަރަޙައްދުވެސް ބަލާފައެވެ. އެމީހުން ބުނެފައިވަނީ، ކެޕްސޫލްގެ ގޮތުގައި ވަޅުލި ހަން ތިލަފުއްޓަށް އެއްލާލާފައިވާކަމަށް، ސައިޓުގައި މަސަައްކަތް ކުރާ ބިދޭސީން ބުނެފައިވާކަމަށެވެ. ހަން އެއްލާލާފައިވަނީ މިދިޔަ އަހަރުގެ ސެޕްޓެމްރުކަމަށް އެމީހުން ބުނެފައިވާކަމަށް އިސްދަރިވަރުންވަނީ ބުނެފައެވެ. އެމީހުންވަނީ ދަރުމަވަންތަ ސްކޫލް ތަލާލައި އުކާލި ކޮންސްޓްރަކްޝަން ކުނިތައް ކަމަށް ބެލެވޭ ސަރަހައްދެއް ތިލަފުށިން ބަލާފައެވެ. ނަމަވެސް ކެޕްސޫލްގެ އެއްވެސް ނިޝާނެއް ފެނިފައެއް ނުވެއެވެ.
ޕީއެސްްއެމްއާއި ވާހަކަދައްކަވަމުން އިސް ދަރިވަރުން ބުނެފައިވަނީ ކެޕްސޫލް ފެންނާނެކަމުގެ އެއްވެސް އުންމީދެއް މިހާރު ނެތްކަމަށެވެ.
"ބައިވަރު މަސައްކަތް ކުރެވިއްޖެ. އެކަމަކު އެއްވެސް ނިޝާނެއް ފެންނާކަށް ނެތް. ކެޕްސޫލް ހަލާކޮށްލާފައިވާކަން ކަށަވަރުވޭ. މިޔަށް ވީގޮތް ހޯދާ ބަލަން ބޭނުން. ކޮނެގެން ބެލިއިރު ފެނިފައިވަނީ އެންމެ ޕަސެންޓެއްގެ އެއްޗެހި، 99އިންސައްތަވަނީ ގެއްލިފައި" އިސް ދަރިވަރުންވަނީ އެމީހުންގެ ޚިޔާލު ފާޅުކޮށްފައެވެ.
މަޖީދިއްޔާގެ އިސް ދަރިވަރުން ބުނީ މިއީ މަޖީދިއްޔާގެ ތާރީޚު ރައްކާތެރިކުރުމަށް އެޅުނު ބޮޑު ހުރަހެއްކަން ފާހަގަކޮށްފައެވެ. އަދި ސްކޫލްގެ މިފަދަ އާސާރީ ތަރިކަތަކަށް ރައްކާތެރިކުރުމަށް، މިއަށްވުރެ ހަރުދަނާ ގޮތްތަކެއް ގެންގުޅެން ޖެހޭކަން އެމީހުންވަނީ ފާހަގަކޮށްފައެވެ.
ކެޕްސޫލްގެ ތެރެއަށް ބައެއް ތަކެތިލި ފަރާތްތަކުން ބުނީ އެ ކެޕްސޫލްގެ ތެރެއަށް ލާފައިވާ ތަކެތިގެ ތެރޭގައި 2027ވަނަ އަހަރު އެމީހުންގެ ދަރިންނާއި، މަޖީދިއްޔާގައި ކިޔަވަމުންދާނެ ދަރިވަރުނަށް ދިނުމަށް ލިޔެފައިވާ މުހިންމު ލިޔުންތައް ހުންނާނެކަމަށެވެ. އަދި މިފަދަ އާސާރީ އެއްޗެއް ގެއްލުމަކީ، ލިބުނު ބޮޑު ހިތާމައެއްގެ ގޮތުގައި އެމީހުންވަނީ ސިފަކޮށްފައެވެ.
"ދަރިފުޅަށް ލިޔުނު ލިޔުމެއް ވާނެ. އޭރު ބޭންޑުގައި އުޅުނީ، އޭރުގެ އެކަންކަން ސިފަކޮށްފައިވާނެ. އޭރު މުބާރާތްތަކުން ލިބުނު ޖަރސީއާއި، ޓްރޮފީތައްވެސް އޭގައި ވާނެ. 100ވަނަ އަހަރު މި އެއްޗިހި ބަލާލުމުގެ ފުރުސަތު ލިބުމުގެ ވަރަށް ބޮޑު އުންމީދެއްގައި މިތިބީ." އިސް ދަރިވަރަކު ބުންޏެވެ.
މަޖީދިއްޔާ ސްކޫލުގެ އިސްދަރިވަރުން ބުނީ އެ ކެޕްސޫލަށް ވީގޮތެއް އަދި ނޭގުނުނަމަވެސް އެ ހޯދުމުގެ މަސައްކަތް އަދިވެސް ކުރާނެ ކަމަށެވެ. ކެޕްސޫލް ވަޅުލިތާ މިއަދު ވަނީ 27 އަހަރުވެފައެވެ. މި ކެޕްސޫލް ހުޅުވުމަށް ނިންމާފައި އޮތީ 2027ވަނަ އަހަރުއެވެ.