ޓޮޓެންހަމް ޗެމްޕިއަންސް ލީގު ސެމީ ފައިނަލަށް ދިއުމުން ޓީމުގެ ކުޅުންތެރިންނަށް ހިފެހެއްޓުމެއްނެތި ކޯުޗ މައުރީސިއޯ ޕޮޗެޓިނޯ ތައުރީފް ކޮށްފި އެވެ.
މެންޗެސްޓާ ސިޓީ އަތުން ރޭ 4-3އިން ބަލިވި ނަމަވެސް ދެ މެޗުގެ އެގްރީގޭޓުން ނަތީޖާ ހަމަހަމަވެ އަވޭ ގޯލުގެ ތަފާތުން ޓޮޓެންހަމް ސެމީ އަށް ދިއުމުން ކޯޗު ބުނީ މިއީ އޭނާގެ ކޯޗިން ހަޔާތުގައި ވެސް އެންމެ ތަފާތު މެޗު ކަމަށެވެ.
"އަހަރެންގެ ކުޅުންތެރިންނަކީ ބަތަލުން. އަހަރުމެން މިތިބީ ވަރަށް އުފަލުން. އަހަރެންގެ ކޯޗިން ކެރިއަރުގައި މިވަރުގެ އުފަލެއްނުވޭ. މިއީ ވަރަށް ބޮޑު ކާމިޔާބީއެއް،" އާޖެންޓީނާގެ ކުރީގެ ކުޅުންތެރިޔާ ބުންޏެވެ.
އޭނާ ބުނީ ސިޓީ އަކީ ވަރުގަދަ ޓީމެއް ކަމަށާއި އެމީހުންގެ ދަނޑުގައި ތިން ގޯލު ޖެހުމަކީ ކޮންމެ ކޮންމެ މެޗެއްގައި އަދި ކޮންމެ ބަޔަކަށް ކުރެވޭނެ ކަމެއްނޫން ކަމަށެވެ.
ޗެމްޕިއަންސް ލީގުގެ ސެމީ ފައިނަލުގައި ޓޮޓެންހަމް ވާދަކުރަން ޖެހޭނީ އިޓަލީގެ ޔުވެންޓަސް ކަޓުވާލި ނެދަލޭންޑްސްގެ އަޔެކްސްއާ އެވެ. ޕޮޗެޓީނީ ބުނީ ފާއިތުވެދިޔަ ދެ މެޗުގައި ސިޓީއާ ދެކޮޅަށް ދެއްކި ކުޅުމުން މުބާރާތް ކާމިޔާބު ކުރެވިދާނެ ކަމަށް އުއްމީދު ނުކުރަންވީ ސަބަބެއް ނެތް ކަމަށެވެ.
"ފުޓްބޯޅައިގައި މަސައްކަތް ކޮށްފިއްޔާ ކޮންމެފަދަ ނަތީޖާއެއްވެސް ނުކުމެދާނެކަން މި ދެ މެޗުން އެނގުނީ. އެމީހުންނަކީ އަހަރުމެންނާ އަޅާ ބަލާއިރު ވަރަށް މޮޅު ޓީމެއް،" މިދިޔަ ދެ އަހަރު ކުޅުންތެރިން ގަނެފައިނުވާ ޓީމުގެ ކޯޗު ބުންޏެވެ.
ނަމަވެސް އަންނަ ސީޒަނަށް ޓީމު ވަރުގަދަ ކުރާނެ ކަމުގެ އިޝާރާތެއް ޕޮޗެޓިނޯ ވަނީ ދީފަ އެވެ. މި މެޗަށް ފަހު ޕްރެމިއާ ލީގުގައި މި ދެ ޓީމު އަންނަ ހޮނިހިރު ދުވަހު ވާދަކުރާނެ އެވެ.