އައްޑޫ
ސިޓީ ފޭދޫ ބޮޑު މަގުގައި ރޭ ހިނގި
ނުރައްކާތެރި އެކްސިޑެންޓްގައި އަނިޔާ ލިބުނު ދެމީހުންގެ ތެރެއިން އެކަކު
ނިޔާވެއްޖެއެވެ. ސ ހިތަދޫ ރީޖަނަލް ހޮސްޕިޓަލުން ބުނީ މި ހާދިސާގައި ނިޔާވެފައިވަނީ ސ.
ހިތަދޫ ޗަރުކޭސީގޭ އުމުރުން ބާވީސް އަހަރުގެ މަމްދޫން އަހުމަދު އަލި ދީދީކަމަށެވެ.
އެކްސިޑެންޓާއެކު ވިއްސައިގެންގޮސްޖެހި އޭނާގެ ބޮލަށް ވަރަށް ބޮޑަށް ހާނިއްކަވެފައިވާކަމަށް
މައުލޫމާތު ލިބިފައިވެއެވެ. އޭނާ ނިޔާވީ އައްޑޫ ހޮސްޕިޓަލްގައި
ފަރުވާދެމުންދަނިކޮށް ރޭ ފަތިހުއެވެ.
ރޭ 01:30
ހާއިރު ހިނގި މި އެކްސިޑެންޓްގައި ޒަޚަމްވި އުމުރުން 20 އަހަރުގެ އަހުމަދު
ސައްމާހް މުހައްމަދު އިތުރުފަރުވާއަށް މިހާރުވަނީ މާލެގެނެސްފައެވެ.
ފުލުހުން
ބުނީ މިހާތަނަށް ބެލި ބެލުމުން އެނގިފައިވާ ގޮތުގައި މި އެކްސިޑެންޓް ހިނގާފައި
ވަނީ އައްޑޫ ސިޓީ ފޭދޫ ބޮޑު މަގުން ބާރު ސްޕީޑުގައި ދުއްވާފައި ދިޔަ ސައިކަލެއް،
ކާރެއްގެ ކުރިއަށްއަރައި އޯވަރޓޭކް ކުރަން އުޅުމުގެ ތެރޭގައި ކަހާލައިގެން ގޮސް
ފާރެއްގަ ޖެހިގެންކަމަށެވެ. ސައިކަލްގައި ތިބީ ދެމީހުންނެވެ.
މިހާދިސާގައި ހާނިއްކަވެގެން އިތުރުފަރުވާއަށް މާލެގެނައި
ސައްމާހު މުހައްމަދު 11 ޖެހިއިރު މާލެ ގެނެސް އައިޖީއެމްއެޗްގައި މިހާރުދަނީ
ފަރުވާ ދެވެމުންނެވެ. މާލެގެނައިއިރުވެސް އޭނާ އޮތީ ހޭނެތިފައެވެ. ޑޮކްޓަރުން
ބުނާގޮތުގައި ސައްމާހުގެ އެއްފައި ވަނީ ބިނދިފައެވެ. އޭނާގެ ބޮލަށް ލިބިފައިވާ
ގެއްލުންތައް ދެނެގަތުމަށް ބޮލުގެ ސްކޭންތަކެއް މިހާރުދަނީ ހަދަމުންނެވެ.