އެއީ މީގެ 20 އަހަރު ކުރި އެވެ. ބާސެލޯނާގެ ނޯކޭމްޕްގައި ޗެމްޕިއަންސް ލީގު ތަށި މެންޗެސްޓާ ޔުނައިޓެޑް އުފުލާލީ ފައިނަލް މެޗުގެ ފަހު ވަގުތު ފޯވަޑް އޮލޭގަނާ ސޮލިޝަޔާ ޖެހި ގޯލުންނެވެ.
ވަރުގަދަ ބަޔާން މިއުނިކް ކޮޅަށް ޖެހި އެ ގޯލަށް ފަހު އުފާފާޅު ކުރަން ދަނޑުމަތީގައި ސްލައިޑް ކުރި ވަގުތު ފަލަމަސްގަނޑު އިރައިގެން ގޮސް ދުވަސްގަނޑަކަށް ފަރުވާ ހޯދަން ވެސް ޖެހުނެވެ.
އެ އުފާވެރި ހަނދާންތައް ސޮލިޝަޔާ އަށް ވެރިވަނީ މުބާރާތުގެ ކުއާޓާ ފައިނަލުގައި މިރޭ ބާސެލޯނާއާ ދެކޮޅަށް ކުޅެން އެ ޓީމުގެ ދަނޑަށް ޔުނައިޓެޑް ނުކުންނަނީ އޭނާގެ ކޯޗުކަމުގެ ދަށުން ކަމަށްވާތީ އެވެ. ނަމަވެސް ސޮލިޝަޔާ ބުނީ އެހާރާއި މިހާރުގެ ޔުނައިޓެޑް ތަފާތު ކަމަށެވެ.
"ފުރަތަމަ ކަމަކަށް އަހަރެން ބުނާނީ އެ ގޯލަށް ފަހު އުފާފާޅު ކުރަން އުޅެނިކޮށް ލިބުނު ހާނިއްކަ އަކީ ހައްގު ހާނިއްކައެއް ކަމަށް. އެއީ އުފާވެރި ވަގުތެއް. އެއީ ފައިނަލެއް. ބަޔާން މިއުނިކް އޭރުވެސް ވަރަށް ވަރުގަދަ،" ސޮލިޝަޔާ ބުންޏެވެ.
"ދެ ވަނަ ކަމަށް އަހަރެން ދެކޭ ގޮތުގައި އެ މެޗާއި މި މެޗު ވަރަށް ތަފާތު. އެ މެޗު ކުޅެން އަހަރުމެން ބާސެލޯނާ އަށް ދިޔައީ ތިން ތަށި ހޯދުމުގެ އަޒުމުގައި. ޕްރެމިއާ ލީގު ކާމިޔާބުކޮށް، އެފްއޭކަޕް ވެސް ހޯދައިގެން ދިޔައީ. އެކަމަކު މި މެޗަށް ނުކުންނައިރު އަހަރުމެން އަދި މިއޮތީ ޔޫރަޕުގެ މުބާރާތަށް (ޗެމްޕިއަންސް ލީގަށް) ކޮލިފައިވާން ޖެހިފައި. އެފްއޭކަޕުން ވަނީ ކަޓާފައި. އަދި އޭރު އެއީ ފައިނަލަށް. މިއީ ކުއާޓާ ފައިނަލެއް. އެ މެޗުގައި ކުޅުނީ ބަޔާން މިއުނިކް. މި މެޗުގައި ކުޅެނީ ބާސެލޯނާ. އެހެންވީމާ އެ މެޗުގެ ހަނދާންތަކަކީ އަހަރުމެންނަށް ލިބޭ ހިތްވަރެއްނޫން،" ސޮލިޝަޔާ ބުންޏެވެ.
ނަމަވެސް އޭނާ ބުނީ ބާސެލޯނާ ބަލިކުރަން މި ސީޒަނުގައި ޔުނައިޓެޑް ކާމިޔާބުކުރި ބައެއް މެޗުތަކަކީ ކުޅުންތެރިންނަށް ލިބޭ އިތުރުބާރެއް ކަމަށެވެ.
"އަހަރުމެން ޕެރިހުގައި ޕީއެސްޖީ ބަލިކުރިން. އަހަރުމެން ޓިއުރިންގައި ޔުވެންޓަސް ބަލިކުރިން. މިއީ އަހަރެންގެ ކުޅުންތެރިންނަށް ލިބޭ ހިތްވަރެއް. މި ނަތީޖާތަކަކީ ހަގީގަތުގައި ވެސް ބާސެލޯނާއާ ދެކޮޅަށް އަހަރުމެން އުއްމީދާއި ހިތްވަރު ހޯދަންޖެހޭ ނަތީޖާތަކެއް،" ސޮލިޝަޔާ ބުންޏެވެ.
އޭނާ ބުނީ ޔުނައިޓެޑްގެ ދަނޑުގައި 1-0އިން އޭނާގެ ޓީމު ބަލިވެފައިވީ ނަމަވެސް ޕީއެސްޖީ އާއި ޔުވެންޓަސް ބަލިކުރި ގޮތަށް ބާސެލޯނާ ވެސް ބަލިކުރެވޭނެ ކަމަށް ކުޅުންތެރިން އުއްމީދު ކުރާ ކަމަށެވެ.
ނަމަވެސް ސްޕޭނުގެ ރެއާލް މެޑްރިޑާއި ވިޔަރެއާލް ފަދަ ޓީމުތަކަށް ކޯޗުކޮށްދިން ވެސްޓްހޭމްގެ މިހާރުގެ ކޯޗު މެނުއަލް ޕެލެގްރީނީގެ ވިސްނުން ތަފާތެވެ.
"އަހަރެން ދެކޭ ގޮތުގައި ޔުނައިޓެޑަށް މިއީ ވަރަށް ބޮޑު ޓެސްޓެއް. ބާސެލޯނާގެ ދަނޑުގައި ޔޫރަޕުގެ މުބާރާތެއްގައި އެމީހުން ބަލިނުވާތާ ހަ އަހަރުވެއްޖެ. އެއީ މޮޅު ކުޅުންތެރިން ގިނަ މޮޅު ޓީމެއް. އަހަރެން އިނގިރޭސިވިލާތުގައި ހުރީތީވެ އަހަރެން އުއްމީދުކުރަން ޔުނައިޓެޑް ރަނގަޅު ނަތީޖާއެއް ނެރޭނެ ކަމަށް،" މެންޗެސްޓާ ސިޓީ އަށް ޕްރެމިއާ ލީގު ކާމިޔާބުކޮށްދިން ކޯޗު ހީނގެންފައި ބުންޏެވެ.
ޔުއެފާ ޗެމްޕިއަންސް ލީގުގެ ކުއާޓަރ ފައިނަލުގެ ދެވަނަ ލެގުގައި ބާސެލޯނާއާއި މެންޗެސްޓަރ ޔުނައިޓެޑް ވާދަކުރާ މެޗު ފަށާނީ މިރޭ ރާއްޖެ ގަޑިން ބާރަ ޖަހާއިރުއެވެ.