ގެރެތް ބޭލް އަންނަ ސީޒަނުގައި ރެއާލް މެޑްރިޑުގައި ހުންނާނެތޯ ކަނޑައަޅަން ބާކީ ހަތް މެޗު އެބައޮތް ކަމަށް ކޯޗު ޒައިނުއްދީން ޒިދާން ބުނެފި އެވެ.
"މި ވަގުތު އޭނާ އަކީ ޓީމުގެ މެމްބަރެއް. މި ސީޒަނުގައި ބާކީ އަދި ހަތް މެޗު އެބައޮތް. އަހަރެން ޖެހޭނީ ބަލަން އޭނާގެ ކުޅުން،" ޒިދާން ބުންޏެވެ.
ބޭލްގެ ކުރިމަގާމެދު ސުވާލު އުފެދެން ފަށާފައިވަނީ ރެއާލް މެޑްރިޑުގެ ސްކޮޑް ވަރަށް ބޮޑަށް ބަދަލު ކުރަން ޒިދާން ގިނަ ކުޅުންތެރިންތަކެއް ވިއްކާލާނެ ކަމަށް ބެލެވޭތީ އެވެ. ނަމަވެސް ވަކިވަކި ކުޅުންތެރިންނާމެދު ސީދާ ޖަވާބުދޭން ޒިދާން ބޭނުމެއްނުވެ އެވެ.
އަންނަ ސީޒަނުގައި ރެއާލް މެޑްރިޑުން ނުފެންނާނެ ކަމަށް ބެލެވޭ އަނެއް ކުޅުންތެރިއަކީ ޖަރުމަނުގެ މިޑްފީލްޑަރު ޓޯނީ ކްރޫސް އާއި ދުނިޔޭގެ މޮޅު ކުޅުންތެރިޔާ އަދި ކްރޮއޭޝިޔާގެ ކެޕްޓަން ލޫކާ މޮޑްރިޗެވެ. މީގެ ތެރެއިން 29 އަހަރުގެ ކްރޫސްއާ މެދު ޒިދާން ބުނީ އެއީ އޭނާ ވަރަށް ގަޔާވާ ކުޅުންތެރިއެއް ކަމަށެވެ.
"ނަމަވެސް އަހަންނަކަށް ނޭނގެ ކޮންބައެއްކަން ޓީމުގައި ތިބޭނީ. އެކަމާމެދު އަދި ވަކިގޮތެއް ނުނިމޭ. އަހަރުމެން ޖެހޭނީ ސީޒަން ނިމުމުން ބަލަން ތިބެން،" ޒިދާން ބުންޏެވެ.
ކްރޫސް ހޯދަން މެންޗެސްޓާރ ޔުނައިޓެޑާއި ޔޫރަޕުގެ އެހެން ކުލަބުތަކުން ވެސް ދަނީ މަސައްކަތް ކުރަމުންނެވެ. މިދިޔަ އަހަރުގެ ވޯލްޑް ކަޕުގެ މޮޅު ކުޅުންތެރިޔާގެ މަގާމު ހޯދި 34 އަހަރުގެ މޮޑްރިޗް ހޯދުމަށް އިޓަލީގެ އިންޓަމިލާން މިހާރު ވެސް ވަނީ ފައިވިއްދާފަ އެވެ.