އެމް ޑަބްލިއު އެސް ސީގައި ހިނގި އަލިފާނުގެ ހާދިސާއަށް ފަހު އެތަނަށް ލިބުނު ގެއްލުންތައް ފޫބެއްދުމަށާއި، އެފަދަ ކަންކަމަށް ތައްޔާރުވުމުގެ ގޮތުން އުފައްދާފައިވާ ފަންޑަށް ސަތޭކަ ހަތް މިލިއަނަށްވުރެ ގިނަ ރުފިޔާ ލިބިފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ." މާލޭ ވޯޓަރ ކްރައިސިސް މެނޭޖްމަންޓް ފަންޑުގެ" ނަމުގައި އުފައްދާފައިވާ ފަންޑަށް ރާއްޖެއާއި، ބޭރުގެ ފަރާތްތަކުން ދީލަތި އެހީތައް ދެއްވާފައިވާ ކަމަށް އެ މިނިސްޓްރީން މައުލޫމާތުދެއެވެ.އެމް ބީ ސީ ނިއުސްއަށް މައުލޫމާތުދެއްވަމުން ފިނޭންސް މިނިސްޓްރީގެ އެސިސްޓެންޓް އެގްޒެކްޓިވް ޑިރެކްޓަރ އަބްދުﷲ އަލީ ވިދާޅުވީ ދިވެހި ރުފިޔާއިން 75.5 މިލިއަން ރުފިޔާ ފަންޑަށް ލިބިފައިވާއިރު، އެމެރިކާ ޑޮލަރުން 2.1 މިލިއަން ޑޮލަރު ލިބިފައިވާކަމަށެވެ. އަދި ފަންޑުން ކުރަން ނިންމާފައިވާ ކަންތައްތައް ފައިނަލް ކުރުމާއި، ޕްލޭންތައް ހަދަމުންދަނީ ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ކަމަށްވެސް އޭނާ ވިދާޅުވިއެވެ.މިދިޔަ އަހަރުގެ ޑިސެމްބަރު މަހުގެ ހަތަރުވަނަ ދުވަހު އެމް ޑަބްލިއު އެސްސީގައި ހިނގި އަލިފާނުގެ ހާދިސާއެއްގައި އެތަނުގައި ހުރި ޕެނަލް ބޯޑުތައް ހަލާކުވެ، ދެ ހަފްތާ ވަންދެން މާލެއަށް ފެން ފޯރުކޮށްދިނުމުގައި ދަތިތަކާއި ކުރިމަތިވިއެވެ.ފެން ލިބުން ދަތިވެ، އެތައް ގައުމަކުން އެ ދަނޑިވަޅުގައި ރާއްޖެއަށް އެތައް އެހީއެއް ދީފައިވެއެވެ.މިކަމުން އަރައިގަތުމަށް ވިހި މިލިއަން ޑޮލަރުގެ އެހީ ބޭނުންވާކަމަށް ސަރުކާރުން އޭރުވަނީ ބުނެފައެވެ. އަދި ދިމާވެދާނެ ހާދިސާއަކުން ފެނުގެ ޚިދުމަތަށް ބުރު ނާރާފަދަ ގޮތަކަށް ނިޒާމު ބައްޓަން ކުރުމަށް ސަރުކާރުން ނިންމާފައިވާކަމަށްވެސް ސަރުކާރުން ބުނެފައިވެއެވެ.