ޓްރާންސް މޯލްޑިވިއަން އެއަރވޭސް، ޓީއެމްއޭގެ ބޯޓުތަކުގައި، މިނިވަން ފަންސާހުގެ ލޯގޯ އިފްތިތާހުކޮށްފިއެވެ.ބޯޓުތަކުގައި ލޯގޯ އިފްތިތާހުކުރުމަށް އެއާޕޯޓްގެ ޓީއެމްއޭ ޓާރމިނަލުގައި ބޭއްވި ރަސްމިއްޔާތުގައި ލޯގޯ އިފްތިތާހުކޮށްދެއްވީ، އިކޮނޮމިކް މިނިސްޓަރ މުހައްމަދު ސައީދާއި، ހޯމް މިނިސްޓަރ އުމަރު ނަސީރެވެ.އެ ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވީ، މިނިވަން ފަންސާސް ފާހަގަ ކުރަމުންދާއިރު ރާއްޖެއަށް ޒިޔާރަތްކުރާ ފަތުރުވެރިން ރާއްޖޭގެ ރީތި މަންޒިލް ތަކަށް ދަތުރުކުރާ ބޯޓުތަކުގައި ލޯގޯ ފެންނަ ގޮތަށް ހުރުން މުހިއްމު ކަމަށާއި، މިނިވަން ފަންސާސް ރަމްޒު ކޮށްދޭ ސްވެނިއަރވެސް ފަތުރުވެރިންނަށް ވިއްކުމަށް ވިސްނަމުންދާކަމަށެވެ.މި ރަސްމިއްޔާތުގައި ވާހަކަފުޅު ދައްކަވަމުން ހޯމް މިނިސްޓަރ އުމަރު ނަސީރު ވިދާޅުވީ، މިނިވަން ފަންސާހާ ގުޅިގެން ހަމައެކަނި ކުރާ ކަމަކީ ލޯގޯ ޖެހުން ނޫން ކަމަށާއި، ތަފާތު ހަރަކާތްތައް ހިންގަމުން ގެންދާނެ ކަމަށެވެ.އެގޮތުން ޖުލައި ސައްބީސްވަނަ ދުވަހު، ދިވެހި ދިދައިގެ ގޮތުގައި ތައްޔާރުކޮށްފައިވާ ވައިކުޑަތަކަކާއެކު 15 ޒުވާނަކު ސްކައި ޑައިވްކޮށްފައި ގަލޮޅު ދަނޑަށް ފޭބުމަކީވެސް ފާހަގަކޮށްލެވޭ ކަމެއްކަމަށެވެ. އަދި އެ ކަމުގައި ޓީއެމްއޭގެ އެހީތެރިކަން ބޭނުންވާ ކަމަށްވެސް މިނިސްޓަރ ވިދާޅުވިއެވެ.މިއަހަރު ރާއްޖޭގައި ހިންގާ ކޮންމެ ހަރަކާތަކުންވެސް މިނިވަން ފަންސާހުގެ ކޮންމެވެސް ނިޝާނެއް ފެންނާނެ ކަމަށް މިނިވަން ފަންސާހުގެ އޮފީހުން މައުލޫމަތުދެއެވެ.