ހޮނިހިރު ދުވަހު ބާއްވާ ރައްޔިތުންގެ މަޖިލީހުގެ އިންތިޚާބަށް ހުރިހައިކަމެއް ފުރިހަމަކޮށް ތައްޔާރުވެ ނިމިފައިވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
މަޖިލިސް އިންތިޚާބަށް ވަމުންދާ އެންމެ ފަހުގެ މަޢުލޫމާތު ޙިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، އިންތިޚާބުގައި ޙަރަކާތްތެރިވާ އޮފިޝަލުންނާއި ވޯޓްކަރުދާސްތައް ރަށްރަށަށާއި ރާއްޖެއިންބޭރަށް ފޮނުވުމާއި، އިދާރީ ގޮތުންވެސް ފުރިހަމަކުރަންޖެހޭ ހުރިހާކަމެއް ފުރިހަމަކޮށް ނިމިފައިވާކަމަށެވެ. ޝަރީފް ވިދާޅުވީ، ނިމިދިޔަ ރިޔާސީ އިންތިޚާބުގެ ތަޖުރިބާއަށް ބެއްލެވުމަށްފަހު ވަރަށް ގިނަ ކަންކަން މި އިންތިޚާބުގައި ރަނގަޅުކޮށްފައިވާނެކަމަށެވެ. އެގޮތުން ވޯޓްލާ މަރުކަޒުތަކުގައި ވޯޓުލުމަށް ކިއުގައި ގިނަވަގުތު ހޭދަކުރަން ނުޖެހޭނެގޮތަށް އިންތިޒާމް ހަމަޖައްސާފައިވާކަން ޝަރީފް ފާހަގަކުރެއްވިއެވެ.
ކޮންމެ ވޯޓުފޮށްޓަކަށްވެސް އެވްރެޖުކޮށް ވޯޓްލާނީ ފަސް ސަތޭކައާއި ހަ ސަތޭކައާއި ދެމެދުގެ މީހުންކަމަށް ޝަރީފް ވިދާޅުވިއެވެ. އަދި އެއަށްވުރެ ގިނަ މީހުން ވޯޓުލާނަމަ އިދާރީ ދެ މޭޒު ވޯޓުކަރުދާސް ދޫކުރުމަށް ބަހައްޓާފައި ހުންނާނެކަމަށް ވިދާޅުވިއެވެ. މީގެ އިތުރުން ވޯޓުލާ މީހުންނަށް ފަސޭހަކުރުމަށްޓަކައި ކޮންމެ ކިއުއެއްގެ އެންމެ ފަހަތުގައި ވޯޓްފޮށީގެ ދާއިރާއާއި އިތުރު މަޢުލޫމާތު ފެންނާނެ ބޯޑެއް ބަހައްޓާނެކަމަށްވެސް ޝަރީފް ބިވިދާޅުވިއެވެ.
"މިފަހަރު ކިއުއާ ހަމައިން އެނގޭނެ ކޮން ފޮށްޓެއްކަން. އަޅުގަނޑުމެން އިންނާނެ ކޮންމެ ކިއުއެއްގައި އެންމެފަހު މީހެއްގާތުގައި މީ މިވެނި ފޮށްޓެއްގެ ކިއުއެއކަން އެނގޭނެ ބޯޑެއް ޖަހާފައި. އެއިރުން ކިއުގައި ޖެހޭއިރުވެސް އޭނާއަށް އެގޭނެ މިފޮށްޓަށް ލެވޭނެކަން ނުވަތަނޫންކަން. އެކަން ވަރަށް ފަސޭހަވާނެ." ޝަރީފް ވިދާޅުވިއެވެ
އެހެން އިންތިޚާބުތަކާއި ޚިލާފަށް މިފަހަރުގެ އިންތިޚާބުގައި އިލެކްޝަންސް ކޮމިޝަނުން އިޢުލާންކުރާނީ ކޮންމެ ދާއިރާއެއްގެ ޖުމްލަ ނަތީޖާކަށް ޝަރީފް ވަނީ ވިދާޅުވެފައެވެ. އެހެންމަވެސް ވޯޓުލާ މަރުކަޒުތަކުގައި ކޮންމެ ވޯޓު ފޮށްޓަކަށް ވޯޓުލާފައިވާ ނަތީޖާ ތަފްސީކޮށް އިޢުލާންކުރާނެކަމަށާއި، އަދި ނަތީޖާ ޝީޓް މަރުކަޒުގައި ޢާންމުކޮށް ފެންނާނެހެން ބަހައްޓާނެކަމަށެވެ. ޝަރީފް ވިދާޅުވީ، 8631 ނަތީޖާ ޝީޓް އިޢުލާނުކުރާނެކަމަށެވެ.
"501 ފޮށި ހުންނައިރު ދާއިރާތަށް ބެހިފައި އެބަހުއްޓޭ 8631 ނަތީޖާ ޝީޓް ތައްޔާރުކުރާވަރަށް. މި ޝީޓްތައް އެ މަރކކަޒެއްގައި އިޢުލާނުކުރާނެ. އަދި އެއަށްފަހު އަޅުގަނޑޫމެންނަށް ނަތީޖާ ފޮނުވުމުން މި ސެންޓަރުން ވެރިފައިކޮށްފައި ވަގުތީ ނަތީޖާގެ ގޮތުގައި އިޢުލާންކުރަމުންދާނެ ކޮންމެ ދާއިރާއެއްގެ ޖުމްލަ ނަތީޖާ." ޝަރީފް ވިދާޅުވިއެވެ.
ޝަރީފް ވިދާޅުވީ ވޯޓުލުމަނޑައަޅާފައިވާ ގަޑިއަށް ފަށާ ނިންމަން ކަނޑައަޅާފައިވާ ގަޑިއަށް ނިންމާލެވޭނެކަމަށް އުއްމީދުކުރެވޭކަމަށެވެ. އިންތިޚާބު ބާއްވާ ދުވަހުންފެށިގެން ދެދުވަހެއްގެ ތެރޭގައި ވަގުތީ ނަތީޖާ އިޢުލާންކުރުމަށްފަހު އޭޕްރީލް 12ވަނަ ދުވަހުގެ ރޭގެ ކުރިން ދާއިމީ ނަތީޖާ އިޢުލާންކުރެވޭނެގޮތަށް އެ ކޮމިޝަނުން މަސައްކަތްކުރައްވަމުން އަންނަކަމަށްވެސް އޭނާ ވިދާޅުވިއެވެ. ޝަރީފް ވަނީ ޤާނޫނުގައި ކަނޑައަޅާފައިވާ މުއްދަތުގެ ތެރޭގައި އެ ކޮމީޝަނަށް ލާޒިމުކޮށްފައިވާ ހުރިހާކަމެއް ފުރިހަމަކޮށްފައިވާނެކަމުގެ ޔަޤީންކަން ދެއްވާފައެވެ.
އެހެން އިންތިޚާބުތަކަށްވުރެ މިފަހަރުގެ އިންތިޚާބުގައި ބާޠިލު ވޯޓު ގިންވާނެކަމަށް ލަފާކުރެވޭކަން ފާހަގަކުރައްވައި ޝަރީފް ވަނީ އެކަމަށް ޢާންމުން ހޭލުންތެރިކުރުވުމަށް ގިނަ މަސައްކަތްތަކެއް ކުރައްވާކަން ފާހަގަކުރައްވާފައެވެ.
"ބާޠިލުވޯޓު ޢަދަދު އިތުރުވެދާނެތީ ކޮންމެ ވޯޓުލާ މަރުކަޒެއްގެ ދޮރުކުރިމަތީގައި ކިއު ހަދަފައިތިބޭއިރު ކިއުގައި ތިބޭ މީހުންނަށް ފެންނަގޮތަށް ދުރުގަތިބެގެން ކިޔާލެވޭ ފޮންޓި ސައިޒުން ވާނެ ޢިބާރާތްލިޔެފައި. މަރުކަޒަށް ވަނުމުގެ ކުރިން ކޮންމެ މީހަކަށް ކިޔާލަން ލިބޭނެ. އޭގައި ވާނެ ރަނގަޅުފާހަގައިގެ އިތުރުން އެއްވެސް ލިޔުމެއް ފާހަގައެއްޖަހާފިނަމަ ބާޔިލުވާނެކަމަށް." ޝަރީފް ވިދާޅުވިއެވެ.
އިންތިޚާބުގެ ކެމްޕެއިންނާ ގުޅޭގޮތުން ޤައުމީ ކޮމްޕްލެއިންސް ބިއުރޯއަށް މިހާތަނަށް ބޮޑު މައްސަލައެއް ނުވަތަ ކަންބޮޑުވާމިންވަރުގެ ޝަކުވާއެއް ލިބިފައިނުވާކަމަށްވެސް ޝަރީފް ވިދާޅުވިއެވެ. އިންތިޚާބު އަމާންކަމާ ސުލްހަވެރިކަމާއެކު ކުރިއަށް ގެންދެވޭނެކަމަށް އުއްމީދުކުރައްވާކަމަށްވެސް އިލެކްޝަންސް ކޮމިޝަންގެ ރައީސް ވިދާޅުވިއެވެ. އިންތިޚާބުގެ ވޯޓު ކަރުދާސް ސެކިއުރުޓީ އުރާގައި ބަންދުކުރިފަހުން މާލޭގައި ބާއްވަންޖެހޭ 3 ވޯޓް ކަރުދާސްކޮޅު ރަށަކަށް ފޮނުވާލެވިފައިވާކަން ފާހަގަކުރެވިފައިވާކަމަށާއި، އެހެންކަމުން ވޯޓުލާދުވަހު ވޯޓުލާން ފެށުމުން އެތިން ކަރުދާސްކޮޅު މާލެ ގެނެވޭނެ އިންތިޒާމް މިހާރު ހަމަޖައްސާފައިވާކަމަށްވެސް ޝަރީފް ވަނީ ވިދާޅުވެފައެވެ.
މި ބައްދަލުވުމުގައި އީސީގެ ނާއިބު ރައީސް އަމްޖަދު މުސްޠަފާވަނީ ވޯޓުލާ މަރުކަޒުތަކުގައި ވޯޓުލާންދާ ހުރިހާ އެންމެންނާމެދު އެއް ހަމައަކުން އަމަލުކުރުމަށް އޮފިޝަލުންނަށް އިލްތިމާސްކުރައްވާފައެވެ. އަދި އިންތިޚާބީ ނިޒާމަށް އިތުބާރު ބޮޑުވާގޮތަށް ޢަމަލުކުރުމަށްވެސް ގޮވާލެއްވިއެވެ. މި އިންތިޚާބުގައިވެސް ވަކި މީހަކު ނުވަތަ ބަޔަކު ބޭނުންވެގެން ވޯޓުލުން ހުއްޓުވަމަށް ފުރުޞަތު ނުދެއްވާނެކަމަށާއި، ވޯޓުލުމަށް ފަހި މާހައުލެއް ޤާއިމްކޮށްދޭނެކަމަށް އީސީން ވިދާޅުވިއެވެ.