އަޅުގަނޑުމެންގެ ތެރެއިން ވަރަށް ގިނަ މީހުންނަށް އަދިވެސް ހީވެފައި އޮންނަނީ އޯޓިޒަމް ހުންނަ ކުދިންނަކީ ޖިސްމާނީ ނުކުޅެދުންތެރިކަމެއް ހުންނަ ކުދިންގެ ގޮތުގައެވެ. ނަމަވެސް އެއީ ނުކުޅެދޭ ކުދިންނެއް ނޫނެވެ. އޯޓިޒަމަކީ ކުއްޖާ ހެދިބޮޑުވުމުގައި ދިމާވާ މައްސަލަ އެކެވެ. މިކަމުގެ ސަބަބުން ކުއްޖާގެ ވާހަކަދެއްކުމާއި، އިޖުތިމާޢީ ގުޅުން ކުޑަވުމާއި، އެހެން މީހުންނަށާއި ކަންކަމަށް ސަމާލުކަން ދިނުން ފަދަ ކަންކަންކުރުމަށް އުނދަގޫތަކެއް ހުރެއެވެ. އަދި އެފަދަ ކަންކަން ކުރުމުގައި އެހެންކުދިންނާއި ތަފާތު ގޮތްތަކެއް އެކުދިން ގެންގުޅެއެވެ.
އޯޓިޒަމްގެ އަލާމާތްތައް:
- ނަމުން ގޮވާލުމުން ބަލާނުލުން ނުވަތަ ސަމާލުކަން ނުދިނުން
- ކަންކަމަށް ސަމާލުކަން ދީގެން ވަކިއެއްޗަކަށް އިގިލިދިއްކޮށް ނެހެދުން
- ބައެއް ކުޅިވަރުތައް ކުޅުން އަދި ކުޑަކުދިންނާއި ޝާމިލުވެގެން ކުޅެން ނޫޅުން
- އެހެން މީހުންގެ މޫނަށް ބަލައި ކަޅިއާއިކަޅި ހަމަނުކުރުން
- އެކަހެރިކޮށް އުޅުމަށް ލޯބިކުރުން
- އަމިއްލަ އިހްސާސްތައް ހާމަކުރަން ނޭގުން
- މުޢާމަލާތްކުރުމުގެ ހުނަރު ދަށްވުން
- އެއްބަހެއް ނުވަތަ ލަފުޒެއް ތަކުރާރުކޮށް ކިޔުން
- ކުރާ ސުވާލުތަކަށް ނުގުޅޭ ޖަވާބު ދިނުން
ދުނިޔޭގެ ނިސްބަތުން ކޮންމެ 10،000 މީހުންގެ ތެރެއިން 10 ނުވަތަ 15 މީހުންނަކީ އޯޓިޒަމް ތަހަންމަލްކުރާ މީހުންކަން ވަނީ ފާހަގަ ކުރެވިފައެވެ. އޯޓިޒަމް ހުންނަ ކުދިންގެ ވިސްނުމާއި ފިކުރުކުރުމުގެ ހުނަރު ތަރައްޤީ ވުމުގައި ލަސްތަކެއް ހުރެދާނެއެވެ. މިތަފާތު 6-3 އަހަރަށް ދެމިގެން ދެއެވެ. އޯޓިޒަމް ޖެހެނީ ކީއްވެގެން ކަމެއް އަދި ހޯދިފައެއް ނުވެއެވެ. އެހެންނަމަވެސް ދިރާސާތަކުން ދައްކާގޮތުގައި ޅައުމުރުގައި ކުއްޖެއްގެ ގައިގައި އޯޓިޒަމް ހުންނަކަން ދެނެގަނެވިއްޖެނަމަ، އެކިއެކި ތެރަޕީތަކުގެ އެހީގައި އެކުއްޖާގެ ހާލަތު ރަނގަޅު ކުރެވިދާނެއެވެ.
އޯޓިޒަމް ހުންނަ ކުދިންނަށް އެހެންމީހުންގެ އިޙުސާސްތައް ދެނެގަތުމަކީ ވަރަށްވެސް އުދަނގޫކަމެކެވެ. އެކުންދިންނަށް ބޭނުންވާ އެހީތެރިކަމާއި އަޅާލުން ފުރިހަމަގޮތުގައި ލިބިއްޖެނަމަ އެކުދިންނަކީވެސް މުޖުތަމަޢުގައި ބޭނުން ހިފިދާނެބައެކެވެ. ހުނަރުގެ ގޮތުން ތަފާތުތަކެއް ހުރިނަމަވެސް އޯޓިޒަމް ހުންނަ ކުދިންނަކީ އެކުދިން ކުރާ ކަންކަމުގައި ވަރަށް ގަޔާވެހުރެ، އެކަމާ ވެގެން ކަންކަން ކުރާކުދިންނެވެ. ނަމަވެސް ބާރު އަޑުތަކާއި ފިނިހޫނުމިނަށް އަންނަ ބަދަލުތަކަށް ގަޔާނުވުމާއި، އަވަސް އަވަހަށް ބަޑުހައިވުމާއި، ރުޅިގަދަވުން ފަދަ ކަންކަންވެސް އެކުންދިންގެ ކިބައިން ފެނުން އެކަށީގެންވެއެވެ. އެހެންނަމަވެސް މިއީ އެފަދަ ކުއްޖަކު މުޖުތަމަޢުއިން ބާކީ ކޮށްލަންޖެހޭ ކަމެއްގެ ގޮތުގައި ދެކުމަކީ ގޯހެކެވެ.
އޭޕްރީލް 2: އޯޓިޒަމަށް ހޭލުންތެރިކުރުވުމުގެ ބައިނަލްއަޤްވާމީ ދުވަސް
އދ. އިން އިސްނަގައިގެން ކޮންމެ އަހަރަކުވެސް އޭޕްރިލް މަހުގެ 2 ވަނަ ދުވަސް ފާހަގަކުރަނީ ބައިނަލްއަޤުވާމީ ގޮތުން ފާހަގަކުރާ އޯޓިޒަމަށް ހޭލުންތެރިކުރުވުމުގެ ދުވަހުގެ ގޮތުގައެވެ. މިފަދަ ދުވަހެއް ފާހަގަކުރުމުގެ އެންމެ ބޮޑު މަޤްޞަދަކީ އޯޓިޒަމާއި ބެހޭ ގޮތުން ޢާންމުން ހޭލުންތެރިކުރުވާ، އޯޓިޒަމް ހުންނަ ކުދިންނާއި މީހުންގެ ދިރިއުޅުމުގެ ޙާލަތު ރަނގަޅުކުރުމެވެ. އަދި އެފަދަ ކުދިންނަކީ މުޖުތަމަޢުން ހަވާސާކުރެވިފައިވާ ބައެއްގެ ބަދަލުގައި، އެކުދިންނަށްވެސް ހަމަހަމަ ފުރުޞަތުތަކެއް ހޯދައިދިނުމެވެ. މިދުވަސް ފާހަގަކުރުމުގެ ގޮތުން މިއަހަރަށް ކަނޑައަޅާފައިވާ ޝިޢާރަކީ "އެސިސްޓިވް ޓެކްނޮލޮޖީސް - އެކްޓިވް ޕާޓިސިޕޭޝަން". މިއީ އޯޓިޒަމް ކުދިންނަށްވެސް ޓެކްނޮލޮޖީގެ ވަސީލަތްތައް ބޭނުންކޮށްގެން، މުޖުތަމަޢުގައި އެމީހުންގެ ބައިވެރިވުން އިތުރުކުރުމަށް ބާރުއެޅުމުގެގޮތުން ކަނޑައަޅާފައިވާ ޝިއާރެކެވެ.
މިފަދަ ދުވަހެއް ފާހަގަކުރަމުންދާއިރު، އޯޓިޒަމަކީ ނުކުޅެދުންތެރިކަމެއްގެ ގޮތުގައި ދެކޭދެކުން މުޖުތަމަޢުން ބަދަލުކުރަން އެބަޖެހެއެވެ. އެފަދަ ކުދިންނަށް ބޭނުންވާ ތަޢުލީމާއި ތަމްރީން، ފުރިހަމަގޮތުގައި ލިބިދެވިއްޖެނަމަ، އެކުންދިނަކީވެސް ތަފާތުތަކެއް ގެނެވިދާނެ ކުދިންތަކެކެވެ. ޤައުމުގެ ތަރައްޤީގައި އެފަދަ ކުދިންނާއި މީހުންގެ ބައިވެރިވުންވެސް ހޯދިދާނެ ބައެކެވެ. ބޭނުންވަނީ މުޖުތަމަޢުގެ އެހީތެރިކަމާއި އެއްބާރުލުމެވެ. އެފަދަ ކުދިންގެ އާއިލާތަކުގެ ލޯތްބާއި އަޅާލުމެވެ.