އޮލޭގަނާ ސޮލްޝަޔާއާއެކު މެންޗެސްޓާ ޔުނައިޓެޑް މި ސީޒަނުގައި ގަދަ ހަތަރަކަށް އަރަން ޖެހޭ ކަމަށް ވޭލްސްގެ ކޯޗު އަދި ޔުނައިޓެޑްގެ ކުރީގެ ކެޕްޓަން ރަޔަން ގިގްސް ބުނެފިއެވެ.
އޭނާ މިހެން ބުނީ ޔުނައިޓެޑްގެ ކޯޗުކަން ދާއިމީކޮށް ސޮލްޝަޔާއަށް ދިނުމާ ގުޅިގެންނެވެ.
ގިގްސް ބުނީ އޭނާއާއެކު ޔުނައިޓެޑަށް 11 އަހަރު ކުޅުނު ސޮލްޝަޔާ އަށް ކޯޗުކަން ދާއިމީކޮށް ދިނުމުން އުފާކުރާ ކަމަށް. އަދި އެމީހުންނަށް ކޯޗުކޮށްދިން ޔުނައިޓެޑްގެ އެންމެ ކާމިޔާބު ކޯޗު އެލެކްސް ފާގަސަންގެ އެހީ ސޮލްޝަޔާ އަށް ލިބުމަކީ ކާމިޔާބީއާ ހަމައަށް ދިއުމަށް ލިބޭ ވަރަށް ބޮޑު ބާރެއް ކަމަށެވެ.
ޕްރިމިއަރ ލީގުގައި ސޮލްޝަޔާގެ ކޯޗުކަމުގައި ޔުނައިޓެޑް ކުޅުނު 13 މެޗުގައި މިހާތަނަށް ބަލިވީ އެންމެ މެޗަކުންނެވެ. އަދި އެ ޓީމު މިވަގުތު އޮތީ 58 ޕޮއިންޓާއެކު ފަސް ވަނައިގައެވެ. މިއީ ހަތަރު ވަނާގައިވާ އާސެނަލް އަށްވުރެ ދެ ޕޮއިންޓް މަދު އަދަދެކެވެ.
ގިގްސް ބުނީ ޔުނައިޓެޑްގެ ކުޅުންތެރިން ފޯރީގައި ކުޅެފިނަމަ ގަދަ ހަތަރަކަށް އެރޭނެ ކަމަށާއި އެއީ ނުކުރެވޭ ވަރުގެ ކަމެއްނޫން ކަމަށެވެ. މިވަގުތު ސޮލްޝަޔާއާއެކު ކުޅުންތެރިންގެ ފަރާތުން އެފަދަ ޖޯޝެއް ފެނިގެންދާ ކަމަށެވެ.