ކަރަންޓް ސަބްސިޑީއަށް އެދި ރަޖިސްޓްރީކުރުމަށް ހުޅުވާލާފައި ވާއިރު، މިހާތަނަށް މާލެއިން ފަސްހާހަށްވުރެ ގިނަ ފޯމް ހުށަހަޅާފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީއިން ހާމަކޮށްފިއެވެ.އެންސްޕާއިން ދޫކުރަމުން އަންނަ ކަރަންޓް ސަބްސިޑީއަށް އެދި އަލުން ރަޖިސްޓްރީކުރުމުގެ ފުރުސަތު ހުޅުވާލާފައިވަނީ މިއަހަރުގެ ފެބްރުއަރީ މަހުގެ ދިހަވަނަ ދުވަހުއެވެ.އެމްބީސީ ނިއުސްއަށް މައުލޫމާތު ދެއްވަމުން އެންސްޕާގެ ސީއީއޯ މުޖުތަބާ ޖަލީލް ވިދާޅުވީ، އަތޮޅުތަކުން ގިނަ އަދަދެއްގެ ފޯމް ހުށަހަޅާފައިވާ ކަމަށާއި އެހެންނަމަވެސް ފޯމްތަކުގެ ތަފްސީލް އަދި ފައިނަލް ނުކުރެވޭ ކަމަށެވެ. އަދި މާލެއިން އެކަނި ފަސްހާހަށްވުރެ ގިނަ ފޯމް ހުށަހަޅާފައިވާ ކަމަށް މުޖުތަބާ ވިދާޅުވިއެވެ.އިޖުތިމާއީ ރައްކާތެރިކަމުގެ ނިޒާމުގެ ދަށުން ދެވޭ އެހީތައް މުރާޖައާކުރަމުގެ ގޮތުން އަލުން ރަޖިސްޓްރީކުރަން ހުޅުވާލީ، އެންސްޕާއިން ދޫކުރާ އެހީތައް ލިބެމުންދާ ފަރާތްތަކަކީ އެ އެހީތައް ލިބުން ޙައްޤުވާ ފަރާތްތޯ ދެނެގަނެ އެފަރާތްތަކަށް އެހީތައް ފޯރުކޮށްދިނުމަށް ކަމަށް އެންސްޕާއިން މައުލޫމާތު ދެއްވައެވެ.އެންސްޕާއިން ފޯރުކޮށް ދެމުންގެންދާ އެހީތައް ތަފާތު އެތައް ސަބަބަކާހުރެ ލިބެންވާ ފަރާތްތަކުގެ ތެރެއިން ބައެއް ފަރާތްތަކަށް ނުލިބިވާ ކަމަށާއި އެގޮތުން މިހާރުވެސް އެންސްޕާއިން ދެމުންގެންދާ ކަރަންޓު ސަބްސިޑީޒްގެ އެހީ ލިބެނީ ސެޓެލްކޯއިން ޚިދުމަތް ހޯދާ ފަރާތްތަކުގެ ތެރެއިން އަށްޑިހަ ހަތަރު އިންސައްތަ ފަރާތަށް ކަމަށް އެންސްޕާއިން މައުލޫމާތު ދެއްވައެވެ. އަދި ބަކީ ސޯޅަ އިންސައްތަ ފަރާތަށް ސަބްސިޑީ ނުލިބޭ ކަމަށްވެސް އެންސްޕާއިން ވަނީ މައުލޫމާތު ދެއްވާފައެވެ.މީގެއިތުރުން ފެނަކަ ކޯޕަރޭޝަނުން ކަރަންޓުގެ ޚިދުމަތް ހޯދާ ހުރިހާ ފަރާތްތަކަށް ކަރަންޓު ސަބްސިޑީޒް ލިބެމުންދާ ކަމަށާއި މީގެ ތެރެއިން އެގާރަ އިންސައްތަ މީޓަރަކީ ވިޔަފާރި ކުރާ ތަންތަނުގައި ބަހައްޓާފައިވާ މީޓަރުތައް ކަމަށް އެންސްޕާއިން ކުރިން ވަނީ ބުނެފައެވެ.މިމަހުގެ ނުވަޔަކާ ހަމަޔަށް ރަޖިސްޓްރީކުރުމުގެ ފުރުސަތު ހުޅުވާލާފައިވާއިރު، މި މުއްދަތުގެ ތެރޭގައި ރަޖިސްޓްރީ ނުކުރާ ފަރާތްތަކަށް ސަބްސިޑީޒް ނުލިބޭނެއެވެ.މިދިޔަ އަހަރު ކަރަންޓް ސަބްސިޑީޒްގެ ގޮތުގައި ދައުލަތުގެ ބަޖެޓުން ނުވަސަތޭކަ ހަތްދިހަ މިލިއަން ރުފިޔާ ދޫކުރައްވާފައިވާ ކަމަށް އެންސްޕާގެ ތަފާސް ޙިސާބުތަކުން ދައްކައެވެ.