މުއާމަލާތެއް ނުކުރާތާ 5 އަހަރުވެފައިވާ އެކައުންޓްތަކުގެ މައުލޫމާތު ބޭންކް އޮފް ސިލޯނުން އާއްމުކޮށްފި

ބޭންކް އޮފް ސިލޯނު ރާއްޖޭގެ ބްރާންޗުގައި ހުޅުވާފައިވާ އެކައުންޓްތަކުގެ ތެރެއިން އެއްވެސް މުއާމަލާތެއް ނުކުރާތާ 5 އަހަރުވެފައިވާ އެކައުންޓްތަކުގެ މައުލޫމާތު އެ ބޭންކުން އާންމުކޮށްފިއެވެ.

ވޭތުވެދިޔަ ފަސް އަހަރުގެ ތެރޭގައި އެއްވެސް މުއާމަލާތެއް ނުކުރާ 116 ދިވެހި ރުފިޔާ އެކައުންޓާއި، 78 ޑޮލަރު އެކައުންޓްގެ މައުލޫމާތު ބެންކް އޮފް ސިލޯނުން ވަނީ ގެޒެޓްގައި އާންމުކޮށްފައެވެ. އެ ބެންކުން ބުނީ މި އެކައުންޓްތަކުގެ ވެރިފަރާތްތަކުން އެކައުންޓް އެކްޓިވޭޓް ކުރުމަށް އެދޭނަމަ އަންނަ މަހުގެ 20 ގެ ކުރިން އެ ބޭންކަށް ހުށަހެޅުމަށް އެދޭ ކަމަށެވެ.

ދިވެހިރާއްޖޭގެ ބޭންކިންގ އާއި ބެހޭ ޤާނޫނުގެ 35 ވަނަ މާއްދާގައި ބުނެފައިވަނީ، އެކައުންޓަކުން އެއްވެސް މުޢާމަލާތެއް ނުކޮށް ނުވަތަ ބޭންކަށް ލިޔުމަކުން އަންގާފައިނުވާ، 5 އަހަރު ދުވަސް ވެފައިވާ އެކައުންޓަކީ "ޑޯމަންޓް އެކައުންޓް" އެއްގެ ގޮތުގައި ބެލޭވޭނެ އެކައުންޓެކެވެ.

ދާދިފަހުން އެޗްއެސްބީސީގެ ރާއްޖޭގެ ބްރާންޗުގައި ހުޅުވާފައިވާ އެކައުންޓްތަކުގެ ތެރެއިން އެއްވެސް މުއާމަލާތެއް ނުކުރާތާ 5 އަހަރުވެފައިވާ 38 އެކައުންޓެއްގެ މައުލޫމާތުވެސް އެ ބޭންކުން ވަނީ އާންމުކޮށްފައެވެ.