ގެސްޓްހައުސް ސިނާއަތް ކުރިއެރުވުމަށް ގިނަ މަސައްކަތްތަކެއް ދަނީ ކުރަމުން - މޯލްޑިވްސް ގެޓަވޭސް
ރާއްޖޭގެ ގެސްޓްހައުސް ސިނާއަތް ކުރިއެރުވުމަށް ގިނަ މަސައްކަތްތަކެއް ކުރަމުންދާކަމަށް ރާއްޖޭގެ ފަތުރުވެރިކަން ކުރިއެރުވުމަށް މަސައްކަތްކުރާ އަމިއްލަ ކުންފުންޏެއްކަމަށްވާ މޯލްޑިވްސް ގެޓަވޭސްއިން ބުނެފިއެވެ.
މިއަހަރުގެ ޓްރެވެލް ޓްރޭޑް މޯލްޑިވްސް (ޓީޓީއެމް) ފެއަރގައި ގެސްޓްހައުސްތަކުން ބައިވެރިވެ ލޯކަލް ޓޫރިޒަމް ޕްރޮމޯޓްކުރުމުގެ ފުރުސަތު ދޭނެކަމަށް މޯލްޑިވްސް ގެޓްވޭސްއިން ވަނީ ބުނެފައެވެ. ޓީޓީއެމް ފެއަރއަކީ ރާއްޖޭގައި ބާއްވާ އެންމެ ބޮޑު ބައިނަލްއަގުވާމީ ޓްރެވަލް ޓްރޭޑް ޝޯ އެވެ. މިއަހަރުގެ ޓީޓީއެމް ފެއަރ އޮންނާނީ ޖޫންމަހުގެ 11 އިން 13 އަށެވެ.
ރާއްޖޭގެ ވަކިވަކި ރަށްތައް ފަތުރުވެރިކަމުގެ މާކެޓްގެ ގޮތުގައި ބައިނަލްއަޤްވާމީ ދުނިޔޭގައި ޕްރޮމޯޓްކުރުމަށް ގެސްޓްހައުސް މެގަޒިންގެ ނަމުގައި މެގަޒިނެއްވެސް މޯލްޑިވްސް ގެޓަވޭސްއިން އަންނަނީ ނެރެމުންނެވެ. މި މެގަޒިން ގެ 5 ވަނަ އަދަދު ނެރުމަށް ތައްޔާރުވަމުންދާއިރު، މީގެ ކޮޕީތައް ރާއްޖޭން ބޭރުގައި އޮންނަ ފެއަރތަކުގައި ބަހާނެކަމަށްވެސް އެ އެސޯސިއޭޝަނުން ބުނެއެވެ.
ގެސްޓްހައުސް ސިނާއަތް ކުރިއެރުވުމަށް އެމްއެމްޕީއާރުސީއާއި މޯލްޑިވްސް ގެސްޓްހައުސް އެސޯސިއޭޝަނާއި ގުޅިގެން ގިނަ ހަރަކާތްތަކެއް ހިންގަމުންދާކަމަށް މޯލްޑިވްސް ގެޓަވޭސްއިން ބުނެއެވެ. އޭގެތެރޭގައި ރާއްޖޭގައި ހިންގާ ގެސްޓްހައުސްތައް މާކެޓްކޮށް، ގެސްޓްހައުސްތަކަށް އަންނަ ފަތުރުވެރިންގެ އަދަދު އިތުރުކުރުމަށްޓަކައި ކުރެވިދާނެ ކަންތައްތަކާއި ގުޅޭ މައުލޫމާތުދިނުމުގެ ސެމިނަރތަކެއް ވަނީ ފަށާފައެވެ.
މި ސެމިނާތައް ރާއްޖޭގެ އެކި ކަންކޮޅުތަކުން ގެސްޓްހައުސް ތަރައްޤީވަމުންއަންނަ 11 ރަށެއްގައި ކުރިއަށްގެންދާނެކަމަށް މޯލްޑިވްސް ގެޓަވޭސްއިން ބުނެއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި ރަޖިސްޓްރީކޮށްގެން 531 ގެސްޓްހައުސް އަންނަނީ ހިންގަމުންނެވެ. މި ގެސްޓްހައުސްތަކުގެ ބެޑް ކެޕޭސިޓީ 8،733 އަކަށް އަރައެވެ.