ނުވަދިހަ މިލިއަން ޕައުންޑަށް ބްރެޒިލްގެ ފިލިޕް ކުޓީނިއޯ ވިއްކާލަން ބާސެލޯނާ ތައްޔާރުވެއްޖެއެވެ.
ބާސެލޯނާއާ ގާތް ގުޅުން އޮންނަ ފަރާތްތަކުން ބުނަނީ 105 މިލިއަން ޕައުންޑަށް ލިވަޕޫލުން ގެނައި ކުލަބުގެ އެންމެ އަގުބޮޑު ކުޅުންތެރިޔާ ވިއްކާލަނީ އެކަށީގެންވާ ކުޅުމެއް ނުދެއްކޭތީ ކަމަށެވެ. ނަމަވެސް ބާސެލޯނާގެ ތަމްރީނުތަކުގައި ކުޓީނިއޯއަކީ ވަރަށް ފަރުވާތެރި ކުޅުންތެރިއެއް ކަމަށާއި އޭނާ އަށް މެޗުގައި ނުކުޅެވެނީ ކޮން ސަބަބަކާހެދިކަން ބުނަން ނޭނގޭ ކަމަށް ވެސް ސްޕޭނުގެ މީޑިޔާތަކުން ރިޕޯޓްކުރެއެވެ.
ކުޓީނިއޯގެ މައްސަލައިގައި އެ ޓީމުގެ ކޯޗު އާނެސްޓޯ ވަލްވާޑޭ އަށް ފަހަކަށް އައިސް ވަނީ ގިނަ ފާޑުކިއުންތަކެއް އަމާޒުވެފައެވެ. ޓީމުގެ ގިނަ ސަޕޯޓަރުންގެ މެޗުތަކުގައި ކޯޗުގެ މަގުބޫލުކަން ވަނީ ދަށްވެފައެވެ. އެއީ ކުޓީނިއޯގެ އަސްލު މަގާމުގައި އޭނާ ލައްވާ ނުކުޅުވާ މައްސަލާގައެވެ.
އެޖެންޓުން ބުނަނީ ކުޓީނިއޯ ގަތުމަށް ޝައުގުވެރިވަނީ މެންޗެސްޓާ ޔުނައިޓެޑާއި ޗެލްސީން ކަމަށެވެ. ނަމަވެސް ބާސެލޯނާ ބޭނުންވާ ވަރުގެ އަގެއް މި ދެ ކުލަބުން ދޭނެކަމާއިމެދުވަނީ ސުވާލު އުފެދިފައެވެ.