ބްރެޒިލަށް ޕެނަމާ އަތުން މޮޅެއް ނުވެވުނު

ދުނިޔޭގެ ރޭންކިންގެ 76ވަނާގައި އޮތް ޕެނަމާ އަތުން މަޝްހޫރު ބްރެޒިލް މޮޅުނުވެވި މެޗު 1-1އިން އެއްވަރުވެއްޖެއެވެ.

ދުނިޔޭގެ ފުޓްބޯޅައިގެ އެންމެ ކާމިޔާބު ގައުމު ރޭ ކުޅުނު މެޗުގައި އެޓީމަށް ލީޑް ނަގައިދިނީ އޭސީ މިލާނުގެ ފޯވަޑް ލޫކަސްއެވެ. އެކަމަކު ދުނިޔޭގެ ރޭންކިންގެ ތިން ވަނާގައި އޮތް ބްރެޒިލަށް އޭނާ ހޯދައިދިން މި ލީޑް އޮތީ އެންމެ ހަތަރު މިނެޓު ވަންދެނެވެ.

ޕެނަމާ އަށް އެއްވަރުކޮށްދިނީ ޑިފެންޑަރު އަޑޮލްފޯ މަޗާޑޯއެވެ. މި މެޗުގައި ބްރެޒިލް ޓީމުގައި ޕީއެސްޖީގެ ނޭމާ ފިޔަވައި މަޝްހޫރު ހުރިހާ ކުޅުންތެރިން ކުޅުނެވެ. މެންޗެސްޓާ ސިޓީގެ ކީޕަރު އެޑަސަންއާއި، ފޯވަޑް ގަބްރިއަލް ޖެސޫސް އާއި ލިވަޕޫލްގެ ރޮބާޓޯ ފިރްމީނޯ އާއި ރިޗާލިސަންގެ އިތުރުން ބާސެލޯނާގެ ފިލިޕް ކުޓީނީނިއޯ އާއި ރެއާލް މެޑްރިޑްގެ ކަސެމީރޯ ވެސް މެޗުގައި ކުޅުނެވެ.

ދެ ވަނަ ހާފުގައި ލަނޑު ޖަހަން ބްރެޒިލް ހޯދި އެންމެ ރަނގަޅު ދެ ފުރުސަތު ގެއްލިގެންދިޔައީ ދަނޑީގައި ޖެހިފައެވެ.

ބްރެޒިލްގެ ކޯޗު ޓިޓޭ ބުނީ މެޗުގައި ކުޅުންތެރިން ދެއްކި ކުޅުން ގޯސްނޫން ކަމަށާއި ނަމަވެސް ނަތީޖާ ނުނެރެވޭނަމަ ޓީމަށް ބަދަލު ގެނަނަންޖެހޭނެ ކަމަށެވެ. މި ގޮތުން ކުރިއަށް އޮތް މެޗުގައި ފުރަތަމަ 11 އަށް ބަދަލު ގެންނާނެ ކަމަށް ކޯޗު ބުންޏެވެ.