ޓީބީ ބައްޔާމެދުު އާއްމުން ހޭލުންތެރިކުރުމަށް ކުރިއަށްގެންދިއުމަށް ނިންމާފައިވާ ޤައުމީ ކެމްޕެއިންގެ މަސައްކަތް ވަރަށް އަވަހަށް ފަށާނެކަމަށް ހެލްތް ޕްރޮޓެކްޝަން އެޖެންސީއިން ވިދާޅުވެއްޖެއެވެ. މި ކެމްޕެއިނަކީ ރާއްޖެއަކީ 2022ގެ ކުރިން ޓީބީ އެއްކޮށް ނައްތާލެވިފައިވާ ޤައުމަކަށް ހެދުމަށް ކުރާ މަސައްކަތުގެ ދަށުން ފަށާ ކެމްޕެއިނެކެވެ.
މި ކެޕްއިންގެ ދަށުން ގިނަ އަދަދެއްގެ ބަޔަކު ޓީބީއަށް ޓެސްޓުކުރުމާއި، ޓީބީއާއި ބެހޭ މަޢުލޫމާތު ދިނުމާއި، އަދި ޓީބީ ޖެހިފައިވާ މީހުންނަށް ފަރުވާ ދިނުންވެސް ކުރިއަށްގެންދިއުމަށް ހަމަޖެހިފައިވާކަމަށް އެޗްޕީއޭއިން މަޢުލޫމާތުދެއްވައެެވެ.
ޓިއުބަރކިއުލޯސިސް ނުވަތަ ޓީބީ ބައްޔަކީ މައިކްރޯބެކްޓީރިއަމް ޓިއުބަރކިއޮލޯސިސް ކިޔާ ޖަރާސީމަކުން، ފުއްޕާމެޔާއި، ހަށިގަނޑުގެ އެހެނިހެން ގުނަވަންތަކަށް ޖެހޭ ބައްޔަކެވެ. މި ބަލީގެ ސަބަބުން ކެއްސާއިރު ލޭއައުމާއި، މޭގައި ރިއްސުމާއި، ވަރުބަލިވުންފަދަ ކަންކަން ކުރިމަތިވެއެވެ.
ވޭތުވެދިޔަ ފަންސާހަކަށް އަހަރަށް ބަލާއިރު، މި ބަލިޖެހިގެން ފަރުވާކުރުމަށް ރާއްޖޭގައި 11،396 މީހުން ރެޖިސްޓްރީކޮށްފައިވެއެވެ. 1994ވަނަ އަހަރު، ސީދާ ބެލުމުގެ ދަށުން ޓީބީއަށް ފަރުވާދޭން ފެށުމާއިއެކު، ބަލި ޖެހިފައިވާ މީހުން ރަނގަޅުވެ، ބަލި ޖެހޭ މީހުންގެ ނިސްބަތް ވަަރަށް ބޮޑަށް ދައްވެގެންދިޔައެެވެ.
2018ވަނަ އަހަރު ރާއްޖޭގައި ޓީބީ ބަލި ޖެހިފައިވަނީ 138މީހުންނަށްކަމަށް އެޗްޕީއޭއިން މަޢުލޫމާތުދެއްވައެވެ. އެޗްޕީއޭގެ ތަފާސް ހިސާބުތައް ދައްކާގޮތުން 2014ވަނަ އަަހަރުން ފެށިގެން ރާއްޖޭގައި ޓީބީ ޖެހޭ މީހުން ފެންނަ މިންވަރުދަނީ އިތުރުވަމުންނެވެ.
ކޮންމެ އަހަރެއްގެ މަރޗް މަހުގެ 24ވަނަ ދުވަސް ދުނިޔޭގެ ޓީބީ ދުވަހުގެ ގޮތުގައި ފާހަގަކުރަމުން އަންނައިރު، މިދުވަހުގެ މިއަހަރުގެ ޝިއާރެއްގެ ގޮތުގައި ކަނޑައަޅާފައިވަނީ "ޓީބީ ނައްތާލުމަށް އިސްނަގައިގެން ކުރެވެން ހުރި ކަންތައްތައް ކުރުމުގެ ވަގުތު ޖެހިއްޖެ" މި ޝިއާރެެވެ.
ޓީބީ ނައްތާލުމަށް ރާއްޖެއިންވަނީ ޤައުމީ ފެންވަރެއްގައި ބޮޑެތި މަސައްކަތްތަކެއް ފަށާފައެވެ. ރާއްޖެއަކީ 2022ގެ ކުރިން މުޅިން ޓީބީ ނައްތާލެވިފައިވާ ޤައުމެއްގެ ގޮތުގައި ހެދުމަށް، މިދިޔައަހަރުގެ ފެބްރުއަރީމަހުވަނީ ސްޓްރެޓެޖިކް ޕްލޭނެއް އެކުލަވާލައި، މަސައްކަތްތައް އިފްތިތާޙްކޮށްފައިއެވެ. މީގެދަށުން ޓީބީ ފެތުރޭ މިންވަރު ދެނެގަތުމާއި، އެމީހުންގެ ފަރުވާގެ އިންތިޒާމް ހަމަޖެއްސުމާއި، ހިލޭ ބޭސް ފޯރުކޮށްދިނުމާއި، ޓީބީއަށް ސްކްރީން ކުރުމާއި، މި ބަލި ނައްތާލުމުގެ މަސައްކަތައް ބޭނުންވާ ސިޔާސަތުތައް ކަނޑައެޅުމާއި ތަންފީޒްކުރުން ހިމެނެއެވެ.
އަދި މި ސަރުކާރުގެ ފުރަތަމަ 100 ދުވަހުގެ ވަޢުދުތަކުގެތެރޭގައި ހިމަނައިގެން، ރާއްޖޭގެ އުތުރާއި ދެކުނުގައިވަނީ މި ބައްޔަށް ފަރުވާދެވޭނެ ފަސޭހަ އިންތިޒާމްތައް ހަމަޖައްސާފައެވެ. އެގޮތުން މި ބައްޔަށް ދުނިޔޭގެ ފެންވަރުގެ ފަރުވާ ދިނުމަށް ޖީން އެކްސްޕަރޓް މެޝިންވަނީ ހދ.ކުޅުދުއްފުއްޓާއި، ގދ.ތިނަދޫގައި ހުންނަ ޢަބްދުއްޞަމަދު މެމޯރިއަލް ހޮސްޕިޓަލްގައި ބަހައްޓައި ޚިދުމަތް ފަށާފައެވެ. މި މެޝިނުގެ އެހީގައި ޓީބީ ބެކްޓީރިއާގެ ކިތަންމެ ކުޑަ މިންވަރެއް ހަށިގަނޑުގައި ހުރިނަމަވެސް، ދެގަޑިއެއްހާއިރުގެ ތެރޭގައި ދެނެގަނެވޭނެވޭނެއެވެ.
މި ބަލި ރާއްޖެއިން އެއްކޮށް ނައްތާލުމަށް މަސައްކަތްކުރުމަށް، ލަފާ ދިނުމަށް ހެލްތް މިނިސްޓްރީއިންވަނީ ހައި ލެވެލް ނެޝަނަލް ސްޓިއަރިންގ ކޮމިޓީއެއްވެސް އެކުލަވާލާފައެވެ. މި މަސައްކަތުގެ ތެރެއިން ޓިބީއާއި ބެހޭ މަޢުލޫމާތު ދިނުމާއި، ބައްޔަށް ސްކްރީންކޮށް، ފަރުވާ ދިނުން ހިމެނޭގޮތަށް، ވަރަށް އަވަހަށް ކެމްޕެއިނެއް ފެށުމަށްދަނީ ތައްޔާރުވަމުންނެވެ.
ރާއްޖެއިން ޢަމާޒު ހިފާފައިވަނީ 2022ވަނަ އަހަރު ކުރިން ރާއްޖެއަކީ އެއްކޮށް ޓީބީ ނައްތާލާފައިވާ ޤައުމަކަށް ހެދުމަށެވެ.