ރައްޔިތުންގެ މަޖިލީހުގެ ކޮމިޓީތަކުގައި ހުރި މަސައްކަތްތައް ނުނިމި، މަޖިލީހުގެ ތަޅުމަށް އެޖެންޑާކުރާނެ އެއްވެސް މަސައްކަތެއް ނެތުމުގެ ސަބަބުން މަޖިލީހުގެ ޖަލްސާތައް މެދުކަނޑާލައިފިއެވެ.
އެންމެ ފަހުން މަޖިލީހުގެ ޖަލްސާއެއް ބާއްވާފައިވަނީ މިދިޔަ ހަފްތާގެ ބުދަ ދުވަހުއެވެ. އެންމެ ފަހުން ބޭއްވި ޖަލްސާ ނިންމަވާލައްވަމުން މަޖިލީހުގެ ރައީސް ވިދާޅުވެފައިވަނީ ދެން މަޖިލީހުގެ ޖަލްސާތައް ބާއްވާނީ މަޖިލީހުގައި ހިމެނޭ ޕާޓީތަކުގެ ޕާލިމަންޓްރީ ގްރޫޕްގެ ލީޑަރުންނާއި މަޝްވަރާކުރުމަށްފަހު ކަމަށެވެ. ޕީއެސްއެމްއަށް އެނގިފައިވާ ގޮތުގައި މަޖިލީހުގެ ޖަލްސާތައް މެދުކެނޑިފައިވަނީ ކޮމިޓީތަކުގައި ހުރި މަސައްކަތްތައް ނުނިމި ހުރުމުގެ ސަބަބުންނެވެ.
- ކޮމެޓީތަކުގައި ނުނިމި ހުރި ބިލުތައް:
- 1- ރިޔާސީ ކޮމިޝަންތަކަށް ބާރު ދިނުމުގެ ބިލު
- 2- ކުޑަކުދިންގެ އަދުލުގެ ބިލު
- 3- ޖަމްޢިއްޔާތަކުގެ ބިލު
- 4- ދިވެހިރާއްޖޭގެ ޤާނޫނުލް އުޤޫބާތަށް ހުށަހަޅާފައިވާ އިޞްލާޙު
- 5- ކޮރަޕްޝަންގެ މައްސަލަތައް ހާމަކުރާ ފަރާތްތަކަށް ރައްކާތެރިކަން ދިނުމުގެ ބިލު
- 6- ޤާނޫނީ ޚިދުމަތުގެ ބިލު
އެ ބިލްތައް ދިރާސާކުރުމަށް ކޮމިޓީތަކަށް ފޮނުވާފައިވާއިރު، މިއަދާ ހަމައަށްވެސް އެއްވެސް ބިލެއްގެ މަސައްކަތެއް ނިންމިފައެއްނުވެއެވެ. މަޖިލީހުގެ ޖަލްސާތައް ކުރިއަށް ގެންދެވޭނީ ކޮމިޓީތަކުން ބިލްތައް ދިރާސާކޮށް ނިންމުމަށްފަހު މަޖިލީހުގެ ތަޅުމަށް ފޮނުވުމުންނެވެ.
މަޖިލީހުގެ ކޮމިޓީތައް ނުބޭއްވޭ މައްސަލާގައި ސަރުކާރު ކޯލިޝަންގައި ހިމެނޭ މައި ޕާޓީ އެމްޑީޕީއާއި ޖުމްހޫރީ ޕާޓީއާއި ދެމެދު ޚިޔާލުތަފާތުވުންތަކެއް ވަނީ އުފެދިފައެވެ. އަދި މެންބަރުންގެ މެދުގައި ބަހުގެ ހަމާލަތައްވެސް އަންނަނީ ރައްދުކުރަމުންނެވެ.
މި ހަފްތާގައި މަޖިލީހުގެ ޖަލްސާއެއްބާއްވާފައި ނުވާއިރު، ޢާންމު ގޮތެއްގައި މަޖިލީހުގެ ޖަލްސާތައް ބާއްވަނީ ހޯމް، އަންގާރަ އަދި ބުދަ ދުވަހުއެވެ. މި ހިނގާ އަށާރަވަނަ ރައްޔިތުންގެ މަޖިލީހުގެ ދައުރު އަންނަ މަހުގެ ނިޔަލަށް ހަމަވާނެއެވެ.