ދިވެހި ސިފައިންގެ އުޞޫލުތައް ހަރުދަނާކުރުމުގެ މަސައްކަތް އެމްއެންޑީއެފްގެ ސީނިއަރ ލީޑަރޝިޕުން މިހާރު ކުރައްވަމުން ގެންދަވާކަމަށް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވެއްޖެއެވެ.
އެމްއެންޑީއެފްގެ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސް އިން ހިންގި 13 ވަނަ ފިޒިކަލް އިންސްޓްރަކްޓަރ ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ މާރިޔާ ވިދާޅުވީ ދިވެހި ސިފައިންގެ ހިންގުމުގެ ނިޒާމާއި ވެލްފެއަރގެ ކަންކަން ހަރުދަނާކުރުމުގެ މަސައްކަތް ކުރަމުންދާކަމަށެވެ. އެގޮތުން އަވަށްޓެރި ޤައުމުތައް މެދުވެރިކޮށް ދިވެހި ސިފައިންގެ އަސްކަރީ ޤާބިލުކަން އިތުރުކުރުމުގެ މަސައްކަތް މިހާރު ކުރަމުންދާކަމަށާއި، ސިފައިންނަށް ދެވޭ ތަމްރީންތައް މިހާރަށްވުރެ ހަރުދަނާކޮށް، ޒަމާނަށް އެކަށީގެންވާ ގޮތަށް އެފަދަ ތަމްރީނުތައް ބައްޓަން ކުރުމުގެ މަސައްކަތް ކުރަމުންދާކަން މިނިސްޓަރ ފާހަގަކުރެއްވިއެވެ.
މީގެ އިތުރުން ސިފައިންނަށް އެމީހުންގެ އާއިލާތަކާއެކު ދިރިއުޅެވޭނެ ގޮތް ފަހިކޮށްދިނުމަށް ބޯހިޔާވަހިކަމުގެ ކަންކަން ހަމަޖެއްސުމާއި، ސެނަހިޔާ ހޮސްޕިޓަލުން ފޯރުކޮށްދޭ ޚިދުމަތްތައް އިތުރަށް ފުޅާކޮށް، ސިފައިންގެ މެޑިކަލް ކަންކަން ހަރުދަނާކުރުމުގެ މަސައްކަތްވެސް ކުރަމުންދާކަމަށް ޑިފެންސް މިނިސްޓަރ މާރިޔާ ވިދާޅުވިއެވެ.
ދިވެހިރާއްޖޭގެ ސުލްހަމަސަލަސްކަން ދެމެހެއްޓުމުގެ އެންމެ މުހިންމު ޒިންމާ އަދާކުރަންޖެހޭ ބަޔަކީ ސިފައިން ކަމަށެވެ. ދިވެހި ސިފައިންނަކީ ސިފަވަންތަ އަޙްލާޤާއި، ޒަމާނީ ޢިލްމާއި ހުނަރު ލިބިފައިވާ ޤާބިލުބަޔަކަށް ވާންޖެހޭކަމަށް މިނިސްޓަރ ވިދާޅުވިއެވެ. އަދި ޤައުމަށް ކުރިމަތިވާ ކޮންމެ ޢުދުވާނަކުން ހުށިޔާރުކަމާއި ޤާބިލްކަމާއެކު ދިވެހި ޤައުމުގެ މިނިވަންކަމާއި އިސްތިޤްލާލް ދިފާޢު ކުރަން ތިބޭ ބަޔަކީ ދިވެހި ސިފައިންކަމަށާއި، އެކަން އެންމެ އެދެވޭ ގޮތެއްގައި ހާސިލުކުރެވޭނީ ސިފައިންނަކީ ޖިސްމާނީ ގޮތުންނާއި، ނަފްސާނީގޮތުން ދުޅަހެޔޮ ތަމްރީން ލިބިފައިވާ ޤާބިލުބަޔަކަށް ވެގެންކަމަށް މިނިސްޓަރ ވިދާޅުވިއެވެ.
"ދިވެހި ސިފައިންނަކީ ޤައުމަށް ކުރިމަތިވާ އެކިއެކި ޢުދުވާންތަކުން ހުށިއާރުކަމާއި ޤާބިލުކަމާއެކު ދިވެހި ޤައުމާއި ރައްޔިތުން ދިފާޢުކޮށް، ދިވެހި ޤައުމުގެ މިނިވަންކަމާއި، އިސްތިޤުލާލު ހިމާޔަތްކޮށް ރައްކާތެރިކުރުމަށް ފުރާނައިން ޤުރުބާންވާން ތައްޔާރަށް ތިބި ބައެއް.. ޝައްކެތްނެތްގޮތުގައި މިކަން މިގޮތަށް ކުރެވޭނީ ސިފައިންނަކީ ޖިސްމާނީގޮތުންނާއި ނަފްސާނީގޮތުން ދުޅަހެޔޮ ތަމްރީން ލިބިފައިވާ ޤާބިލުބަޔަކަށްވުމުން،" މިނިސްޓަރ މާރިޔާ ވިދާޅުވިއެވެ.
ކަޅުތުއްކަލާ ކޮށީ ހެވިކަމުގެ މައިދާނުގައި ބޭއްވި، މި ރަސްމިއްޔާތުގައި ފިޒިކަލް އިންސްޓްރަކްޓަރ ކޯހުން ވަނަވަނައަށް ހޮވުނު ދަރިވަރުންނަށް އިނާމު ޙަވާލުކޮށްދެއްވީ މިނިސްޓަރ އޮފް ޑިފެންސް މާރިޔާ އަޙްމަދު ދީދީއެވެ. އަދި މި ކޯސް ފުރިހަމަކުރި ސިފައިންނަށް ސެޓްފިކެޓާއި ކަށިގަނޑު ޙަވާލުކޮށްދެއްވީ، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލެވެ.