ކުރިއަށްއޮތް ރައްޔިތުންގެ މަޖިލީހުގެ އިންތިޚާބުގައި އެމީހަކު ރަށްވެހިވެފައިވާ ތަންނޫން އެހެންތަނެއްގައި ވޯޓުލުމަށް ރީ-ރަޖިސްޓްރީވުމަށް ހުޅުވާލި ފުރުޞަތުގައި 21203 މީހުން ރަޖިސްޓްރީކޮށްފައިވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ރީ-ރަޖިސްޓްރީވުމަށް ހުޅުވާލި މުއްދަތު ހަމަވެފައިވަނީ ރޭ މެންދަމު ދޭއް ޖެހިއިރުއެވެ.
ޕީއެސްއެމް ނިއުސްއާ ވާހަކަދައްކަވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، ރީ-ރަޖިސްޓްރީ ވުމަށް ހުޅުވާލި ފުރުސަތުގައި އެންމެ ފަހު ވަގުތު ގިނަ ފޯމްތަކެއް އެ ކޮމިޝަނުން ބަލައިގަނެފައިވާކަމަށެވެ. އަދި އެހުރިހައި ފޯމްތައް ޞައްޙަތޯ ބެލުމުގެ މަސައްކަތް މިހާރު ކުރިއަށްދާކަމަށާއި، މިމަހުގެ ހަވަނަ ދުވަހުގެ ނިޔަލަށް ފޯމްތައް ޞައްޙަކުރުން ކުރިއަށްދާނެކަމަށް ޝަރީފް ވިދާޅުވިއެވެ.
ތިން ފަހަރެއްގެ މަތިން ރީ-ރަޖިސްޓްރީވުމަށް މުއްދަތު އިތުރުކުރުމަށްފަހު މިހާތަނަށް 21203މީހުން ރީ-ރަޖިސްޓްރީވުމަށް ފޯމް ހުށައަޅާފައިވާކަން ފާހަގަކުރައްވާ ޝަރީފް ވަނީ ރާއްޖެއިން ބޭރުގައި ވޯޓުލުމަށްވެސް ގިނަ ޢަދަދެއްގެ ބަޔަކު ރީ-ރަޖިސްޓްރީވެފައިވާކަމަށް ވިދާޅުވެފައެވެ.
އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، ރާއްޖެއާއި ރާއްޖެއިން ބޭރުގައި ބަހައްޓާ ވޯޓު ފޮށީގެ ޢަދަދަށް މާ ބޮޑު ބަދަލެއް އަންނާނެކަމަށް ލަފާނުކުރެވޭކަމަށެވެ. އެގޮތުން ގާތްގަނޑަކަށް އެއް ފޮށި ނުވަތަ ދެ ވޯޓު ފޮށި މަދުވެދާނެކަމަށް ޝަރީފް ވިދާޅުވިއެވެ.
އީސީން ކުރިން ބުނެފައިވަނީ ޖުމްލަ 507 ވޯޓުފޮށި މަޖިލިސް އިންތިޚާބުގައި ބަހައްޓަނެކަމަށެވެ. އަންނަ މަޖިލިސް އިންތިޚާބުގައި 87 ދާއިރާއަށް މެންބަރުން އިންތިޚާބުކުރާއިރު، ދުއިސައްތަ ފަސްދޮޅަސް ހަތަރުހާސް ފަސްސަތޭކަ އަށްޑިހަ ނުވަ މީހުންނަށް ވޯޓު ލުމުގެ ހައްޤުލިބިގެންވެއެވެ.